к царицыну гробу. Пьяни быша и уснуша крепким сном. И слуга княженецкой видя, что стражи уснуша, повеле людем своим царицу из земли украсти и принести на корабль. Корабленицы же царицу выкопаша из земли и принесоша на корабль. Потом слуга подняв парусы и побежа по морю с царицею. И на пути морском разби царицын гроб и оживи царицу здраву и целу, и бысть царица жива. И привезе ея в Индию к Пору царю. Царь же Пор вельми радостен бысть и оженися на ней, а слугу княженецкаго велми пожаловал и одарил великими дары. Утру же бывшу рано, восташа стражи; у гроба царицына, и смотряше гроб, и не обретоша царицы во гробе, и быша во ужасе велицем и страсе. И поидоша и возвестиша царю Соломону о сем, что царицу гость индейский украде и уеха с кораблем. «И нас обманул в ту нощь: позва нас к себе на корабль и напои нас вином, нам же бысть пьяным и поуснувшим. И мы, великий царю, виновны тебе, и главы наши пред тобою и казни достойны». И царь Соломон, покачав главою своею и востужися вельми и рече: «О злая жена ехидна. Воистинну государя моего батюшки, блаженный памяти, царя Давида, слово збывается». И потом услыша царь Соломон, что царица его в Ындии здрава, о оженися ею Пор царь, и нача думу свою думати, как бы мудростию своею до царства Индийскаго доехати, и царицу свою доступити, и смех ея отмстити. И надумався царь Соломон, и нача войско свое вскоре собирати, и корабли на море готовити, и сотвори на море тридесять кораблей, а войска собра 30 тысяч. И повеле в корабли нагрузити всяких товаров, и постави бояр своих во всех кораблях гостьми и купчинами, и повеле всякому кораблю разных градов языками глаголати и разными странами нарещися: всяких стран по языку и по нраву всякия земли. И повеле корабли одеяти сукнами разными. И поеха царь Соломон по морю разным путем. И приеде царь Соломон во Индию богатую под град. Со всех четырех сторон корабли разно постави и нарекошася гостьми, бутто что приехаили с товарами торговати. И посла царь Соломон со всех кораблей ко царю Пору боляр своих з дарами аки купцев, чтобы их пожаловал царь Пор, велел во граде своем торговати. И приидоша боляре ко царю Пору з дарами, и поклонишася ему, и принесоша дары ему, и били челом Пору царю, чтобы приказал им торговати во своей земли. И царь Пор у купцев дары принел, и честь им воздал велию, и торговати им повеле во своем царстве. И вопроси их царь всех, коего кто града и страны, и чьей державы. И вси купцы сказашася разныя державы и разных градов. И потом поидоша вси во свои корабли. И потом царь Соломон нача ко царю Пору уряжатися и хотяше итти сам к нему. И призва к себе со всех кораблей бояр своих и нача им наказывати: «О любезный мои князи, и бояря, и верныя мои августелины, и воеводы, и все силное мое воинство, послушайте ныне мене. Аз иду ко царю Пору на смерть, и вы с кораблей отнюдь не исходите во град сами и никакова человека от себе с кораблей не пущайте, доколе мою смерть узрите. И как поведут меня на висилицу вешати, и вас царь Пор на смотрение всех позовет, и вы возмите с собою всякий человек по мечю да по зарукавью мелкое оружие тайное. И как я вострублю в трубу, и вы тогда на кораблях велите седлать кони. И как аз вострублю второе, и вы садитеся на кони своя и приетте ко царю Пору, и поклонитеся ему, и станте около висилицы кругом, а иныя и возле царя Пора. А все воинство смеситеся со индияны. И как вострублю в третие, и вы, князи и бояре мои, выскочите ко мне, к деснице, а иныя царя Пора и царицу мою ухватите. И все воинство сопротиво друг друга секите всех индиян, и оружием побивайте, и милости не кажите им, и никого не жалуйте без пощады». Как царь Соломон приказал им творити, и со всеми простися, и поцелова их всех. Они же вельми плакахуся о царе Соломоне. И потом пойде царь Соломон ко царю Пору на двор. И прииде ко царицыну крыльцу и стал по себе человека изжидать от царицы. И вышла боярыня сенная от царицы на крилец. И царь Соломон поклонися боярыне и показа ей перстень златый обручалный, которой с нею, с царицею, на браке обручались, и глагола: «Госпожа боярыни, не купит ли сей перстень царица?». И боярыня поиде ко царице и возвести ей: «Купец с корабля прииде, продает перстень златый царский». И царица повеле тот перстень взяти у купца и принести к себе. И как тот перстень бояриня принесла ко царице, и виде царица перстень, и опозна его, и ужасеся, и рече: «О беда моя, не ушла есть от царя Соломона». И повеле его к себе взяти в полату. И прииде царь Соломон ко царице в полату и поклонися ей ниско. И рече царица Соломону: «Почто еси, царю Соломоне, прииде? Смерть твоя с тобою». И рече царь Соломон: «Любовь твоя приведе мя семо». И царица взя Соломона царя, и повеле людем своим посадити его в свой казенной