ет». И рече царевич Соломон царевым послам: «Послы, господа царевы, послушайте и скажите о ответе моем царю Давиду, отцу моему: «Во граде Иерусалиме стоит древо златолиственное — то град Иерусалим. И верх у него сияет паче солнца — то есть царь, праведным судом сияет. А что у того древа по сучьям камения самоцветное — то есть ево бояря верныя. А что у кореня пшеница белоярая — то есть градския жители. А что есть кругом града зернами посеяна рожь силна — то есть православное християнство. И скажите, бояря, царю Давиду, отцу моему, велию мою речь от меня, что сын твой, царевич Соломон, жив, а в третие лето будет пред тобою и явитца тебе в тайне. А теперя аз к нему не еду, понеже не убо бе час мой прииде».И послы прощение получиша с царевичем Соломоном, и поехаша послы ко граду Иерусалиму ко царю Давиду. И как царевич Соломон отпусти с честию послов, и погна Соломон царевич кони и скотину ко двору крестьянскому. И призва крестьянских детей, и поучив их всякой премудрости, и утвердив их крепко, чтобы жили вместе совокупленно и с сестрами, и не повеле им досвоего указу расходитися. И нача срежатися на отъезд. Они же рекоша ему с плачем: «Куды, братец наш, отъезжаешь от нас и покидаешь нас?». — «Токмо бог весть путь мой, и аз опять возвращуся к вам». И велел себе оседлати добраго коня. И сам всех целовал, и прощение учини, и сяде на конь, и поеде в Индию богатую ко царю Пору. И как приеде во град Индию богатую ко царю Пору и ста пред ним. И царь Пор вопроси его о роде, и о отечестве, и имя ево. И царевич Соломон ему сказал: «Аз-де с теплаго моря крестьянския веси сын дворянский, а имя мое Разумник, и приехал аз послужити тебе во дворе великому царю». И царь Пор, видя красоту лица его и мудрость, и повеле ему быти у царицы своей в кравчих. И бысть тако. И царица видя красоту лица его и мудрость, и нача его любити, и разжизатися на него. И в некое время бысть Соломону пред царицею, и царица рече Соломону безстыдно: «Хощу аз, милый мой сердце Разумник, итти за тебя в жену и хощу любовь с тобою сотворити». Он же к ней рече: «Буди воля твоя». И совокупней с царицею Соломон и жил многожды с нею. И даде ему царица перстень царев златый з драгим каменем. И еще ему даде три камения царския самоцветный, нощию, аки свещи, горят, а в день, аки огнь, горят. И взя у царицы казны царския злата, и сребра, и всяких драгих вещей многое множество." И ушел от Пора царя на теплое море кораблем, а царице повеле себя ожидати вскоре. А жил царевич Соломон во Индии у царя Пора в кравчих у царицы три года. И приеде кораблем ко граду Иерусалиму и ста под городом. И некоему цареву слуге повеле возвестити про себя, что приехал-де из-за мори гость некий кораблем индийский веси богатыя, «имя мое Разумник, и пожаловал бы царь Давид меня, поставить велел пред себя. Аз ему великия дары принесу и челом ему ударю». И слуга царев ко царю Давиду прииде и о царевиче Соломоне вся извести. И царь Давид повеле его пред собою поставити. И прииде Соломон пред царя Давида, и поклонися ему честно, и ста пред ним, и рече ему царь Давид: «Откуду еси ты, отроча; и который веси гость, и како твое имя?». И рече Соломон: «Аз, царю, детище индийския веси, а имя мое Разумник наречюся, прибрел в твою градскую державу товары своя продати, а здешния закупити». И царь Давид повеле ему во своей державе торговати и приказал ему к себе к столу быти. И прииде во уши царице Вирсавии о нем, что гость из-за мория приеха кораблем с товары драгими и со узорочьи дивными. И царица Вирсавия посла на корабль своих сенных боярынь и девиц товаров узорочьих у гостя смотрети. И как приидоша сенныя боярыни и девицы к Соломону царевичю на корабль, и царевич Соломон показа боярыням сенным и девицам три каменя самоцветныя, каким они подобием. И боярыни сенныя и девицы приидоша ко царице и сказаша ей про камени, что есть у него и всяких драгих вещей на корабле, а три каменя самоцветныя во дни, аки огнь, горят, а в нощи, как свещи, светят». И мы, государыни, зело о сем удивилисятем каменем, а у царя нашего таких каменей нет». И царица Вирсавия повелея его пред себя поставити. Соломон же посланным сказа, что-де иду ко царю Давиду к столу. И взя царевич Соломон великия дары, и пойде к царю Давиду к столу, и поднесе царю великия дары. И царь его Давид зело пожаловал и честь ему воздаде велию. И как стол отъиде, и царь Давид отпусти Соломона с честию. Соломон же царевич прииде ко царице Вирсавии, к матери своей, в полату и поклонися ей. И царица Вирсавия спросила его, котораго он города и веси и как ему имя. И рече Соломон: «Аз, государыни благородная царица Вирсавия, Индии богатыя веси из-за мория, а имя мое наречюся Разумник, прибрел, государыни, вашея державы во град Иерусалим с товаришком