И я теды спытавши, єсли не по мови
Знать ретора, по ту 1, дам глупство ослови.
Тот корень в твоем садЂ, отче пречестнЂйшій
Заквитнет з Геликоном над солнце яснЂйшій,
Кгды в Россіи потомок славных Роксолянов,
В Науках поровнаєт премудрых поганов
Тылко абы звитязца Пекелного смока,
Заховал вцале вЂру правую з Востока.
А где солнцу єст мЂстце: тогож дознавает,
Твое имя, кгды мЂстце в грамматице маєт.
1 Пропущено односкладове слово.
Корень умЂєтности, вторый. Реторика, учит слов и вымовы.
Кды бы в земли Єгипскои не Ниловы воды,
Завше бы, без пожитку были огороды.
Нил в ЄгиптЂ хлЂб множит з Нилу весь достаток:
Питє, покорм и пришлых пожитков задаток.
Лечь над мЂру гды берег вода превышшаєт,
Юж в том року жизности земля не пущаєт.
Албо мнЂй нЂж потреба гды воды приносит,
МнЂй теж и того лЂта травы косар косит.
Красномовство заисте, того ж подобенства,
Было негдысь у старых: бо кды набоженства
Учит: там урожай цнот, приносит обфитый,
Гды зась в против: супадок души знаменитый.
МЂрность реч дорогая, кто ся в ней кохает,
Над веселье болш в житю ничего не знает.
ПречестнЂйшій наш отче, Прометеом званый,
Оттоль будеш в Россіи запомЂркованный.
Нурт рЂки Красомовства, юж початок Нилу,
Будет знати Поета, бо от тебе силу
Нил принял седможродных юж Наук высоких
Юж потечет до границ Россіи широких
Реторика звитязцу з триумфом витает.
Але впрод на патрона пилно поглядает:
При нем триумфалный день будет опЂвати,
Фундатора теж в вЂчной сла†фундовати.
Корень умЂєтности третій. Діалектіка, учит розумного в речах познаваня.
Межи штучным фалшивых розмов ошуканєм,
A щирым от неправды правды розезнанем,
Тая дает Наука способ досвЂдченъя,
Туж ВЂдомость приносит скрытого створеня.
За тым Розум субтелный бЂглость в каждой речи,
Як ростропне мовячи здрадыся стеречи.
Так як бы око солнце, гды мглу розганаєт
Дожч, громы, темности, а день розясняєт:
Надто в кротце доводом кого покопати,
Латво можеш, и мудре філософовати.
Тернем острым тот корень зовет Стагирита,
Карнеадес имя му, дал морскаго кита.
Нехже квитнет тот корень в твоєм ГеликонЂ,
Пречистый наш Отче, ку вЂрных оборонЂ:
Бы снать в церкви Сіонской, овоц єго цвЂту
Юж освЂдчил Христово з мертвых встанє свЂту:
Нех взрок терне мудрости тепер колет смутных.
Базилишков унЂтских, Аспідов окрутных:
Оттоль слава Могилом вЂчная повстанет,
И лилЂя высоких цнот их не увянєт.
Корень умЂєтности четвертый. Аріфметіка, учит личбы.
Єст мЂстце на высоком землЂ положеню, —
Трудной працы назбыт людем в прохоженю,
Оказалое мЂстце, и верх знаменитый,
Леч гостинец в пребытю барзо не ужитый,
На верху том пресличном палма вырастает,
А на палмЂ зась цнота гнЂздо своє мает,
Имя мЂстцу час долгій, и многіи лЂта,
До зличеня трудныи от початку свЂта,
Але скоро рахунок з науки приступит,
Праца, трудность з старанєм заразом уступит
Бо унцій познаєш, зличиш міріады,
ЛатвЂй нЂжли Геркулес переплов Цикляды,
Пропорцій досвЂдчиш межи поровнанем
Дня з ночю, а правдивым свят отправованем.
О як дивный тот способ и барзо хвалебный!
Фундаторе цных наук, отче превелебный,
Подалась нам в Россіи знати в часах мЂру,
В чом покажем отступным фалш их и невЂру:
Твоєй от нас Честности, поки часу станет,
Вдячность з Наук поданя, нигды не устает.
Корень умЂєтности пятый. Музика. Учит спЂваня.
Хоч то негдысь строфовал философ убогій
Діогенес музиков, гды цноты дороги
Занедбавши, на Лютнях Кант модеровали,
И стройне в обычаях нестройних спЂвали:
НЂгды єднак в том вины наука не маєт,
Кгды учачій науцЂ сам не подлегаєт.