сундук, и сяде на нем, и посла ко царю Пору. И прииде царь Пор ко царице и нача ея любезно целовати. И рече царица Пору царю: «Что еси царю меня любезно целуеши? Аще сие Соломон увидит, то худо будет». И рече ей Пор царь: «Аще бы царь Соломон хотя бы ныне пришел, и аз бы с ним готов битися». И рече царица Соломону: «Выступай, Соломоне царю». И вскрыла сундук, а сама рече Пору царю: «В кое число аз сундук вскрою, и ты копией и заколи его, не моги из сундука его жива пустити: и он мудростию своею обоих нас погубит, и смерти нас предаст, и царство восприимет». И вскрыла сундук, и царь Пор виде Соломона в сандуке седяща и хоте его копией своим смерти предати. И рече царь Соломон в сандуке сидя: «Царю Поре, помираю, постой мало, дай мне едино слово молвити». И царь Пор опусти копие. И рече Соломон царь Пору царю: «Помилуй мя, Поре царю, аз на то пришел еси к тебе: либа царицу мне отдай, или казни меня градскою казнию, вели меня среди града своего повесити. А тебе, царю Поре, будет слава во веки со окрестных стран, что царь Пор индийский казнил мудрого царя Соломона исраительскаго жены ради. Изволь подписать сим писанием на столпе. А ныне к тебе приехали со многих стран далних корабли, и те скажят во своих странах царем своим и кралем, и тебе, царю, наипаче слава будет великая. А то ты хощеши меня смерти предати един неволнаго, и никто не видит, и веры никто твоему убивству не поймет: невольный, аки мертный. Уже в руку твоею аз, и дратися аз с тобою не могу. И покаместь страстную казнь на меня поставишь, и аз отсюду, из сундука твоего, не изыду». И царь Пор повеле царицы сундук с царем Соломоном замкнути и стражей крепких поставити до утра. И повеле привести спекулатора, и повеле царь Пор каспелатору на Соломона царя поставити висилицу среди града на торгу, на высоком месте. И столбы велел украсити дивно, и исписати искусным златом; и повеле ему поцепити три петли: едину — златую, вторую — сребреную, третию — шелковую. И так уготовиша каспелатор все. И на утрия прииде и возвести царю Пору, что на Соломона царя страшную смерть изготових. И царь Пор послал проповедников по всему граду вопити и неволею иных загоняти, чтобы стекалися всего града люди от мала и до велика смотрети смерть и казнь израительскаго царя Соломона. И потом посла на корабли Соломоновы и иных кораблей, пришедших з далних стран; и повеле, чтобы стекалися с кораблей видети израительскаго царя Соломона смерть и прославляти царя Пора индийскаго, како царь Пор казнил волею царя премудраго Соломона Исраительскаго. И выйде граждане и с кораблей людие к висилице Соломона царя съезжалися видети чюдо сие. А Соломоновы бояря аки купцы изготовиша оружия своя втайне. И потом поведоша царя Соломона смертию казнити. И поиде сам царь Пор и с царицею своею видети царя Соломона смерть. А на уме держаху, чтобы царь Соломон мудростию своею от каспелатора не ушел бы, от казни и не учинил бы какия хитрости во царствии ево над ним, царем, и над царицею. И все во уме своем держал. И как поведоша царя Соломона к висилице, и увиде царь Соломон своих боляр и князей, стояху у висилицы вооружены втайне. И Соломон царь озреся на царя Пора и на царицу свою, что по нем идоша, и возрадовася вельми умом, и нача зрети на висилицу, и усмехнулся. И рече ему окрест идущих его воини: «Чего, царю Соломоне, зря смерть свою страшную возвеселился?». И рече им царь Соломон: «Братия моя, того ради аз возвеселихся, много мудрости уразумех, а сему дивлюся и, как аз родихся, первые вижю, предния колеса менше, а задния больше, болшия малых гонят, а не догонят. И болыпи того дивлюся, предних поневоле волокут, а потому что они привязаны, а задних сих, кто ведет?» И потом рече царь Соломон каспелатору: «Брате каспелаторе, возвести царю Пору, чтобы мне дал меду златую стопу испити и в златую свою трубу вострубити, не так бы аз смерти своея устрашился». И пойде каспелатор ко царю Пору и возвести ему, что просит царь Соломон златыя стопы меду испити и в златую твою трубу вострубити. И царь Пор повеле принести ему златую стопу меду и свою златую трубу и дати царю Соломону. Он взя златую стопу меду, и выпив, и нача в златую трубу трубити. И потом каспелатор приведе царя Соломона к виселице и постави его у шелковаго осила, а сам Пор царь седоша со царицею своею на высоком месте. И приидоша воини царя Соломона ко царю Пору и сташа возле царя Пора и царицы, а мечи и оружие имуще сокровенны тайно. И все воинство его пешия смесишася со индеяны. И как царь Соломон первую испив златую стопу меду и вострубил в златую трубу, и на кораблях конное воинство начата коней седлати и крепко вооружатися. И приступи каспелатор и рече царю Соломону: «Избирай, царю Соломоне, любимую свою смерть время совер