– Мила, оттон тугу да гыммакка олорор дьикти баҕайы буолбатах дуо?
– Ким тугу да гыммакка олороруй? Хайа, мин олорорбор бириэмэм тиийбэт курдук. Мин олоҕум олус насыщеннай. Билигин уруһуйдуурга үөрэнэ сылдьабын. Москваҕа аатырар художник салонугар киирэн уруһуйдуубун. Сотору манна быыстапкабын тэрийиэм. Ураты буочардаах үһүбүн. Нэдиэлэ аайы саунаҕа, тренажер саалатыгар, косметолокка сылдьабын. Ким миигин 40-чалаах дьахтар диэҕэй? Хата, эн бэйэҕин олох көрүммэт буолбуккун. Түөрт оҕоҥ, оскуолаҥ кыһалҕата барыта сирэйгэр сурулла сылдьар. Сарсын мин маннааҕы косметологпар сылдьаар. Харчытыгар кыһаллыма. Батаххын эмиэ хайыахха эрэ наада.
Татьяна дьүөгэтигэр хонон-өрөөн, тото-хана кэпсэтэн-ипсэтэн баран курсун салҕаабыта. Дьиэтигэр баран уруккутун курдук үлэлии-хамсыы сылдьан, ардыгар Миланы санаан ылар. Хаһааҥҥыта эрэ уу тэстибэт дьүөгэлиилэр олохторо букатын атыныттан сөҕө саныыр. Мила билигин соҕуруу дойдуга олордоҕо. Ол дойду салгыныгар, ухханыгар сөп түбэһэн сырыттаҕа. Биирдэ эмит Сахатын сирин хатыламмат кэрэ айылҕатын, ураты мүөттээх салгынын саныыра дуу? Таня буоллаҕына, дойдутун дьэҥкир салгынын, түптэ буруотун туохха да атастаһыан баҕарбат.