– Тээтээ, эн дьонуҥ туһугар үлэлээбиккин, кэлин бу саамый сөпкө быһаарыммыккын дьонуҥ-сэргэҥ истэ-билэ олорор. Сураҕа эн сүөһүҥ, сылгыҥ суотугар уонна атыттартан эбии хомуйан туох эрэ табаарыстыба дуу, хомууна дуу диэни тэрийээри гыналлар үһү. Ону саҥа былаас толкуйдуу сылдьар дииллэр. Аны хантан эрэ Харытыанап диэн саҥа быраас кэлэн урут аҕабыыт олорбут дьиэтигэр балыыһа аһан торохуомалаах дьону эмтээн аххан эрэр дииллэр. Аны саамай үөрүүлээҕэ – манна түөрт кылаастаах оскуоланы тутарга, икки учуутал миэстэтин көрөргө диэн уураах кэлбит, – уол истибит сонунун кэпсии олордо.
– Хата, ити үчүгэй сонун эбит. Дьэ, оччоҕуна син сайдыах этибит. Саҥа былаас ол аата бэркэ үлэлиэх курдук эбит. Ити арахсыыны мин да туруулаһан туран ситиспитим диэххэ сөп. Маҥнай баайаҕалар олох истиэхтэрин да баҕарбат этилэрэ, миигин мунньахтарыгар ыҥыран баран боппуруоһу туруорбуппар сөбүлээбэтэхтэрэ, инньэ гынан оччолорго улаханнык кыыһыран турардаахпын. Оннук эмиэ баара, – оҕонньор ситиһиититтэн сылаанньыйбыт куолаһынан унаарытта, – хата ити Мөлөкүүрэппит тиһэҕэр тиэртэҕинэ Өймөкөөн дьэ Өймөкөөн буолан сайдыа турдаҕа. Эмиэ кинини былыр мин такайан үбүнэн көмөлөһөн үөрэттэрэн турардаахпын.
Дьэ, ити курдук Ньукулай Кырбаһааҥкын олус киэҥ далааһыннаахтык ылсан, ыраах хоту сир олохтоохторун наадалаах нуучча табаарынан, туттар сэбинэн, дьиэ-уот тэрилинэн өр сылларга хааччыйан абыраан олорбута. Биллэн туран, арыый да барыстаахтык эргинэн, булчуттарын, табаһыттарын кытта аахсан, үлэһиттэригэр сөп соҕус үчүгэй хамнаһы төлөөн, өссө сорохторун сэниэтик, байытан да олорор. Тоҕо диэтэххэ бэйэтин көрүнэр, туспа хаһаайыстыбалаах, сүөһүлээх-астаах, дьиэлээх-уоттаах дьон өссө улахан барыһы киллэрэллэр. Өйдөөх атыыһыт оннук дьону кытта эргинсэрэ, эттэрин, арыыларын, сүөһүлэрин, түүлээхтэрин барыстаахтык атыылаһан ылан киин сирдэринэн Дьокуускайынан, Охуотскайынан, Магадаанынан, ардыгар көмүс бириискэлэринэн үрдүк сыанаҕа батарар. Кини ырыынак сүрүн сокуонунан сирдэтинэр: «акаары баай кэччэгэй буолар» диэн. Оннук баайдар хаһаайыстыбаларыгар төттөрү охсууну ылалларын атыыһыт бэркэ диэн билэр. Маны таһынан кини бар дьонугар, сахатын норуотугар көмөлөһөн мэссэнээттээбитэ кэрэхсэбиллээх, кэскиллээх дьыаланан буоларын ис дууһатыттан өйдүүрэ.
Ньукулай Кырбаһааҥкын олоҕун устатыгар бэйэтин харчытыгар олорор нэһилиэгэр 2 таҥара дьиэтин, онтон ТарыІ Ґрэҕэр кыра чочуобунаны, 1915 сыллаахха Дьокуускай куоракка таас акылааттаах, икки мэндиэмэннээх, икки кылаастаах миссионерскэй оскуоланы туттарбыта. Орто Халыма таһыгар Сыраанда Сотуонугар мас таҥара дьиэтин, 1917 сыллаахха «Саха Омук» диэн култуурунай-сырдатар уопсастыбаҕа бибилэтиэкэ дьиэтин туттарбыта. Баайаҕаҕа, Байаҕантай улууһун кулубатынан Дьаакып Сэрэмээтинньикэп диэн киһи олорор кэмин устатыгар кыҥаттарыгар Уолбаҕа Владимирскай диэн ааттаах обургу чочуобунаны эмиэ бэйэтин харчытынан туттарбыта. 1891 сыллаахха Ньукулай КырбаһааІкын И.Д. Черскэй экспэдииссийэтэ Орто Халымаҕа диэри айанныырыгар харчынан, көлө атынан көмөлөспүтэ. Бу маны таһынан кини, олорор нэһилиэгин, оннооҕор улууһун туора нэһилиэктэриттэн адьас быстарбыт билэр да, билбэт да дьоно кэлэн дьоҕус суумалаах харчыны иэс көрдөөтөхтөрүнэ хаһан да аккаастаабат. Онтон ол харчыны иэс салҕатан баран, хас эмэ сылы мэлдьи кыайан төлөөбөтөх дьонтон иэстэһэ, сууттаһа сылдьыбат үгэстээҕэ.
КырбаһааІкын Баайаҕа маҥнайгы церковнай-приходскуой оскуолатыгар кыра да буоллар, эмиэ харчынан хаста да көмөлөһө сылдьыбыта. Ол туһунан махтал суруктар бааллар:
«Епархиальное начальство выражает благодарность почетному инородцу Оймяконо-Борогонского наслега Баягантайского улуса Н.О. Кривошапкину и прихожанам, пожертвованные ими на нужды Оймяконской Вознесенской церкви по 1000 рублей каждая сторона (итого 2000 руб.)». «Притч и прихожане Чичимахской Николаевский церкви приносят сугубейшую и искреннюю благодарность почетному инородцу Баягантайского улуса Оймяконо-Борогонского наслега Н.О. Кривошапкину за принесенную им в дар сей церкви выносную плащаницу с предстоящими на малиновом бархате, стоимостью в 150 руб.