21 Онтон Сириянан, Киликиянан сылдьыбытым. 22 Христианнар Иудеятааҕы церковтара миигин сирэй билэ иликтэрэ, 23 арай хаһан эрэ кинилэри сойуолаһааччы киһи билигин урут имири эһэ сатаабыт итэҕэлин тарҕатар сураҕын истэллэрэ эрэ. 24 Онон мин туспуттан Таҥараны айхаллыыллара.
2
Атын Апостоллар Павелы билиниилэрэ
1 Онтон уон түөрт сыл буолан баран Варнаваны кытта Иерусалимҥа хат тиийэ сылдьыбытым, Тити эмиэ илдьибитим. 2 Онно мин Таҥара ыйыытынан барбытым. Күрэххэ халтайга сүүрбүт биитэр сүүрэр буолумаары, церковь тутаах дьонун сирэй көрсөн, атын норуоттарга иһитиннэрэр Евангелиебын быһааран биэрбитим. 3 Кинилэр бэл миигин кытта сылдьар Тити, грек киһитин, быһыллыы сиэрин-туомун толорорго күһэйэ сатаабатахтара. 4 Оттон сымыйа бырааттар тустарынан этэр буоллахха (кинилэр Христос Иисус биһиэхэ биэрбит көҥүлүн уоран көрөн, кулут олоҕор төнүннэрээри, биһиги кэккэбитигэр сирэйдэрин саптан киирбиттэр), 5 эһиги Евангелие кырдьыгын ыһыктыбаккыт туһугар, биһиги кинилэргэ биир да мүнүүтэҕэ иннибитин биэрбэтэхпит. 6 Биллэр-көстөр дьон урут ким-туох буола сылдьыбыттарыгар мин суолта биэрбэппин, Таҥара киһини киминэн-тугунан көрөн араарбат. Бас-көс дьон эмиэ миигиттэн атын тугу да ирдээбэтэхтэрэ; ирдиэхтээҕэр 7 иудейдарга Евангелиены иһитиннэрэр сорук Петрга сүктэриллибитин курдук, ону атын норуоттарга иһитиннэрэр сорук миэхэ итэҕэйиллибитин көрөн 8 (Петрга иудейдар ортолоругар Апостол сулууспатын толороругар Көмөлөһөөччү мин омуктарга ону толорорбор көмөлөһөрө), 9 миэхэ Апостол буолар алгыстаах быраап бэриллибитин билиммиттэрэ. Онон биллэр-көстөр тутаах дьон – Иаков, Кифа, Иоанн буоланнар – биһиги атын омукка, оттон кинилэр иудейдарга барар бэлиэлэригэр Варнава биһиккигэ доҕордуу илиилэрин ууммуттара. 10 Кинилэр биһигиттэн биири эрэ – дьадаҥылары умнубат буолуҥ диэн – көрдөспүттэрэ, мин ону өрүү кыһаллан туран толорорго дьулуһабын.
Павел Антиохияҕа Петры сэмэлиир
11 Онтон мин Петры, Антиохияҕа кэлэ сылдьан сэмэлэнэргэ төрүөт биэрэрин көрөммүн, аһаҕастык утарбытым. 12 Иаков ыыппыт дьоно кэлэ иликтэринэ, кини омук христианнарын кытта бииргэ аһыыра, оттон Иаков дьоно кэлэллэрин кытта, иудейдартан сэрэнэн, кистэнэр, омуктартан тэйэ туттар буолбута. 13 Атын иудейдар эмиэ кинилиин сирэй көрбөх быһыыламмыттара, ону бэл Варнава батыспыта. 14 Көнө суолтан – Евангелие кырдьыгыттан – туоруулларын көрөн, мин, бары истэн турдахтарына, Кифаҕа: «Эн еврей эрээригин, иудейдартан атыннык, омук дьонун курдук, олорор буоллаххына, омук дьонун тоҕо иудей үгэһин тутуһарга күһэйэҕин?» – диэбитим.
Иудейдар да, омуктар да итэҕэллэринэн быыһаналлар
15 Биһиги «туора омук аньыылаах-харалаах дьоно» буолбатахпыт, иудей буолан төрөөбүппүт. 16 Ол эрээри, киһи Сокуону тутуһан буолбакка, Иисус Христоһу итэҕэйэн эрэ быыһанарын билэн, биһиги эмиэ, Сокуону тутуһан буолбакка, Христоска итэҕэлбитинэн буруйбутуттан-аньыыбытыттан быыһанаары, Христос Иисуһу итэҕэйбиппит. Суруйууларга этиллэрин курдук, «Сокуон ирдэбиллэрин тутуһан биир да киһи быыһаныа суоҕа». 17 Оттон Христос өҥөтүнэн буруйтан быыһанарга дьулуһа сылдьан, биһиги, иудейдар, бэйэбит эмиэ аньыылаах буолан хааллахпытына, оччоҕо ама Христос аньыыга-хараҕа сулууспалааччы буолар үһү дуо? 18 Ким да инньэ диэн сатаммат. Оттон өскөтүн урут үрэйбиппин хат тута сатаатахпына, мин онон Сокуону кэспиппин эрэ көрдөрүөҕүм. 19 Миигин Сокуон өлөрөн, мин аны мантан инньэ Таҥара туһугар олороору, Сокуонтан босхоломмутум. Мин Христоһу кытта бииргэ кириэскэ тиириллибитим, 20 онон аны мин суохпун, арай мин сүрэхпэр Христос баар; оттон бу сирдээҕи олохпун миигин таптаабыт, мин туспар толук буолбут Таҥара Уолугар итэҕэлбинэн олоробун. 21 Таҥара үтүө бэлэҕин мин киэр аспаппын; оттон өскөтүн киһи буруйуттан-аньыытыттан Сокуону тутуһан быыһанар буоллаҕына, ол аата Христос суолтата суохха өлбүт буолан тахсар.