Ис. дол. псаломщика Николай Явловский, Церковный староста Терентий Малышев», 1914 г.
«На Оймяконе Вознесенская церква построена на средства почетного инородца Н.О. Кривошапкина, местожительство его «Тарыҥ Үрэх» «… школа построена в 1898 году, попечитель школы церковный староста И.П. Готовцев, в ней содержатся 4 мальчика у батюшки на средства Н.О. Кривошапкина…»
«Инородец Оймяконо-Борогонского наслега Н.О. Кривошапкин пожертвовал в пользу Якутской второклассной учительской школы 10 тысяч рублей с тем, чтобы на проценты с этого капитала выдавались стипендии учащимся названной школы поровну из инородцев Оймяконо-Борогонского и Баягантайского улусов. Им же сделаны пожертвования 2000 рублей на Ольгинский приют, 600 рублей обществу глухонемых и 500 рублей в погашение долга якутского музея».
Онон Ньукулай оҕонньор аан бастакы наҕараадатын И.Д. Черскай көмөтүнэн ылбыт буоллаҕына атыттарын хаһан, туох иһин ылаттаабытай?!
1905 с. Россия Японияны кытта сэриитэ буолбута. Онно ыраахтааҕы харчы хомуйарын истэн, Ньукулай оҕонньор кэргэнэ Даарыйалыын холбоон 200 солкуобайы хомуйан ыраахтааҕы аатыгар ыыппыттар. Ол иһин ыраахтааҕы кинини Св. Анна уордьанынан наҕараадалаабыта. Ону туттара соҕурууттан, Иркутскайынан эргийэн, Өймөкөөҥҥө таба сыарҕатынан ыраахтааҕы наарыһынайа анаан кэлбит. Дьон кэпсииринэн, ол наарыһынай тимиринэн үүйэ туттарыылаах сундуукка бэлэх бөҕөнү ыга симэн аҕалбыт. Онно араас өҥнөөх хаарыс солко, баархат таҥастар, үрүҥ көмүс чэй иһэр уонна эбиэттиир таас сэрбиистэр, аата сурулла сылдьар кыһыл көмүс чаһы, кэргэнигэр улахан түү саал былаат, өссө аата сурулла сылдьар ыраахтааҕы хотойо эҥин бааллара үһү. Олору кытта французскай духуу баара эбитэ үһү.
Н.О. Кырбаһааҥкын өссө үһүс наҕараадатын туһунан маннык суруйан тураллар: «В начале 1913 года газета «Якутская окраина» опубликовала несколько сообщений о награжденных якутянах. Из ее страниц можно узнать, что высочайше пожалованы инородцу Оймяконо-Борогонского наслега Баягантайского улуса Якутского округа Николаю Кривошапкину орден Св. Станислава 3-й степени» диэн.
Баай Кырбаһааҥкын олоххо ситиһиитин, дьоҥҥо амарах сыһыанын, үтүө майгытын өссө биир олугунан итэҕэл буолар. Ону кини хаһан иҥэриммитин бэйэтэ да өйдөөбөт. Баҕар, ол төрөппүттэриттэн бэриллибитэ буолуо. Аҕата Уоһук бэрт дьиппэ, тылыгар турумтуо, туруу үлэһит буолан балайда сэниэтик олорбута, дьоҥҥо-сэргэҕэ улахан аптарытыаттааҕа. Кини үс уол оҕону төрөтөн, Охонооһу, Уйбааны уонна Ньукулайы дьон оҥортоон, сиппиттэрин-хоппуттарын кэннэ сүөһүтүттэн-аһыттан, ол эбэтэр баайыттан-дуолуттан өлүүлээн тус-туспа ыыталаабыта. Ол эбэтэр кини төрөппүт оҕотугар сыһыанын, киһилии сиэр-майгы, эппиэтинэс, баайы-дуолу сөпкө туһаныы суолтатын кинилэргэ сыһыардаҕа. Онто былыргы дьыл мындааларыттан, өбүгэлэр үгэстэриттэн, иитиллибит итэҕэллэриттэн үөскээн, сайдан кэллэҕэ. Онно этиллэринэн «кырдьаҕастан алгыһын ыл, эдэртэн эйэтин ыл», «алгыс баһа сыалаах, кырыыс баһа хааннаах», «киһи киэнигэр ымсыырыма, бэйэҥ киэниттэн матыаҥ», «таҥара уон оччону биэриэҕэ», «оһол-төрүөт төрдө обот-соллоҥ», «көҥүлү күндүтүк санаа, ыйааҕы ытыктыыр буол» о.д.а. Итинник өс хоһооннорун кини оҕо, эдэр сылдьан истибитин дууһатыгар иҥэриммитэ чахчы. Онон кэлин таһаҕаска сылдьан айанныырыгар сиэри-туому олус тутуһара, алгыстыырыгар тыла-өһө ис-иһиттэн бэйэтэ ситимнэһэн тахсан иһэр курдуга. Өссө кэлин ыраах улуустарынан, Дьокуускайынан, араас киин сирдэринэн айанныы сылдьан өрүү таҥара дьиэлэригэр сылдьан ааһара. Онтон ыла күҥҥэ үстэ Үрдүк Айыыларга үҥэр-сүктэр, кириэстэнэр үгэстэммитэ. Онуоха үксүгэр: «Айыы Тойон таҥарам, абыраа, уолгун көрө-истэ сырыт», «Үрдүк Айыым миигин уонна бырааттарбын Охонооһойу, Уйбааны аһын, харыһый», «Аан Айыы Тойонум, баайгыттан-дуолгуттан өлүүлээ, күн-ый буол!» дэтэлээн баран былаҕастабыы охсунара. Ол курдук өрүү эрэли, итэҕэли инники тутара ситиһиини аҕалар курдуга, кинини үтүө санааҕа, үөрэҕи ытыктыырга, сырдыгы аҕаларга такайбыта.
Өймөкөөн сиригэр-уотугар сандал саас эмиэ эргийэн, эргэнэ хара тыа күөх киистэнэн киэркэйдэ. Ырааҕынан-чугаһынан эргийэ-көтө сылдьан кэҕэ кыыл «кук-куук», «кук-куук» диэн дьоҕус бөһүөлэк дьонун өссө эбии сэргэхситэр, ол эбэтэр «күөх сайын эргилиннэ, уйгу-быйаҥ салалынна, көй салгыҥҥа көрүлээҥ, оттооҥ-мастааҥ, олоххутун оҥостуҥ» диир быһыыта буоллаҕа. Олохтоохтор дьиэлэриттэн киирэ-тахса кэҕэ саҥатын иһиттэхтэринэ сүргэлэрэ көтөҕүллэр, кырыа кыһыны этэҥҥэ туораатыбыт, сүөһүбүт-аспыт туруга син дэһэллэр. Күнүһүн балаҕаннарын, хотоннорун аанын аһаннар салгылаталлар.