Биир күн Катя таптала суох олоруохха сөп эбит дии санаабыта. Уонна бэйэтин сүрдээх кытаанах, бүтэй эттээх курдук санаммыта. Оннук олорор быдан чэпчэки эбит. Билигин Акатерина Николаевна атын киһи. Кини бөдөҥ ювелирнай тэрилтэҕэ бухгалтердыыр. Бэйэтин эрэ күүһүгэр эрэнэр аныгы, дьыалабыай дьахталлар кэккэлэрин хаҥатта. Арай түүн Алешатын санаатаҕына туоххаһыйан ылар. Сырдык хараҕа хараҥарар. Ол эрээри албын түүн түргэнник күрэнэн, чаҕылхай сарсыарданан солбуллар. Кырдьыксыт сарсыарда барытын орун-оннугар туруорар.
Биллэр классикпыт эппитин курдук, олох оонньуута араас да буолар! Хаһан эрэ биир күн араҕыстахтарына буорайар дьон билигин тус-туһунан олохтоохтор. Катя сырдык сэбэрэтин көрбөтөҕүнэ тууйуллан өлө сыһар Алеша бэйэтиттэн элбэх сыл аҕа дьахтары кытта кимнээҕэр үчүгэйдик олорор. Бэл диэтэр, арыгытын испэт буолбут. Урукку табаарыстарыттан арахсан, билигин олох атын эйгэҕэ киирдэ. ¥лэтинэн түргэнник үрдээбитэ. Катята үөрэн диирин истиэн да баҕарбат бэйэтэ, билигин кэтэхтэн юридическай факультекка киирбитэ.
– Дьахтарым тугунан эрэ абылаабыт быһыылаах, – диир урукку табаарыстарын көрүстэҕинэ.
Алексей олоххо интэриэстэммит курдук. ¥чүгэй олоххо. Саҥа кэргэнинээн куорат саамай престижнэй сиригэр улахан дьиэ туттан эрэллэр. Билигин ол эрэ түбүгэр умса түстэ. Туораттан көрдөххө, олоҕунан толору астыммыт көрүҥнээх. Күннээҕи олох түбүгэр, хаппытаал хаҥаттыытыгар буолан оҕолорун саныыра биллибэт. Бастаан уолаттарын аара суолга тоһуйан көрөр, кэпсэтэ сатыыр этэ. Улахаттар өстүйэн туора дьон курдук тутталлар. Кыра уол сыстыах курдук да, убайдарыттан толлон эмиэ чугаһаабат. Арай ахтыбыт, мунчаарбыт харахтарынан аҕатын имэрийэ көрөөхтүүр. Икки иэдэһинэн мөлбөһөн түһэр көмүскэтин уутун ытыһын оҕотунан туора-маары ньухханаахтыыр…
Күн-дьыл ааһан иһэр. Ааспыты сабан маҥан хаар түспүтэ, тымныыны кыйдаан сандал саас салаллыбыта, олоҕу уруй-даан самаан сайын эргиллибитэ. Сайыны муударай күһүн солбуйбута. Олох эргиирэ тохтообот. Биир кэм иннин диэки субуллар, сүүрэр. Кими да, тугу да харыстаабат бириэмэ.
Кыһын тыына биллэн эрэр. Алексей массыынатыттан тахсан киоскаттан хаһыат ылаары турар. Ол туран ыраахтан сиэттиһэн иһэр эдэр дьону көрдө. Сүрэҕэ тоҕо эрэ тыастаахтык тэбэн ылла. Кыраһыабай уоллаах кыыс чугаһаан кэлбиттэригэр оҕотун биллэ. Уола олох бэйэтин курдук. Дыраллан, үчүгэй эр бэрдэ буола охсубут дии.
– Коля… – симиктик ыҥыран көрдө.
Уола аҕатын биллэ быһыылаах. Чочумча саҥата суох көрөн баран, киэр хайыһан кыыһынаан туора хаамта. Алексей кэннилэриттэн одуулаан туран хаалла.
– Алеша! Хайа?! – массыынаттан Люба тахсан кэллэ.
Эр киһи дьахтары атыҥыраабыттыы тымныытык көрдө. Оо, уола барахсан сүүнэ киһи буолбут. Оттон кини манна, туора олоххо тугу гына сылдьар?..
Дьахтар анала
Куорат биир мааны тэрилтэтэ. Бэнидиэнньик сарсыарда планерка кэмигэр салайааччылара саҥа үлэһити билиһиннэрдэ.
– Алена Васильевна уопсай отделы салайыаҕа. Кини улууска үлэлээбит опыттаах киһи. Билсэн кэбиһиҥ, – диэн баран саҥа дьахтар диэки хайыспытыгар мустубут дьон бары тургутардыы көрө түстүлэр.
Лена соһуйан оскуола оҕотун курдук ойон туран дорооболосто. Тымныытык көрөн олорбут дьахталлар: “Кимиҥ, тугуҥ биллэр”, – диэбиттии харахтарын куоттаран кэбистилэр.
Мунньах кэнниттэн тойонноро саҥа үлэһити хаал диэн соруйда.
– Лена, ити тоҕо ойон турдуҥ? Отдел начальнига диэн улахан статустаах үлэһит. Дьахталлар сэнии көрбүттэрин өйдөөбөтүҥ дуо? Бэйэҕин тардынан, эрэллээхтик сылдьыахтааххын. Чэ, бар, үлэлээ. Проблема үөскээтэҕинэ миэхэ этээр.
Кабинетыгар киирэн кумааҕылары бэрийэ олордоҕуна сааһыгар сөбө суох оҥостубут-туттубут дьахтар киирэн кэллэ.
– Билсиһэн кэбиһиэх. Мин эн салайар отделыҥ үлэһитэбин. Раиса Прокопьевна диэммин. Бу тэрилтэҕэ үлэлээбитим ыраатта. Онон бу эйгэ иһин-таһын үчүгэйдик билэбин. Ити Роман Романович эн аймаҕыҥ дуо?
– Суох, суох.
– Леночка, маннык тэрилтэҕэ уулуссаттан кими да ылбаттар. Тем более отдел начальнигынан. Бу миэстэҕэ элбэх киһи баҕара сылдьыбыта ээ. Холобура, Калиста Ивановна. Кини кандидатскайын көмүскээбитэ, салайар үлэҕэ сылдьыбыт, билиилээх специалист. Билигин хаана хойунна ахан быһыылаах. Киниттэн сэрэнээр. Наһаа грамотнай, отоойкоҕо олордуон сөп.