Хатыҥчаана көмө көрдөөн чаҥкыныыр хаһыытын истэн, ийэлээх аҕата сүүрэн кэллилэр. Иккиэн куттаммыттар аҕай. Ийэтэ эрэйдээх оҕобун сүтэрдим диэбит быһыылаах, иһиттэн саҥата тахсыбат буолуор диэри куттаммыт, ибигириэр диэри тоҥмут кыысчаанын ыга кууһан олордо.
Ити кэмҥэ кырдьаҕас хатыҥ эрэйдээх бүтэһик күүһүн мунньунан нэһиилэ иһиллэр-иһиллибэттик кыыкынаабыта:
– Көрдөһөбүн, мин сиэммин бэйэҕитин кытта илдьэ барыҥ. Собус-соҕотоҕун туран чоҥкуйа тоҥон өлүө, – бүтэһик саҥатын дорҕооно ситэ бүтэ да илигинэ кырдьаҕас хатыҥ ууга «күр» гына суулунна. Уу өрө ыһылла түһээт, үмүрүс гыныытыгар хатыҥ силистэри-баҕастары тимис гынна.
Онтон ыла Хатыҥчаана Сэмэнэптэр олбуордарын иһигэр анал палисадникка сириэдийэ үүнэн турар. Аҕыйах сылынан Хатыҥчаананы тула кырачаан хахыйахтар күөҕүнэн чэлгийиэхтэрэ… Кэлин манна хампа-силик сэбирдэхтээх хатыҥ-чараҥ чэлгийэ суугунуо.
Хатыҥчаана уонна Машенька баҕа санаалара туоларыгар иккиэн саарбаҕалаабаттар. Кинилэр иккиэн бэйэ-бэйэлэрин харааннаһан уһуннук олоруохтара, аҕаларын ууһун тэнитиэхтэрэ.