– Доҕоор, бу киэһэ ыалдьыттар кэлэр буоллулар. Аскын үчүгэйдик тардаар эрэ, – диэн Виктора биир күн сэрэппитэ.
Марина киэһэ мааны ыалдьыттары остуол хотойорунан астаах көрсүбүтэ. Виктор кэргэним диэн билиһиннэрбитэ. Биллэр, улахан тойоттор кэлбиттэр. Араас кэпсэтии манна буолбута. Суолталаах кэпсэтиилэр бу курдук остуолга олорон ыытыллаллар диэн баар. Ол чахчы эбит.
– Марина Аркадьевна, үрдүк үөрэхтээх юрискын дии. Итиччэ престижнэй үөрэҕи бүтэрэн баран бу киһиэхэ хамначчыт буола сылдьыаҥ дуо? ¥чүгэй соҕус дуоһунаска олордон кэбиһэбин дуо? – биллэрдик холуочуйбут тойон этиилээх буолбута. Киһи барыта кини айаҕын кэтииригэр үөрэнэн хаалбыт киһи тиэрэ түһэн олорон талбытын дойҕохтуур.
– Эс, суох. Миэхэ дуоһунас наадата суох. Мин дьиэ киэргэлэ буоларбын сирбэппин, – Марина күлбүтэ.
– Кырдьык, дьэ, бу өйдөөх дьахтар саҥата. А то миигин кытта билсибит дьахталлар тута дуоһунаска дуораһыйан бараллар. Бииктэр, сатана уола, сөпкө тайаммыккын ээ, – диэн күлэн хараҕын үүтэ көстүбэт.
Ол-бу куолу, кэпсэтии, ырыа-тойук түүн үөһүгэр диэри салҕаммыта. Ыалдьыттар барбыттарын кэннэ Марина иһитин хомуйа сырыттаҕына, Виктора дьонун атааран кэлбитэ. Ыараханнык диваҥҥа лах гына олорбута. Улаханнык хотторбут. £һүөннээхтик көрөр-истэр.
– Ити тойон анныгар киириэххин баҕараҕын быһыылаах! Тугу ырбаҥныыгын, бэрт буола сатыыгын? Баҕаҥ хоту ити киһи эйигин улаханнык астыммыт. Ымсыырбыт үһү!
– Бииктэр, сарсын кэпсэтиэхпит. Билигин утуй, сылайбыккын. Оронуҥ оҥоһуллан бэлэм.
– Ол миигин утутан баран ханна бараары гынаҕын? Дьахталлар бары бииргит! Дьиэбэр наадалаах дьону да кыайан аҕалыа суохпун дии!
– Хайдах-хайдах тыллаһаҕын? Эн ыалдьыттаргын кытта хайдах кэпсэтиэм суоҕай?
– Кэпсэтимэ! Куукунаттан тахсыа суохтаах этиҥ!
– Ну, это какое-то средневековье, Витя! Чэ, бүт, утуйуох, – Марина күлбүтэ буолла.
– Уонна ити идиотканы хоһуттан тоҕо таһаараҕын?! Ты меня позоришь! Я не знаю, сможешь ли ты родить нормального ребенка!
Тыл киһини өлөрөр-өһөрөр күүстээх. Ити тыллар Марина сүрэҕин хайа соппуттара. Оо, бу ыарыытын! Дьахтар сүрэҕин туттубутунан накыс гына түспүтэ. Атаҕастабыл амтана тугун аһыытай! Таптыыр киһитэ кини бэйэтигэр да билиниэн куттанар ыарыылаах миэстэтин хаарыйбыта тугун толооһой!
Сарсыныгар киһитэ туох да буолбатаҕын курдук суунан-тараанан баран үлэтигэр барбыта. Итирик сылдьан тугу тылласпытын өйдөөбөтө буолуо. Марина ыалдьыбыт киһи курдук оронуттан турар күүһэ суох сыппыта. Кини кыыһын дьонуттан саҥа аҕалбыта. “Эдэр дьоҥҥо мэһэйдээбэтин. Олоххун оҥостуоххар диэри биһиэхэ олордун”, – диэн ийэтэ быһаарбыта. Ийэтэ муҥнаах кыыһа үчүгэй киһини көрсөн кэргэн баран эрэриттэн үөрэн чоҕулуҥнаспыт харахтарын санаан, Марина уйа-хайа суох ытаабыта. Төһө уһуннук сыппытын өйдөөбөт.
– Хайа, Марина, аһыҥ ханнаный? Ыксаатым!
Киһитэ эбиэтигэр кэлбитин өйдөөн дьахтар туох баар сэниэтин мунньунан турбута. Остуолун тардыбыта. Виктор кэлэн иннигэр хаһыаты уурунан олорон аһаан кимиритэр. Марина диэки көрбөт даҕаны. Таптыыртан харах арахпат. Дьахтар киһитэ аһыырын одуулаан олорбута. Кини уларыйбытын сөҕө саныыр. Били сылаас-сымнаҕас сыһыаннаах киһи ханна барда? Марина уйан сүрэҕин имэрийэрдии көрөр харахтар тоҕо урукку курдук көрбөттөр? Оччоҕуна кини туоххаһыйбыт дууһата сымныа, сылааһынан туолуо этэ. Билигин кини иннигэр тойон-хаан, тыйыс киһи ыаһыран олорор. Кини Виктора буолбатах.
Киэһэ буоллаҕына биллибэтэ. Түүн үөһэ биллэрдик чэпчээбит киһи икки киһини батыһыннарбытынан тиийэн кэлбитэ.
– Марина! Принимай гостей! Закуску нам быстро приготовь! – аан боруогуттан дьаһал бөҕөтүн куппута.
Аһаан айбардаабыттара. Марина утуйа бараары гынарын киһитэ ыыппат. Холуочук дьон буолары-буолбаты ыаһахтаһалларын көрөн олороругар тиийбитэ.
– Мариш, сбегай за бутылкой, будь другом! – дии-дии Виктор сиэбиттэн кум-хам тутулла сылдьар харчылары ууммутунан ынайан кэлбитэ.
Кини “собуоттаннаҕына” тохтооботун билэр буолан, Марина түүннэри үлэлиир маҕаһыыҥҥа тахсыбыта. Бу хараҥаҕа харбыалаһан бытыылка атыылаһа баран иһэр! Кини манныгы түһээн да баттаппат этэ. Тугун сүрэй! Дьахтар хараҕын уутун кыатана сатыыр да, көмүскэтин уута киниттэн тутулуга суох иэдэһинэн субуллар. Таһырдьа сибиэһэй салгыны эҕэрийбэхтээн сайҕаммыт курдук буолбута. Бытыылкаларын кылыгыраппытынан куукунаҕа ааспыта. Ыалдьыттара көстүбэттэр, утуйбуттар быһыылаах. Арай Виктор остуолга умса түһэн олорор. Марина туруоран оронугар сытыарыан баҕарбыта.