– Куоракка диигин дуу? Дьиэбитин-уоппутун, ынахпытын-сүөһүбүтүн ханна гынабыт?
– Бакаа дьоммутугар хаалларан эриэхпит. Онтон көстөн иһиэ буоллаҕа дии. Онно, кылаабынайа, үлэлээх буолуохпут дии. Дьиэ куортамнаһан олоруохпут. Элбэх ыал көстө дии.
Алексей улахан санааҕа түһэн, хоһугар киирэн кэтэх тардыстан сыппыта. Катя да бу киэһэ ыкпата-түүрбэтэ.
Күһүн үөрэх дьыла саҕаланыыта Семеновтар куораты булбуттара. Аймахтара көмөлөһөн, хас да сүөһүлэрин туттан, Сайсарыга эргэ мас дьиэни атыыласпыттара. Куорат хаарбах дьиэтин сыаната кинилэр тыаҕа хаалларбыт бэртээхэй дьиэлэриттэн хас да бүк үрдүгэ. Талымастыыр кыах суоҕа. Уолаттарын чугас турар оскуолаҕа киллэрбиттэрэ. Катя, идэтинэн үлэ көстүбэккэ, ыксаан рынокка атыыһытынан наймыласпыта. Алеша хата табыллыбыта. Армияҕа сулууспалаабыттары милицияҕа үлэҕэ ыла туралларыгар түбэһэн, киирэн хаалбыта. Син орто ыал сиэринэн буола түспүттэрэ.
Ол эрээри, Катя санаабытын курдук, Алешата арыгытыттан аккаастана охсубатаҕа. Манна даҕаны култаҕар бытыылка саҥа табаарыстары түргэнник булларбыта. Сотору-сотору холуочук кэлэн: “Дьону кытта билсэ сатыыбын. ¥лэбитигэр киэһэ сылаабытын таһаарар буоллахпыт”, – диэн кэргэнин саба саҥаран кэбиһэрэ. Аны манна кэлэн Алексей көрүлээн иһэр буолбута. Катя кэргэнэ өйдөөҕөр түбэһэн төһөтө арыгы содулун, аҕалар буортутун туһунан эппитэ-тыыммыта буолуой? Биирдэ бу ыарыыттан эмтэннэххэ эрэ аккаастаныахха сөп диэн, үлтү хаайан наркологическай диспансерга илдьэ бара сылдьыбыта. Арыгытын укуолунан баайтарбыта. Суох, өр-өтөр буолбатаҕа, киһитэ испитэ эрэ баара.
– Катя, манна бары иһэллэр. Испэтэхпинэ туора көрүллүөм дии. Оннук айылаах арыгыһыт буолбатахпын ээ. Миигин ким да иһээччи диэбэт. Эн эрэ арыгыһыт оҥорон биэрэҕин! – Алексей ол аһын көмүскэһэр идэлэммитэ.
Арыгы обургу ханна-ханна тиэрдибэтий? Алексей саҥа табаарыстарын кытта куорат хайа баҕарар рестораныгар киирэн олороро. Былаас дьоно аатыран, өттөйөн да туран “астарын” булуналлара. Кинилэри ким даҕаны туора хараҕынан көрбөтө.
Биирдэ куорат киинигэр турар сөбүлээн сылдьар рестораннарыгар эмиэ барбыттара. Бырааһынньык эйгэтэ тута туймаарытар алыптаах. Музыка ньиргийиитэ, иһит-хомуос тыаһа, дьон саҥата-иҥэтэ, күлсүүтэ-салсыыта, үҥкүү-битии – хаһан да бүтүө суох ырай олоҕун санатар. Манна кыһалҕаҥ кыырпах саҕа буолан баран олох да симэлийэн хаалар. Барыта чэпчэки, дэбигис.
– Молодой человек! Можно вас пригласить на танец? – кыра соҕус уҥуохтаах, мааны таҥастаах дьахтар кэлэн Алексейы тардыалаата.
Бэйэтинэн ыҥыра турар дьахтартан хайдах аккаастаныай? Бытаан үҥкүүгэ куустуһан баран тэпсэҥнэспитинэн бардылар.
– Мин Любовь диэммин. Ол эбэтэр Таптал, – дьахтара хатаннык күлэн ылла. – Оттон эн ким диэҥҥиний?
– Алексейбын.
– Алексей, Алешенька, сынок диэбит курдук дии. Мин саамай сөбүлүүр аатым!
Бу киэһэни саҥа билсибит дьахтарын кытта бииргэ атаарбыта. Көрдөҕүнэ, дьахтара этэн көрө-көрө күлэн-салан чэпчэкитэ сүрдээх. Алеша бэйэтин эмиэ чэпчэки баҕайытык санаммыта. Оттон кини Катята наар туох эрэ санааҕа баттатан сылдьар. Кэлин хаһан күлбүтүн да өйдөөбөт. Бэһиэлэй дьахтардыын сылдьар бэрт да буолар эбит! Түүн үөһэ саҥа дьүөгэтин дьиэтигэр атаарбыта.
– Миэхэ чэй иһэ киирбэккин дуо? – дьахтара ыҥырбыта.
Люба куорат биир мааны дьиэтигэр улахан квартираҕа олорор эбит. Алексей баай-талым дьиэни дьиктиргээбиттии көрөн турбута.
– Туохтан куттанан турдуҥ? Ким да суох. Киир, саалаҕа аас, – хаһаайка дьаһайбыта.
Аны билсиһиилэрин “сууйбуттара”. Бырааһынньык салҕанан барбыта. Алексей бу түүн Катятын таҥнарбытын өйдөөмүнэ да хаалбыта. Катятын, маҥнайгы тапталын, оҕолорун…
Сарсыарда ыарахан баҕайы төбөлөөх уһуктан кэлэн, ханна-ханна сытабын диэбиттии дьиэни көрбүтэ-истибитэ. Мап-маҥан миэбэллээх утуйар хоско ыраахтааҕылар сытар ложеларын курдук кэтит бэйэлээх ороҥҥо сөрүүнүнэн хаарыйар атлас бырастыынаҕа күөлэһийэ сытара тугун астыгай! Наар маннык ороҥҥо утуйан турбут киһи!
– Мой рыцарь проснулся? Баһаалыста, завтрак к постели!
Люба саҥа буспут кофе сытынан дыргытан кыракый остуолу сүүрдэн киллэрбитэ. Маннык үчүгэй кофены Алексей иһэн көрө илик. Оруобуна киинэҕэ көстөр түгэн курдук. Оронтон турбакка эрэ аһаан-сиэн, төбөтүн ыарыыта тута мүлүрүйбүтэ.
– Бүгүн өрөбүл дии. Давай, айылҕаҕа барыахха эрэ! Шашлыктыахпыт, – Люба этиилээх буолбута.
– Мин дьиэбэр барыахпын наада, – буруйдаах куолаһынан Алеша хардарбыта.
– Я возражений не принимаю! Дьиэҕэр баран походнайдык таҥнан кэлээр, – энергиятынан саба баттаан кэбиспитэ саҥа билсибит дьахтара. – Правалаах инигин? Айылҕаҕа сатыы барбат буоллахпыт дии! Массыынам гаражка быыллыйан ахан турдаҕа.