Виктор бэҕэһээ холбоһон олоруох диэн этии оҥорбута. Этии оҥордо… Кинигэҕэ сурулларын курдук.
– Миэхэ көһөн кэл. Иччитэх дьиэбэр барыахпын да баҕарбаппын. Онно киирэн мааны хаһаайканан буол, – диэбитэ. Уонна бриллианнаах биһилэҕи тарбаҕар кэтэрдэн кэбиспитэ.
Марина илиитин өрө уунан биһилэҕин астына одуулаата. Виктор оҥорбута барыта астык. Бу биһилэҕи кэтэрдэн көрбөтөҕө эрээри, оруобуна сөп. Киниэхэ анаабыт курдук. Дьиҥнээх эрэллээх эр киһи диэн кини. Бүгүн ураты сарсыарда. “Олох диэн кэрэ даҕаны!” – диэн сөпкө этэллэр эбит! Марина сүрэҕин-быарын сып-сылаас сүүрээн толордо.
Таптаабыт киһи тулатын өйдөөн-дьүүллээн көрбөт буолар диэччилэр. Дьахтар саҥа иэйиитигэр куустаран, урут олоҕун сүрүн кыһалҕата гынан олорбутун умнан кэбиспит курдук. Атыннык эттэххэ, ол наһаа улахан проблема буолбатах эбит. Кини таптыыр киһитигэр ыарыһах оҕолооҕун эппитэ. Онуоха: “Туох буолуой? Эн оҕоҕун мин хаһан да атаҕастыам суоҕа. Бэйэбит доруобай оҕолору төрөтүөхпүт буоллаҕа дии”, – идэтинэн эрэллээхтик быһааран кэбиспитэ.
£рөбүл күн көһүү түбүгэ буолбута. Марина туох улахан мала-сала кэлиэй. Таһаҕаһа диэн икки улахан чымадаан уонна иһиттэрин, кинигэлэрин хаалаабыт хоруопкалара буолбуттара. Виктор көмөлөһөөччү дьону аҕалан, дьахтар улаханнык түбүгүрбэтэ. Киэһэ куорат киинигэр турар улахан квартираны булбуттара.
– Бу дьиэҕэ аны эн хаһаайкаҕын. Хайдах саныыргынан оҥорон-тутан кэбиһиэххин сөп. Түгэх хоһу кыыска аныахха, – дьиэни көрдөрө сылдьан Виктор ыйбыта-кэрдибитэ.
Санаатын үллэстэр диэххэ сөп да, кини этиитэ хайдах эрэ дьаһал курдук иһиллэр. Быһа баттаан эрэр курдук этэн кэбистэҕинэ толороргор эрэ тиийэҕин. Ол гынан баран Марина тапталлааҕа дьаһаллааҕын астынар. Дьиҥнээх эр киһи маннык буолуохтаах дии саныыр.
Марина тапталларын уйатын киһи кута-сүрэ тохтуур гына оҥоруон баҕарар. Виктора киирэн баран таһынааҕы түбүгү барытын умнан, ис дууһатыттан сынньанар дьиэтэ буолуохтаах. Ол инниттэн үлэтиттэн отгул ылан, харытын ньыппарынан өрөмүөн үрдүгэр түспүтэ.
– Харчы төлөөн анал биригээдэҕэ оҥорторуохха ээ. Эн идеятын биэр, атынын анал үлэһиттэр толоруохтара. Билигин оннук гыналлар, доҕоччуок, – диэн баран Виктор бартыбыалыттан халыҥ харчыны таһааран ууммута. – Бачча суума сөп буолара буолуо. Мин массыына биэриэм. Онон туох наадатын атыылас.
Таас дьиэ барахсаны оҥорон-тутан кэбистэххэ букатын саҥатыгар түһэр. £рөмүөн кэнниттэн дьиэлэрэ биирдэ сандаара, сырдыы түстэҕэ бу. Дьахтар ордук куукунатын астынар. Куукуна – дьиэ тэбэр сүрэҕэ. Ыарахан сыаналаах омук кафелынан күлүмүрдээн, саҥа миэбэл сытынан дыргыйан, Марина санаатын ортотунан буолбута. Киһитин араас аһынан күндүлүөн баҕаран, наар билииккэ аттыгар туран тахсар. Онон бу хостон тахсыбат даҕаны.
Марина кэргэн диэн саҥа статустаммыта хайыы-сах сыл аҥаара буолбута. Наар дьиэ түбүгэ, күннээҕи ас астааһына. Атыҥҥа бириэмэтэ да тиийбэт курдук. ¥лэтигэр нэһиилэ баран кэлэр. Урут кэргэннээх дьахталлар аат эрэ харата үлэлээн баран, үлэ чааһа бүттэ да, дьиэлэригэр ыстаналларын сүөргүлүү санааччы. Билигин бэйэтэ оннук ыксаллаах үлэһитинэн буолбута. Онтуттан бэйэтэ да бэркиһии саныыр. “Ол аата карьеристка буолбатахпын. Дьиҥэр, дьиэтээҕи дьахтар эбиппин ээ”, – диэн түмүккэ кэлэн соһуйар. Онон биирдэ Виктора: “Марина, үлэҕиттэн уурайыаххын сөп этэ. Ол эн хамнаһыҥ сыыһа тугу да быһаарбат. Дьиэҕин-уоккун көр. Хайа, уонна баҕар эбиллиэхпит дии”, – диэбитин сирбэтэҕэ. Онон биир үтүө күн кини дьиэ хаһаайката буолбута.
Дьиэ хаһаайката буолуу диэн туспа үлэ. Хонтуораҕа үлэлиирдээҕэр ордук киһи күүһүн-уоҕун, бириэмэтин барытын ылар дьыала. Ону сорохтор өйдөөбөттөр. Виктор ыраас, биир да быыла суох дьиэҕэ, сылаас аска түргэнник үөрэммитэ.
Дьахтар барахсан тапталыгар бүтүннүү умайар, бэринэр уратылаах. Таптыыр киһититтэн оҕолонортон ордук күндү киниэхэ суох. Марина оҕолонуон наһаа баҕарар. Киһитэ да күүтэрин биллэрэр. “Оҕолоннохпутуна саахсаланыахпыт. Мин хамсыыр-хамсаабат баайым барыта оҕобор ананыа этэ. Онон кытаат!” Улахан иэйиигэ куустара сылдьар дьахтар кини баайыгар наадыйбат, ону санаабат даҕаны. Тапталлааҕар оҕо бэлэхтиэн эрэ баҕарар. Ол оҕо кинилэр тапталларын тыыннаах салгыыта, дьоллоох туоһута буолуо этэ. Ол гынан баран оҕо сибикитэ биллибэт. Марина аны сыал-сорук оҥостунан медицина киинигэр көрдөрүммүтэ. “Дьахтар быһыытынан доруобайгын. Оҕолонуоххун сөп”, – диэн быһаарбыттарыгар биирдэ чэпчии түспүтэ. Викторым кыайан оҕоломмот, туох эрэ итэҕэстээх дьахтар курдук ылыныа диэн иһигэр саллар этэ. Оччоҕуна күүтэн көрүөххэ. Киһитэ бастакы кэргэнигэр икки оҕолоох. Онон киниэхэ да проблема суох буолуохтаах. Марина аны наар бэйэтин иһиллэнэр, туох эрэ уларыйыы буоларын күүтэр турукка киирбитэ.