Төрөппүттэрэ кэпсэтэн, үөрэҕин салгыыр дьолго тиксэр. Училищеҕа элбэх кэнсиэр, улуустарынан гастроллар буолаллар да, тоҕо эрэ кинини чугаһаппаттар, ыарахан ыарыыга ыалдьыбыт киһи курдук көрөллөр.
Олоҕун бу курус кэмигэр, мунчаарар чуҥкук чаастарыгар арахсыспат аргыһын – гитаратын ылан, оргууй аҕай тыаһатара, нарын дорҕооннору таһааран, кэрэ матыыптаах ырыалары айара.
Күүтүүлээх саас кэлэр. Халлаан сылыйан, сир-дойду барыта сырдаан-сымнаан хаалбыт курдук буолар. Кууруһун оҕолоро уонна куратора Анастасия Моисеевна сыыйа кэпсэтэн, сүүрэн-көтөн, көмөлөһөн, «Эргиллии» диэн кэнсиэр тэрийэллэр. Кэнсиэригэр Дима сценаттан тохтоон баран хайдах курдук эрэйдэммитин билигин барытын өйдөөн, көнө суолга хайдах үктэммитин туһунан кэпсиир ырыалары ыллаан, дьон уйулҕатын хамсатар. Сүгүрүйээччилэрэ сценаҕа төннүбүтүнэн эҕэрдэлээн, ытыстарын тыаһа уҕараабат. Кэнсиэригэр киирбит харчытынан диискэ оҥотторор. Бу кэнниттэн Дима «сулуһа» эмиэ уруккутун курдук сандаарыччы умайар.
Үтүө аргыс
Төрөппүттэрим миэхэ оскуоланы бүтэрбиппэр «Евросеть» маҕаһыынтан «Nokia-3250» суотабай төлөпүөнү бэлэхтээбиттэрэ. Олус астыммытым, тэҥнээхтэрим өссө оскуолаҕа үөрэнэ сылдьан суотабайдаахтарыгар ымсыыран аҕай биэрэрим, онон баҕа санаам туолбутуттан атаҕым сири билбэт буолуор диэри үөрбүтүм. Этэргэ дылы, көтүөхпэр кынатым эрэ суоҕа. Суотабайым көмөтүнэн сурук суруйуохпун (SMS), хаартыска (MMS) ыытыахпын, видеоҕа устуохпун, Интернеккэ холбонуохпун, күн-дьыл туругун билиэхпин сөп. Куоракка үөрэххэ киирэр докумуоммун туттара сылдьан, МТС-тартан кэпсэтэргэ табыгастаах «RED-текст» тарибын холботторбутум.
Үөрэххэ киирбит бастакы «дьалхааннаах» сылбар төлөпүөнүм олус элбэхтик миигин абыраабыта. Онтон биир күнү кэпсиэхпин баҕарабын. Тыа хаһаайыстыбатын академиятыгар экономист үөрэҕэр киирбитим. Бастакы семестри кыһамньым күүһүнэн син этэҥҥэ туораабытым. Онтон иккис семестргэ «күһүҥҥүлэниэх» киһини суотабайым быыһаабытын мэлдьэһэр кыах суох.
Сарсын математикаҕа эксээмэним буолуохтаах. Түүнү быһа шпаргалка оҥостон олус хойут, сарсыарданан утуйбутум. Умнан кэбиһэн, будильникпын холбооботохпун. Бу бүтэһик уонна саамай ыарахан эксээмэн. Билбэтим да элбэх. Оскуолаттан математиканы ахсарбаппын уонна өйдөөбөппүн. Дьонум «престижнэй» үөрэх диэн уонна биир кэлим эксээмэн түмүгүнэн баҕалаах үөрэхпэр киирэрбэр баалым да кыра буолан, манна эрэ хапсыбытым.
Математика преподавателэ кытаанах, чой курдук искэн киһи. Күлүү гыммыттыы, кыараҕас хараҕынан симириктээн көрө-көрө өрө үтэн тахсыбыт иһин имэринэ олороро харахпар көстөргө дылы. Эбиитин, тараҕай төбөтө лэкээриҥниирин санаатахпына, хараҕым хараҥарар.
Аҕыйах чаас утуйарбар кинини эрэ түһээн таҕыстым. Илиитин чочоҥното-чочоҥното, тараҕай төбөтө биир кэм лэкээриҥнээн олорор. Онтон зачеткабар улахан баҕайы «2» сыананы туруоран адаарыппытын миэхэ куду анньарын сөбүлээбэккэ, араастаан мөхсө сатыыбын да, иннигэр хамсаабакка тоһоҕоломмут курдук олоробун.
Итинник түҥ-таҥ утуйа сыттахпына, төлөпүөнүм ханна эрэ, араас музыканы түһэрэн, тыаһыыр да тыаһыыр. Онуоха мин уһуктарын уһугуннум да эксээмэн туһунан төрүт умнан кэбиспиппин, хата, сыттыкпынан кулгаахпын саба тутуннум. Онтон эмискэ, туох эрэ имнэммитинии, олоро түстүм. Төлөпүөммүн харбаан ылан кулгаахпар даҕайдым. Ийэм куолаһа: «Эксээмэҥҥин хайастыҥ?» – диир. Мин мух-мах бардым, хойутаабыппын диэн испэр олус куттана санаатым. Ийэбэр киирэ иликпин диэн мөҕүллэртэн куотуннум. Ойон тураат, сууммакка, аһаабакка үөрэнэр сирбэр ыстанным. Хайыы-үйэ 10 чааһы ааһан эрэр. Автобус тохтобулугар сүүрэн иһэн, уһугуннарбатах эдьиийбин мөҕүтүннүм. Эмискэ төлөпүөнүм тыаһаа да тыаһаа буолла. Кулгаахпар даҕайарбын кытта эдьиийим саҥата чаҕаара түстэ.
– Турдуҥ дуо, эксээмэҥҥэр хойутаабатыҥ ини.
– Хойутаатым, куоттарар буоллум, – диэн иһим түгэҕэр аат эрэ харата саҥардым.
– Ханна бааргыный?
– Оптуобуска сүүрэн иһэбин.
– Тохтобулга күүт, билигин тиийиэм. Мин бу дьиэбиттэн чугас таксига олорон иһэбин, – диэн саҥа иһилиннэ. Тохтобулга тиийэрбин кытта маҥан дьүһүннээх такси иннибэр тохтоото. Биэс да мүнүүтэ буолбата, үөрэнэр сирбэр кэллим. Төрдүс этээскэ биир тыынынан сүүрэн таҕыстым. Эксээмэн буола турар аудиториятыгар киирдим. Номнуо бары туттаран, баран эрэллэр эбит.