Алексей мааны дьиэттэн тахсаат санаата уларыйбыта. “Эс, хайдах билсэ түһээт айылҕалаатахпытый. Кэбис! Кэлиэм суоҕа. Оо, дьэ, Катя…” – кэргэнин санаан эр киһи көхсө кыараан ылбыта.
Бүгүн дьиэтин атын хараҕынан көрдө. Самнайан түһэн, дьиэ да бөҕөлөөх! Аана намыһаҕын умнан кэбиһэн холуодаҕа төбөтүн ыарыылаахтык саайан, үөҕүстэ. Билэр никсик сыта муннун саба биэрдэ. Алеша өйүгэр Люба сырдык, киэҥ-куоҥ, мааны квартирата охсуллан ааста. Катя рыногар барбыт. Дьиэҕэ оҕолор бааллар. Куукунаҕа киирэн билииккэҕэ турар хобордооххо сытар котлеттары көрөн баран киэр хайыста. Бэҕэһээҥҥи аһылыктарыттан уурдахтара. Алексейы эмискэ тэһийбэт санаа үүйэ-хаайа тутта. Бу дьиэ наһаа да баттыыр! Хаһан кинилэр киһилии олоруох муҥнарай! Ити Люба курдук…
Эр киһи ойон туран таҥаһын уларыттыбытынан барда.
– Ийэҕит кэллэҕинэ, миигин үлэтигэр барда диэриҥ! – диэн уолаттарын сэрэтэн баран таһырдьаны былдьаста.
Тоҕо эрэ ис-иһиттэн ыксаан Любаҕа тиийдэ. Звоногу баттаатын кытта, кинини эрэ кэтэһэн турбуттуу, аан тэлэллэ түстэ.
– Наконец-то кэллиҥ! Хайыы-сах аҕынным дии! – диэт, дьахтар моойуттан омуннаахтык кууспаҕалаата.
Бу күн ас-үөл тэринэн баҕалаах айылҕаларыгар айаннаабыттара. Алексей күн уотугар үрүҥ көмүһүнэн кытыаста оонньуур килэбэчигэс омук массыынатын ыытан иһэр. Астынан иһэ кычыкаланан ылар. Массыына салонугар чуумпу музыка оонньуур. Адьас атын олох. Алеша түһээн да баттаппатах олоҕо.
Кинилэр сыһыаннара дириҥээн барбыта. Алексей дьиэтигэр кута-сүрэ тохтообот, тэһийбэт буолан испитэ. Люба дьиэтиттэн тахсан барара улам ыараан барбыта. Киһи үчүгэйгэ, баайга-талымҥа түргэнник үөрэнэр. Люба кэргэниттэн арахсыбыта хас да сыл буолбут. Икки оҕолоох. Улахан кыыһа соҕуруу үөрэнэр. Кыра кыыс бэйэтигэр баар. Соҕотохсуйуу аһыытын билбит дьахтар саҥа тапталын сүтэриэн баҕарбат. Кини доҕордонон олоҕо суолталана түспүтэ. Люба бөдөҥ, кыахтаах фирмаҕа үлэлиир. Тутаах салаа начальнига. Онон үп-харчы өттүнэн кыһарыйтарар диэни билбэт. Арай эр киһи болҕомтото, сылааһа тиийбэт. Кини уһун уҥуохтаах, дыраҕар сарыннаах, харанан чоҕулуччу көрбүт Алексейы көрөөт сөбүлээбитэ. Люба сааһынан төһө да аҕатын иһин, эр киһини минньигэс аһынан, үчүгэй усулуобуйанан бэйэтигэр баайар былааннааҕа. Онто туолан эрэриттэн үөрэ саныыр. Дьиктитэ баар, кини таптаабыт киһитин кэргэнин, оҕолорун туһунан билиэн баҕарбат. Алексейа ыал аҕата буоларын билэр эрээри, биирдэ да кини дьонун туоһуласпат. Ол дьахтар тус олоҕун кыраныыссатыгар анарааҥҥылары киллэриэн баҕарбатын, көмүскэнэрин быһыыта. Манан кини бэйэтин албыннана сатыыр курдук. Оттон Алексей саҥа билбит дьахтара кэргэнин туһунан ыйыталаспатын астына саныыр. Онто да суох дууһатыгар ыарахан.