Музика цвЂт веселя, корень пЂсній значных
Музика сад утЂхи, жродло мыслій вдячных,
Орфеова спЂваня лЂсы, рЂки, скалы,
ЗдумЂвши ся слухали, и Єиріп несталый;
Туж втропы шол звЂр дикій, птаков и рыб много,
Вдячностю потягненый голосу такого,
Але слушнЂй, заисте, правда потребует
СпЂваня, гды науки до себе керует:
Показал то церковный филяр барзо ясный,
Всей Сиріеи оздоба, Дамаскин прекрасный,
Бо день Пасхи и встаня от мертвых спЂвает,
Воскресшего всЂм Христа ясно освЂдчает,
Христов триумф весолый и тот день хвалебный
В гимнах вдячных целебруй отче превелебный.
Корень умЂєтности шестый. Геометрія. Учит землЂ розмЂреня.
Ксенофанес значнЂйшій з філософов давных
Обыватель з Греціи Коліофанов славных,
Архетипом нЂякимсь Бога называти;
Без початку и конца казал признавати:
Змылил єднак тот мудрец, бо розум в поганской
Єще ховал темности, и владзы шатанской.
Геометра в познаню правдивом о Богу
Юж будучи, такую дасть пересторогу:
Бог не єст фігуралный, але круглость свЂту,
Припишет личбу дневи, a одмЂнность лЂту,
Кто хочет землю, небо и всЂ елемента
Познати, геометрес подаст документа,
На шестьдесят всю землю частый розмЂряет,
Архимедес на Сферы небо роздЂляет.
Леч найвышшый вымЂрник з под землЂ выходит,
Й вязнев своих мнозство з собою приводит,
Тот котрый пядю небо мЂрит добротливый,
Нех в науках дарует початок щасливый.
Твоєй зась, отче, сла†конец тот готуєт,
В котором своих вЂрных до Неба пріймуєт.
Корень умЂетности седмый. Астрономія. Учит бЂгов небесных.
Где ясный палац Фебов, розный в будованю,
В положеню высокій, сличный в маліованю;
Где свЂтлый лихтар в небЂ, з седми лямп зложоный,
От всЂх сторон крышталом, моцне обточеный;
Где єст мЂстце планетом, и звЂздам грунтовным,
Отколь свЂтлость променем спадает кляровным, —
Там мысль тая наука людскую заносит,
През що скрытых познанє натур до нас вносит,
Астроліог бЂг солнечный, в зодіацЂ знает
Й през то, в речах пришлых скуток освЂдчает
ДовтЂп людскій прикрую подыймует працу,
Абы могл свЂдом быти горнего палацу:
В науце зась кто добре звЂдарской цвичоный,
Не барзо в том познаню будет утружоный.
Щаслившій єсть над иных, могу речи смЂле,
Астроном, бо он першій познал Бога в тЂле.
Тому ж мирру з кадилом нех вЂщкове носят,
Не Рождество, леч з мертвых встане юж голосят.
В якой сла†Арабов Астроном зоставил,
Такуюсь, честный Отче, юж Россіи справил.
Корень и верх ВсЂх Наук и умЂетностій. Феологія. Учит бозских речій.
Где оучинил границу, Геркулес он силный,
Прац своих богатырских, там теж Гішпан пилный
Мармуровый поставил столп, где з Оцеаном
Выспа мЂстце подает дЂлным Гадитаном:
Тоє мЂстце початком всЂх вод єсть глубоких,
З него плынут веЂ рЂки до краев широких:
Оттоль вода пріймуєт в плытю своєм можность:
Бо гды море всю землю в около обходит,
А конец до початку незначне приводит,
Оцеаном зоветься: гды зась в посред свЂта,
Идет, розне єго теж зовет Аравіта.
Тихже прац неужитых столпом превысоким,
Любо теж Оцеаном именуй глубоким
Небесную науку мудрости початок,
ВсЂх наук жродло бозких, a свЂтских остаток:
ЗвЂтяжцею Цекропов кто хочет зостати,
А в цвиченю цных Наук сам неуставати,
За быстрым злоторогим, кто єленем гонит,
И з Наук в свой пожиток, дорогій час клонит.
Єст граница прац твердых бозкая наука,
Узычаєт учоным, где к бЂгу мунштука:
Єсть Колюмна и конец прац Алкменидовых.
Бо вЂм мнозство приносит добр Ляомедоновых,
Оцеан медоточный мудрость бозских речій,
Слабый розум поняти що может чловечій,
З того моря выходят слодких Наук рвки,
РЂки а вод обфитость дают по всЂ вЂки,
Феолог Оцеаном нехся называєт,
Бо тот Наук, а ов зась всЂх вод жродло маєт.
Але недопустилесь, отче велебнЂйшій