Бэҕэһээ киэһэ утуйаары сытан ийэлээх-аҕата Гулялары кэпсэтэллэрин истибитэ:
– Хаастары идэһэ иннинэ туттуохха баар этэ. Наар кэнсиэрбэнэн олорор сүрэ бэрт.
– Эрэйдээхтэри, киһи аһынар да, хайыаххыный, айылҕалара буоллаҕа, – ийэтэ өрө тыыммыта.
Айсен хаастарын олус аһына-аһыйа санаабыта. Хайдах гынан быыһыырын толкуйдаан бөлүүн аанньа утуйбата, ордук дьонум эрдэ туран өлөрөн кэбиһиэхтэрэ диэн куттанара баһыйан хараҕын симмэтэ. Уолчаан дьонун уһугуннарымаары атаҕын төбөтүгэр үктэнэн сарсыарда эрдэ дьиэтин аанын ыга сабан тахсан барда. Аан тыаһын истэн Гулялар хаһыытаһа түстүлэр. Айсен хас биирдиилэрин ыксары кууста, уунан бычылыйбыт хараҕын туора-маары соттоот, бэҕэһээ киэһэ сиэбигэр уктубут килиэбин ылан биэртэлээтэ.
– Гулялар, эһигини идэһэ оҥостоору гыналлар. Мин эһигини быыһыам. Эһиги аны манна хаһан да кэлимэҥ. Ыраах-ыраах мантан барыҥ. «Күһүн хаастар соҕуруу итии дойдуга көтөллөр» диэн учууталбыт кэпсээбитэ. Миигин өйдөөтүгүт дуо? – диэн ыйытарын быыһыгар хаастарын хардары-таары имэрийтэлии олорбута. – Чэ, барыаҕыҥ, – диэт, уол олбуортан тахсаат, тыа диэки суолун салайа туппута. Кини кэннин да хайыһан көрбөтөр, хаастара моонньуларын уһатыахтарынан уһатан баран субуруһан иһэллэрин сүрэҕинэн сэрэйэрэ. Айсен Гуляларын ханна илдьэрин билбэт этэ, хаһан да сылдьыбатах уулаах алаастарыгар илдьэн хааллартаан кэбиһэр санаалааҕа. Уулаах да буолан. Уу хайыы-үйэ тоҥмут, бэҕэһээ муус үрдүнэн хааман хантаарыҥнаһаллара. Хата, кинилэри уйара бэрт ээ, биһигини уйбата чуолкай. Өр-өтөр буолбатахтара, алаастарыгар тиийэн кэлбиттэрэ. Хаастар, ортотугар көлүччэлээх алааска киирээт, ууга ыксаабыттара. Итини туһанан Гуляларын хаалларан, Айсен тыа быыһынан төттөрү ыстаммыта, «миигин сүтэрдэхтэринэ мунан, соҕуруу дойдуга көтүөхтэрэ» диэн санаатын олоххо киллэрбититтэн үөрэ санаабыта.
Сарсыардааҥҥы аһылыкка дьоно уолтан Гулялары ыйыппыттара да, эппиэт ылбатахтара, ыгдах эрэ гынан кэбиспитэ. Төрөппүттэрэ, хаастарын сүтэрэн, суохтаабыттара, киирбит-тахсыбыт дьонтон ыйыталаһан көрбүттэрэ да, ким да көрбөтөх аатырбыта.
Айсен, хаастарым аны тиийэн кэлиэхтэрэ диэн куттанан, киэһэни долгуйа күүппүтэ. Сэрэйбитин курдук, киэһэ хараҥарыыта Гулялар ала-чуо киниэхэ өрө тилигирэһэн тиийэн кэлбиттэрэ. Уол, төрдүөннэрин холбуу кууһа-кууһа, төрөппүттэрин диэки уу-хаар баспыт хараҕынан ааттаһардыы көрбүтэ:
– Гулялары идэһэ гынымаҥ, биэриэм суоҕа. Паапа, «эйиэхэ анаан аҕаллым» диэбитиҥ дии, – уол ытамньыйбыт куолаһынан ботугураабыта.
Ийэлээх аҕата соһуйбуттуу балачча өр саҥаларыттан матан одуулаһан турбахтаабыттара, уолларын туругун өйдөөн бэйэ-бэйэлэрин көрсөн кэбиспиттэрэ. Ийэтэ саҥата суох кэлэн уолун санныттан кууһан туран кулгааҕар сибигинэйбитэ:
– Гулялар баҕар кыстаатыннар даҕаны, кинилэри идэһэ оҥостон төһөнү эбинээри…
Айсен хайыы-үйэҕэ үөрэн чаҕылыҥнас буолбут харахтарынан ийэтин махтаммыттыы көрбүтэ эрээри, өссө да мунаарар боппуруоһун аҕатыттан ыйыппыта: