¥лэтигэр чугас дьүөгэлэммэтэр да, бииргэ чэйдиир, араас сонуну кэпсэтэр дьахталлар баар буолбуттара. Кинилэр барыны бары билэ-көрө охсоллорунан маладьыастар. Уларыйыы-тэлэрийии сибикитэ баар буолбутун ким хайа иннинэ билбит буолаллар. Марина маҥнай утаа дьыалайдаабат курдуга. Дьахталлар тыллара диэх курдук. Ол эрээри ити “үһү” диэһиннэрэ сотору олоххо киирэриттэн салла да саныыр буолбута. ¥өһээҥҥилэргэ чахчы чугас дьахтар баарын сэрэйбитэ. Манна тугунан дьарыктаналлара биллибэт дьахталлар элбэхтэр. Кумаахы тута-тута сыбыытыыллар эрээри, ис-иһигэр киирдэххэ, туохтара да суох. Түмүгэ суох сүүрэллэрин Марина өйдөөбөт. “Чэ, миигин эрэ тыыппатыннар. Бэйэм үлэбин биллэхпинэ, сөп”, – дии саныыр кини.
Ол курдук саҥа эйгэҕэ киирэн миэстэтин булунан үлэлээн барбыта. Саҥа дьыл бырааһынньыга чугаһаабыта. Бииргэ үлэлиир дьахталлара, бырааһынньык түбүгэр оҕустаран, миэстэлэригэр таба олорботтор. Кэлии-барыы, атыы-тутуу бөҕөтө. Марина сыл түмүгэр үлэтэ өссө эбиллэн, өндөйөн да көрбөккө олорбута.
– Ой, Мариша! Эйигин биир олус интэриэһинэй киһи бэлиэтии көрбүт! Разведенный, имеет все! На него многие женщины глаз положили, но он предпочел тебя! Представляешь? – Рита диэн уопсай отдел специалиһа кыыс умайыктанан киирбитэ. Хойуу кырааскалаах хараҕынан омуннаахтык эрилис-туралыс көрөр. – Сарсын үлэбит Саҥа дьыллааҕы баала буолар дии. Онно хайаан да билсиэн баҕарар. ¥чүгэйдик оҥостон кэлээр эрэ. Мин билиһиннэриэҕим!
Марина тугу да булан эппиэттээбэтэ. Эчи, ити кыыс омуна-төлөнө. Ол хайалара буолла? Эдэр дьахтар тоҕо эрэ имэ итийбэхтээн ылбыта. Кини эр дьон көрөрүн бэлиэтии санааччы. Ол эрээри бу диэн ким да билсэ илигэ. “Бээ, сарсын тугу кэтэрим буолуой? ¥лэбэр баттатан саҥа былааччыйа да ылыммакка олоробун!” – дии санаат, Марина ойон туран таҥныбытынан барбыта. Сөбүлүүр бутигар тэбинэн иһэн иһигэр сонньуйа санаабыта. Арай Рита ити сонуну эппэтэҕэ буоллар, сарсыҥҥы бырааһынньыгы эрэ санаабакка олоруо эбитэ буолуо. Олох диэн дьиктигин даҕаны!
Куорат биир улахан ресторанын саалатыгар толору киһи мустубут. Дьахталлар остуоруйа феяларын курдук усталлар. Уот-күөс, күлүү-салыы, чэпчэки музыка – олох дьэргэлгэнэ манна сатыылаабыт. Араас уотунан чыпчыҥнааннар, харыйалар туспа хоровод тэрийбиттэр.
– Марина, наконец-то! Золушка курдук хойутаан кэлэҥҥин, харах барыта эйиэхэ хатанна дии!
– Рита, омуннурума эрэ. Миэхэ эрэ наадыйбаттар ини!
– Дьэ, наадыйар киһи баар. Эйигин кэтэһэ ахан сылдьар. Оо, бу иһэр! – кыыс хараҕынан имнэннэ.
– Можно Вас пригласить на танец? – сөҥ куолас иһилиннэ. Марина иннигэр орто уҥуохтаах, толору эттээх-сииннээх киһи кэлэн турар. Кини үгүстэртэн туох да уратыта суох. “Типичнэй саха киһитэ”, – санаа күлүм гынан ааста. Ол гынан баран кини көрөрүгэр, туттарыгар-хаптарыгар киһини тардар ханнык эрэ күүс баар курдук. Маннык киһи аккаастатары билбэт. Баҕарбытын ситиһэр. Бу да сырыыга Марина эппиэтин истэ барбакка, биилиттэн тутан үҥкүүгэ эргиппитинэн барда. Эрэллээх илиитинэн салайан иһэрэ үчүгэйиэн! Маннык эрэллээх илиигэ бас бэринэн, мөлтөх дьахтар киэбин кэтэн олорбут киһи баар ини! Туох да диэбит иһин, дьахтар эр киһиттэн мөлтөх. Олох бэлэмнээбит араас сохсолорун туоруу сатаан аныгы дьахтар оруолун уларытта. Ол кини баҕата буолбатах – олох быраабылатынан олорорго күһэллии. Күүстээх буоллаҕына, тугу эрэ ситиһиэ. Ол иһин эр дьону кытта тэбис-тэҥҥэ киирсэн, өй-күүс өттүнэн хаалсыбат, бара сатаан, баһыйа сатыыр кэмэлдьилэннэҕэ. Онуоха эбии аныгы эр дьон мөлтөөн биэрэннэр, аҥаардас хаалбыт дьахтар элбэҕиэн!
Музыка тохтоото. Уитни Хьюстоны кытта эҥсилгэннээх, күүстээх иэйиигэ тэҥҥэ тимирэн ылан, Марина мэйиитэ эргийэн таалан тура түстэ.
– Виктор диэммин. Мин эйигин кытта билсиэхпин баҕарбытым ыраатта, – диэн баран илиитин көхсүттэн сылааһынан илгийэн убураан ылла.
Саҥа дьылга туох эрэ ураты түгэн буоларын бары кэтэһэбит. Оҕо саас сырдык өйдөбүлэ иҥэн хааларыттан буолуо. Ол эрээри Марина ити остуоруйаҕа итэҕэйбэт буолбута ыраатта. Арай бүгүҥҥү түүн чахчы остуоруйаҕа тэҥнээх курдук. Виктор, булбутун сүтэриэн куттанардыы, аттыттан арахпат. Марина түргэнник мөлтөх, атаах дьахтар оруолугар киирдэ. Киһитэ баҕа санаатын бүтүннүү толоруон баҕарар.
Ол Саҥа дьылтан Марина олоҕо уларыйбыта. Кини олох маннык толору буоларын саҥа билбитэ. Виктора суох табыллыбат курдуга. Биир да күн сүтэрдэҕинэ чуҥкуйа түһэр. Дьахтар отутун лаппа ааһыар диэри таптал диэн сырдык, истиҥ, олоҕу тосту уларытар иэйиини билбэккэ сылдьыбытын өйдөөбүтэ. Утуйарыгар кини аатын ааттаабытынан хараҕын симэр, сарсыарда эмиэ кини аатын уруйдаабытынан уһуктар. Олоҕун тухары бачча элбэх сибэкки букетын тута илигэ. Билигин дьиэтигэр дьэрэкээн сибэккилэр өрүү тыллаллар.