. И тут дети отцу своему не могли ничего ответу дати. И един сын поиде к омету зело печален, где царевич Соломон сидит, и узре царевича Соломона. И рече ему Соломон: «Почто, брате, скорбиши и о чем вельми сетуеши?». И крестьянской сын рече ему: «Брате, скорблю о сем: отец наш раздели нам, сынам своим, имение свое мудростию, сребро и злато, кони и скотину и хлеб всякий; и рек нам мудростию велию, и повеле нам мудрым своим речам ответ дати, которому что, кто ответ даст, и нам не могущим ответствовати против его речей». И рече Соломон: «Брате, не мудрость отца вашего сия речь, но глупость. Аз млад, леты мал, сию его мудрость всю разумею и имам ему ответ дати. Можете ли вы меня большим братом имети?». И рече крестьянской сын: Государь, младое детище, помилуй нас трех братов, дай ответ отцу нашему и раздели нам житие отца нашего и вся его в дому нашем, имамы тя болшаго брата имети». И увиде крестьянин детище младое и прииде к нему и вопроси его: «Скажи ми, чадо, откуду еси пришел, и коего града, и кто есть отец твой и мати, и почто семо обитавши зде, и живы ли у тебя отец и мати?». И рече царевич Соломон крестьянину. «Аз есмь града божия Иерусалима, отца праведна; отец же мой певец, а мати моя блудница. Отец мой сидит в воде по горло, просит пити, а сам напитися не может». И крестьянин удивися Соломоновой премудрости. «А имя мое наречюся Разумник». И назва его крестьянин сыном четвертым. И рад бысть ему вельми. И вопроси царевич Соломон крестьянина и рече: «Что, отче, чадом своим рек, им сия мудрыя словеса о животе своем, и им немогущим отповедати тебе, аз сию твою мудрость могу отповедати тебе». И рече Соломон крестьянским сыном: «Кинте жребии, кому вам будет злато и сребро, и кому будет скотина и кони, и кому будет хлеб всякий». И кинуша крестьянский дети, три брата, жребии: большему достася хлеб, среднему достася злато и сребро, меншему достася кони и скотина. И бысть вечер сущу, и рече Соломон крестьянским сыном: «Послушайте, братия мои! Отец ваш и мати умрут, и после их будете вы в разнем чину: больший брат будет в отеческом чину — крестьянином и сщаслив будет, средний брат будет купец, менший брат будет воин, приимет у царя болярство; вси вы будете богатии». И рече крестьянин: «Скажи мне, отроча, есть у меня три дщери девицы, кому которая дщерь моя будет жена?». И введе его в дом свой. И рече Соломон крестьянину: «Большая дщерь будет попадья, вторая будет гостиная жена, третья будет боярыня». И рече крестьянин Соломону: «Вижю тя, отроча, вельми разумна и мудрость во устех твоих. Скажи мне ответ словесем моим, что есть отчего злато и сребро сотворено?» И рече Соломон: «Злато сотворено от царских очей. Всему богатству царь — злато, украшение всякаго человека и честь, а сребро от неправды и мзда есть: единаго человека богатит, а другаго разоряет, и разбой и татьбу подымает, и человека веселит, а душу его во ад сводит и в муку вечную». И крестьянин зело подивися скорому и мудрому его ответу и бысть во ужасе велицем. И потом царевич Соломон повеле злато и сребро отдать сыну. И повеле отцу сына наказати вельми, чтобы держал имение свое правдою, а не лихоимством. И паки рече крестьянин Соломону: «Скажи мне, чадо мое, богом данное, вторый ответ: с которым конем человек говорит, и которому коню кони покоряются, и в которую скотину человек входит и исходит, и в которой скотине человек опочивает?». И рече царевич Соломон: «Человек говорит с конем возатой всякое число, понеже работает на нем или ино что творит; а поклоняются кони конем — ослятю, потому что он всем коням глава. А в скотину человек жив входит и паки исходит, то есть скот овен: его люди всякия заколают, мясо снедают, а в кожю весь облачается — и главу, и руце, и нозе; потом человек входит и паки исходит, когда на опачин разоблачится; и потом человек опочивает на скоти крылатой: гуси человецы убивают, мясо снедают, а перья утеребя, перины делают и на них опочивают». И потом царевич Соломон повеле отцу кони и скотину всю сыну меншему отдать. И повеле ему сына своего наказати, чтобы жил не гордостию и не величанием, чтобы милость имел ко всем православным християном. И тут крестьянин нача от страха трепетати я не мог сидети. И потом востал крестьянин з женою и з детми противу его, видя отрока вельми мудра зело, и нача его о третьем ответе вопрошати: «Скажи ми, чадо мое, богом данное, третий ответ: что щету в моем всяком хлебе зерен, что именуется тело Христово, и без котораго хлеба человек не умирает?». И рече царевич Соломон: «Счет хлебу твоему — у человека зубы во рте: сколко человек зубами откусит хлеба, сколько было зерен в куске, постольку и пожует. Человек мало укусит — мало пожует, много откусит — много и жует, только без хлебания. А тело именуется