своим, чтобы свои товары продати, и здешния бы товары закупити». И рече ему царица: «Гость заморский, сказывали мне боярыни мои сенныя, есть-де у тебя камения самоцветное, в день, аки огнь, горят, а в нощи, аки свещи, светят». И рече Соломон: «Государыни царица Вирсавия, есть у меня три каменя: един камень мне поднести царю Давиду, а другий камень отдать за ним в приданы, а третий камень аз буду держать про себя на корабле для свету в нощи, вместо свещи». И рече царица: «Гость заморянин, продай мне един камень». И рече Соломон: «Продам, аще кто со мною сию нощь переспит, тому и камень отдам». И положи пред царицею един камень, и тот камень всю освети полату царицыну, и немощно на него человеку зрети, на тот камень. И царица рече Соломону гостю: «Ляжи ты со мною в нощь сию». И взя его за руку и поведе его ко одру своему царскому. И царевич Соломон убояся суда божия, и ста пред одром царским, и изумевся, и стал думать, како бы матери своей изобличитися безгрешно. И рече царица Соломону: «Гость заморянин, пойди смело ко одру моему! Чего боишися? Или тя скупость объяла каменя ради, что нейдешь семо? Видишь, никого в полате моей несть». И рече Соломон: «Государыни, благородная царица Вирсавия! Ты мя зовеши на постелю свою, да одеяло царское страшит мя». И царица ухватила его за шею, и поцеловала его, и положила его с собою спати на одре своем. И взя царица руку его, и положи на перси своя, и рече ему: «Гость заморенин, что сие?». И рече ей Соломон: «Аз сим воскормлен, то мое есть сахарное кушание». И царица подвигнула руку его по белому своему чреву и рече: «Гость заморенин, что сие?». И рече Соломон: «То есть мои камение и златый терем, в том еси тереме аз опочивал». И царица подвигнула Соломонову руку под свое срамо и рече: «Гость заморенин, что сие?». И рече Соломон: «То есть врата моего терема, оттуду аз изыде, и свет божий сей узрел, и по земли пошел». И царица изжидала времени похотной or него. «Како ты премудр еси и скуп, и не хощеши воли моея сотворити, каменя ради». И вскочи Соломон с одра ея, и паде на землю, аки мертв, лежа на земли на долг час. Царица же зря на него, ужасеся вельми. Соломон же воста от земли, вопия горко со слезами: «О госпоже мати моя, благородная царица Вирсавия! Возри на мя любезно, на чадо свое! Ты, мне родившая, мати истиннаго своего сына. Аз есмь не купец заморенин, но сын твой Соломон царевич, которой послан был тобою на погубление з боярином Ичькилою на теплое море. И меня господь бог соблюл от тоя напрасный смерти, и жива мя пред вами поставих, и тебя, мати моя, избави от греха сего напраснаго. Воистинну ты мати моя, родимая моя! И как аз тебе глаголах во младых летех: у всякия жены волосы долги, да ум короток». И услыша сие царица Вирсавия, мати его, глаголы царевича Соломона, и бысть аки мертва, и зря на него, и немогуще к нему провщевати что. И охапи Соломон матерь свою, и нача ея любезно целовати, и умилно отвещевати, и сяде с нею на царском одре беседовати. И услышали сенныя боярыни и девицы радость велию в полате и глагол велик в нощи. И приидоша ко царице в полату, и узревши в полате царицу едину с купцем заморенином охапившихся на одре царском седящих, и устрашишася вси, и побегоша вон из полаты. И бысть шум велик. И послыша тот шум царевы ближний вельможи, что у царицы нощию в полате радость и шум велик, и возвестиша царю Давиду о сем. И царь Давид скоро от одра своего воста и иде ко царице уведати. И прииде и узре царицу за столом с купцем заморянином охапившися седоша и умилно целующихся. И царь Давид устрашися вельми, и взя меч свой царский, и хотя царицу и царевича Соломона напрасной смерти предати. И вскочи Соломон царевич, паде на ногу отцу своему царю Давиду, вопия со слезами: «Государь мой батюшка царь Давид Иессеевич, не предавай напрасной смерти! Аз не купец заморянин, но сын твой прелюбезный Соломон царевич. Ты мя роди сам. А се мати моя, родившая мя. И бысть от рождения своего трех лет у тебя, государя, в дому и внезапу что в полунощи найде на мя безвестная смерть. И господь бог избави мя, и до сего часу жива мя сотвори, и постави мя пред лицем твоим». И царь Давид от радости не моги сына своего Соломона охапити, и паде на стол, нача вопити к богу: «Господи боже Саваоф отец наших, Авраамов, Исааков и Яковль, создавый перваго человека Адама, такожде и потом соблюде сына моего Соломона до сего часа жива». И лежа на столе на долг час, и творя достойный молитвы, и поя псалмы. И воста от стола, и ухвати сына своего Соломона за выю его, и нача его любезно целовати и миловати, и вопрошая: «Повеждь ми, сыну мой любезный, жезл и подпора старости моей и всему царствию моему, како господь бог соблюл тя от напрасный смерти и нощию не изгибе и где пребыл еси доселе?». И С