Дьэ, чэйдээн бүтэн, бары хомунан айаннарыгар туруннулар. Эмиэ ону-маны баллыгыраһан, айахтара хам буолбат. Бу сырыыга Янканы түгэх олортулар, ыарыһах утары Миитэрэй олордо. Балай да айаннаан иһэн, уол эмиэ ыарыыта киирэ сырытта да, бу сырыыга кылгастык уонна син чэпчэки соҕустук ыарыйда. Икки оройуон быысаһар кыраныыссатын аһаран айаннаан иһэн, эмискэ Дьааскалара буолан-хаалан турда. Күлэн алларастыыр, аны туран кимниин эрэ мөккүһэр курдук саҥарар: «Дьэ бэйэҥ тиэрдиэх буолбутуҥ, тиэртэҕиҥ дии хотон курдук гарааска», – дии-дии гааһын харса суох үктүүр. Миитэрэй соһуйуу бөҕөнү соһуйан, уолу уоскутар аакка түстэ: ааттаан да көрдө, мөҕөн да көрдө – уол тугу да истибэт курдук. Син балай да моһуоктаата дьонун. Онтон Миитэрэй, дьэ, хайдах эрэ син уоскутан, массыынатын тохтотторон, таһырдьа бары кутуллан таҕыстылар. Онуоха Ньукулай антах туох буолбутун Миитэрэйгэ кэпсээн биэрдэ. Аара дэриэбинэҕэ Ньукулайдааҕы түһэрдилэр. Дьааскалаах салгыы дьиэлэригэр айаннаатылар. Дьааска хайдах эрэ мэй-тэй курдук, наар күлэн алларастыан баҕарар да, күтүөтүттэн саллан туттунар. Дьиэлэригэр түүн ортото кэлэн, дьонун түһэртээтэ.
Миитэрэй санаата буолбакка, уолу кытары олорсон, гарааска түһүстэ. Оттон Янка дьиэтигэр киирдэ: дьоно кэтэһэн аҕай олороллор эбит. Кыыс, хайдах сылдьыбыттарын, туох сонуннаах кэлбитин түөрэ дьонугар кэпсээн-ипсээн, дьонун сэргэхситтэ да, мунчаарта да. Оҕонньордоох утуйуохча буолан эрдэхтэринэ кийииттэрэ Балбаара көтөн түстэ, ыксаабыт: «Уолбут ыарыйда, муостаҕа төкүнүйэ сылдьар, итирик киһи курдук күлэн алларастыыр, убайыҥ аах умуһахтарыгар буокка баар, ону аҕалтаран боруоккар куттараар диэбит үһү эмээхсин. Ону хайыыбын, түүн ыраатта, ол дьон утуйдахтара дии», – диэн, тойоно оҕонньортон сүбэлэтэ киирбит эбит. Оҕонньор: «Ол кырдьаҕас эппитин толорор буоллаххыт дии, Миитэрэйи ыыт», – диэтэ. Балбаара Миитэрэйин быраата аахха, алаас арҕаа өттүгэр олорор ыалга, ыытта. Миитэрэй, утуйа сытар дьону тоҥсуйан, дирбийэн туруортаан, соһутуу бөҕөтүн соһутан, туох буолбутун кэпсээн өссө эбии соһутан, кырдьык, умуһахтарын хаҥас муннугар уурбут буоккаларын Миитэрэйгэ биэрэн ыыттылар. Балбаара, уоһун иһигэр көрдөһөн ботугуруу-ботугуруу, дьиэтин боруогар буоккатыттан кутта. Ол кэннэ уол, хайдах эрэ налыс гына уоскуйан, утуйар аакка барда.
Оҕонньор, утуйбакка, кийиитин кэтэһэн олордо. Балбаара оҕонньордооххо киирэн, эмээхсин хомуһунун сөҕөн-махтайан отур-ботур сибигинэйэ былаастаан кэпсээн, дьонун уоскутан таҕыста.
Ити курдук, сааскы ылааҥы, уһун, дьиктилээх-дьээбэлээх, аптаах-хомуһуннаах күн, дьэ, бүттэ.
Ороһу
– Хайа, тоҕо ытаабатый? Тыыннаах дуо, тоҕо ытаабат? – диэн, саҥа төрөөн сытар дьахтар сиэстэрэттэн, дэлби долгуйан, оҕото ытаабатыттан куттанан, үрүт-үөһэ ыйыта сытта. Онуоха сиэстэрэ бэрт холкутук:
– Мамаша, уоскуй, оҕоҥ үчүгэй, доруобай, – диэн хоруйдаата.
Атырдьах ыйын куйаас күнэ, роддом аарыма улахан түннүгүнэн күн уота хос муус маҥан истиэнэлэрин сырдата тыгар.
Түннүк аттыгар остуолга оҕону бэрийэ турбут сиэстэрэ соһуйан:
– Уой, бу оҕо көрөр дии, батыһыннары көрөр, – диэбититтэн, ийэтэ оҕотун кэтээн көрө сытта.
Оҕото, кырдьык, төбөтүн эргичиҥнэтэн тулатын үөрэтэрдии көрөр курдук уонна адьаһын ытаабат, тарахачыйбат, саҥа төрөөбүт оҕо курдук.
Ити Маайа, төрөөбүтүнэн төрдүс, тыыннааҕынан аахтахха үһүс уолун, ороһулаан төрөтөн сытар. Үс ыйынан түөрт уонун туолуохтаах, ол иһин хат буолбутуттан наһаа соһуйбута, роддомҥа кэлэригэр саата-саата кэлбитэ: «Эмээхсин эрээри, эдэр оҕолордуун төрүү сытыах муҥум буоллаҕа», – диэн. Онто баара, ханна баарый, манна эҥинэ бэйэлээх араас саастаах, кинитээҕэр аҕа да дьахталлар төрөөбүттэр, төрөөрү кэтэһэ да сылдьааччы элбэх эбит. Ону көрөн, Маайа үөрдэҕин эриэхсит.
Уоллара баттаҕар маҥан сүүмэхтээх эбит, ол иһин оҕо Кэрэмэс диэн сүрэхтэннэ.
Хас да сыл ааһан, ороһута алтыс кылааска куоракка үөрэнэ киирэн, Маайа оҕотун батыһан, куорат таас дьиэтигэр хаайтаран олорор. Уол сүүрэн тэлээрэн киирэрэ чугаһаата: уруога бүппүтэ чаас кэриҥэ буолла. Маайа, бүгүн күнү быһа утуйан хаалар курдук тарбаҕын имэринэ сатыы, оҕотун кэтэһэн тэлэбиисэр көрө олордо. Уол ийэтэ кэтэспит бириэмэтигэр кэллэ уонна тоҕо эрэ сыгынньахтана барбата, ийэтигэр саалаҕа көтөн түстэ да, дьыбааҥҥа кэккэлэһэ олоро биэрдэ:
– Маа, илииҥ манан ыалдьа олорор дии, – диэн баран, ийэтин илиитин бэгэччэгин ортотунан баттаабытыгар, Маайа илиитэ уот аһыйа түстэ, ону кытта тэҥҥэ били тарбаҕын ыарыыта сүтэн хаалла. Ийэ наһаа соһуйда.