– Оҕурсу үүнүөҕэ, кылаабынайа, отун быспатаххын.
– Сибэкки сиэмэтин бүгүн ыстыбыт, оскуола аһыллыытыгар ситиэҕэ.
– Ынахтар, хата, ырааппатахтар, хомуйан ыабыппыт.
– Ийэбит мөҥүө суоҕа.
– Тугу аһыыгын, тугу аһыыгын? – уолаттар бырааттарын оронуттан сулбу ойутан туруоран, остуолга дэллэритэн аҕалан, иннигэр иһит тарпытынан бардылар. Миитээски түүлүн убайдарыгар кэпсии сатаата да, кини кэпсээнин ситэ истэ барбакка, сибиинньэлэрин, кууруссаларын аһата бардылар.
Убайдарыгар улахан болҕомтону ылан дуоһуйа астыммыт Миитээски бүгүҥҥү мүччүргэннээх сырыылара түүл буолбутуттан эмиэ да хомойо, эмиэ да үөрэ санаата.