Кистэлэҥ сыһыан эрдэ дуу, хойутуу дуу биллэр уратылаах. Алексей атын дьахтарга барбыт үһү диэн сурах төрөөбүт-үөскээбит дойдуларын кытта толорбута. Чугас дьоно бары Катяны аһыммыттара, Алеша хайдах оннук “иирбитин” сатаан быһаарбатахтара.
…Катя биир сайыҥҥы киэһэ дьиэтигэр кэлбитэ, Алешата таҥаһын-сабын хомунан барбыт этэ. Тугу да эппэккэ, быһаарбакка. Ол эрээри, туох диэҕэй? Саҥата да суох өйдөнөр дьыаланы баран. Катя сып-сырдык, арылхай хараҕа хараҥаран, уһун бэйэтэ кыччаан, кумуччу туттан баран диваныгар сыппыта. Ытыаҕын хараҕын уута кэлбэт, хаһыытыаҕын иһиттэн саҥата кыайан тахсыбат. “Оҕолор дэриэбинэҕэ барбыттара үчүгэй. Кыра уол төһө эрэ айманар этэ…” – ийэ муҥнаах оҕолорун эрэ аһына саныыр. Бэйэтэ буоллаҕына суох курдук. Бу сытан туох да иэйиини, кыһыыны-абаны билбэт. Көннөрү дууһата кууран-хатан хаалбыт курдук. Оннук турбакка хас күн сытыа биллибэт этэ, бииргэ үөрэммит дьүөгэлэрэ саба сырсан кэлбэтэхтэрэ буоллар. Кинилэр хаһан эрэ Катя Алешаттан хомойон ытаатаҕына саататаллар этэ. Билигин сүрэҕин дириҥ бааһын оһорунарыгар тирэх буола сатыыллар. Бу күннэргэ дьүөгэлиилэр бииргэ буолан, кыыстарын санаатын сайҕаатылар, аралдьыттылар.
– Катенька, привет! Эн үрдүк үөрэхтээх бухгалтер этиҥ буолбат дуо? Умнубатыҥ ини? Мин үчүгэйдик билэр кыыһым кинилэр тэрилтэлэригэр бухгалтер миэстэтэ тахсыбыт үһү диир. Баран кэпсэтэн көрбөппүт дуо? Хайа муҥун рынокка тураары гынаҕын? – оскуола кэнниттэн куоракка олохсуйбут, этэргэ дылы, бу олоххо миэстэтин булуммут, сытыы-хотуу дьүөгэтэ Аня биирдэ этиилээх кэлбитэ. – Сарсын ол тэрилтэ генеральнайыгар приемҥа киирэбит. Тугу кэтэргин толкуйдаабытым, – идэтинэн быһа-хото этэн кэбиспитэ.
Дьахтар аймах олоххо ордук тулуурдаах, кытаанах диэн этии кэлин элбэхтик иһиллэр буолла. Айылҕа дьахтары ийэ буоларга бэлэмнээн оннук күүһү биэрдэҕэ. Катя оҕолорун санаабата буоллар, туран салгыы олороро биллибэт этэ. Кини Алешата итинник таҥнарыа эрэ дии санаабата. Оҕо саастарыттан иккиэн биир киһи курдук этилэрэ. Ыраас таптал холбообута да, ону кыайан харыстаабатылар. Тапталлааҕа Катя сүрэҕин, дууһатын сорҕотун илдьэ барбыт курдук. Оннук кини суохтуур, соҕотохсуйар. Ол гынан баран хаһан даҕаны ааттаһыа, көрдөһүө суоҕа. Бырастыы да гынара биллибэт.