Христово — хлеб, пироя, пшеница, когда иерей божию литоргию служит над хлебы печеными и причащаются им, и действуют, и явится тело Христово, и без него никоторой человек не умрет верный». И потом повеле хлебное имение отдати большему сыну. И повеле его наказати, чтобы жил смирным образом, а не воровством, и не татьбою, и не клеветником, жил бы верою и правдою и милостыню бы творил почасту к нищим. И потом крестьянин паде на ногу царевичю Соломону з женою и з детми и поставиша его управителя в дому своем. И бысть радость велия в дому крестьянском о царевиче Соломоне. И вопроси крестьянин Соломона, как ево имя нарицаемо. И рече Соломон: «Имя мое Разумник». И нача царевич Соломон жити в дому у крестьянина. И потом поживе у крестьянина в дому три года. И нача царевич Соломон суды творити, крестьянских детей тоя веси множество собирати; и сам царем у них бысть, а иных детей в воеводы поставляюща, а иных в судии, а иных служивыми людми, а иных приставы и служебники. И потом возгради себе град в древех лозиях вельми мудро. И посылаше тоя веси многия жители началники и поместники; и узревше же людие Соломонову мудрость, како млад и мудр вельми, и како град сотвори, и во граде началники постави чином по человеку зря, и удивишися зело, яко во всей вселенней такова отрока не обретеся. И начата приводит к нему детей своих в научение витежскому делу. И собрашися к нему всяких чиной дети многое множество. И потом поживе крестьянин при Соломоне царевиче пять лет в дому своём и умре и з женою своею. И дети его начаша жити после отца своего и матери благочинно. И Соломон царевич у тех крестьянских детей черный работы не работал и работать не хощет. И рече Соломон крестьянским детем: «Братия моя малая, послушайте мене: отец мой, богом данный, и мати наша умре и повеле мне вас не покинути. И аз млад, ныне всего мне 9 лет от рождения своего, и мне вашей крестьянской работы работать невмочь. И аз стану вам скотину пасти, сила моя и разум таков». И рекоша ему братия его вси: «Государь наш братец Разумник, хотя бы ты был великаго возрасти, дватцети лет или больше, мы бы на тебе работы не спрашивали, а ныне ты, государь, леты млад, да разум твой паче всех старых превзыде. Мы тебя не имамы брата, но имамы паче отца рождшаго: буди нам в дому управитель и учитель, а мы ради тебя во всем слушать». И рече им Соломон: «Мир вам, братие, да будет с вами». Божественное писание пишет: «Аще кто в дому своем не делает, той и не яст хлеб. Ленивым горше в дому своем болнаго человека: больный лежит, да не яст, а ленивый лежит, да яст». И потом взя кони и скотину ипогна в поле. И бысть вещь дивная, яко кони и скотий вси послушаху его, и вси повеления его творяху, и всих в страх вложи. И царевич Соломон нача скотину и кони пасти день, а в вечеру судит суд и воинскому делу со отроки игры творит. И бысть сему три года творяща Соломону по вся дни. О т с е л е да в о з в р а т и м с я на п р е д л е ж а щ е е. О Давиде царе. И Давиду царю приехавшу из веси тоя, и вшедшу в полату к царице, и узревше Кузнецова сына игры со отроки творяща: постави стул, и повеле отроком доспети молоты древянищя, и нача на стуле ковати, яко кузнец. И виде царь Давид, смутися и нача помышляти, яко не Соломон сей отрок, сын мой. И наипаче в пост вниде, и сетуя. И во едину нощь моляся царь Давид господу богу и вопия псалом сей: «Господи, услыши молитву мою, и вопль мой к тебе да приидет.» — весь до конца. И бысть ему молящуся, и прииде ему с небеси глас: «Давиде, Давиде царю, что вопиеши ко мне?». И рече царь Давид: «Господи, яко благоволил еси плод чрева моего, и роди мне жена чада от семени моего; и бысть вельми премудр детище мое, и внезапу что есть сие ему бысть? Сие отроча бысть дряхло, и испусти ум свой царский и приложися ковачю». И рече ему ангел господень: «Давиде, царю Давиде, не твой есть сей сын, но градскаго кузнеца именем Флиалды, а отрок твой, сын царевич Соломон, в замории в Египетской веси у крестьянина живет, кони и скотину пасет". И потом ангел господен невидим бысть. И бысть утро, призва царь Давид боярина своего Ичькилу и рече ему: "Скажи мне боярин верный, чие есть сие отроча, царевич наречеся Соломон, где взял еси его? И куды моего сына Соломона изтерял? Аще мне сего не повеси правду, то будеши сего часу моим мечем поражен". Боярин же во ужасе велицем бысть и рече ему: "Великий царю Давиде, аз, раб твой, согреших пред тобою, великим царем; достоин еси сего: по глаголу твоему смертию казнен быти". И пал мертв на землю. И рече ему царь Давид: "Восстани, буди жив от сего часу, токмо поведай мне истину всю". И сказа ему боярин вся приключившаяся подробну: как Соломону от матери своея, Вирсавии царицы, повелела она погубити сына своего, и стращала ево смер