Воспомянем святых мужей страдания Бога ради и много различных недуг и болезней терпения со благодарением, не презывающе к себе ни чародеев, ни кудесников, и волхвов, ни зелейников и никаких бесовских чарований, но все упование возлогающе на Бога и со благодарением[30] терпяще, очищения ради грехов своих и вечных благ наслаждения, яко долготерпеливый Иов и нищый Лазарь, иже пред враты богатого на гноищы лежал, гноен и червми ядом; а ныне на лоне Авраамле почивая и якож Симеон столпник сам гноя тело свое, червьми кипя. И мнози праведнии, от века Богу угодивше, всякими болезньми и различными недуги страждуще, со благодарением терпяще спасения ради душа своея, и жизни ради вечныя; и теми скорбьми внидоша в царство небесное. Мнози богатии и убозии, християнского рода, во всяких чинех княжеска и болярска, и священническаго и мнишеского, много различными болезньми и недуги страждуще, и всякими одержими бываху скорбьми и обиды, Бога ради терпяще, и у Бога милости просяще, и милости[31] чающе и милосердный Господь многоразличныя милости на рабы своя излияет и исцеление дарует, и грехов свобождает, и от скорби спасает овых от животворящих крестов, и от чюдотворных икон святых и образов Христовых и Богородичных и Архангельских и всех Святых мощей, и от освящения воды, и от масленаго освящения и от молебнаго соборнаго пения, и на божественных литургиях и на всенощном предстоянии во святых Божьих церквах, и во святых честных монастырех, и в чюдотворных местех, и в дому, и на пути, и на водах и везде; призывающе верою Господа Бога и пречистую Богородицу и их угодников милость получающе, здравие телеси и душам спасание. Мнози искончашася в тех недузех и в тяжких болезнех и в различных скорбех, теми очистишася от грехов, и жизнь вечную получиша. Вонмем себе опасно и подражаем тех житию и терпению, и поревнуем святых отец житию, пророком и апостолом, святителем и мучеником, и преподобным уродивым Христа ради, и святым женам и православным царем, и князем и священническому, и мнишескому чину и всем христианом Богу угодившим[32] от века: како в житии сем скорбми пострадаша Христа ради, ова постом и молитвами и всяким долготерпением, гладом и жаждею, наготою и мразом, и солнечным сжением, поруганием и оплеванием и всякими укоризнами и биением и мучением различных мук от нечестивых царей Христа ради усекаеми, и огнем сожигаеми, и зверми снедаеми, и камением побиванием, и в водах потопляеми, и в вертепех и в пустынях, и в пропастях земных скончавшихся, во юзах, и в темницах заключаеми, и пленении и всякия терпеша скорби и труды различная муки их кто исповееть – яко же кто повестует святое писание; и сих ради различных страданий и всяких мук како возмездие прияша от Христа в сем веце и в будущем вечных благ наслаждение, – их же око не виде и ухо не слыша и на сердце человеку не взыде – яже уготова Бог любящим Его. Како прославляются ныне, якож церковь Божья вопиет. Мы же убо тех святых молим и на помощь призываем к Богу молитися о нас; и, от тех чюдотворных образов и честных мощей целбу получаем. Поревнуем тех святых житию и страданию со благодарением и долготерпением; такову жь благодать от Бога обрящем.