Lore Khosatral itere turnis su, flogis la aero per stroki desesperanta; ma Konan, furiante quale berserkulo, ne esez negita. Quale pantero abatas alkulo akulita, tale il jetis su sub la brakii frapanta e stekis la lamo krecentaforma til la mancho aden ta loko ube esus kordio di homo.
Khosatral shancelis e falis. En formo di homo lu falis, ma formo di homo ne frapis la lemo. Ube esabis imajo di vizajo homal esis nun nula vizajo, e la metala membri fuzesis e chanjis ... Konan, qua ne retroirabis de Khosatral vivanta, nun retrotiris su paleskinte de Khosatral mortinta, nam il vidis transformo terorinda; mortante, Khosatral itere divenis la kozo qua reptabis adsupre del Abiso milyari ante nun. Strangulata pro repugneso netolerebla, Konan turnis su por fugar de ta vidajo; ed il subite vidis, ke la turmi di Dagon ne plus aparis dop l’arbori. Oli desaparabis quale fumo—la rempari, la turmi, la granda bronza pordegi, la velvuri, l’oro, l’ivoro, e la bruna homini, e la viri havanta razita kapi. Kun la paso dil intelekto nehomal qua donis a li duesma nasko, li pasis itere aden la polvo qua li esabis dum epoki nekontebla. Nur la stumpi di ruptita koloni levis su super muri krulita e pavi frakasita e kupolo fendita. Konan itere regardis la ruinaji di Xapur quale il rimemoris oli.
La sovaja komandero longatempe stacis quale statuo; lu neprecize komprenis la tragedio kosmal di ta efemereso intermitant nomita homaro e la kapucizita formi di obskureso qui spolias ol. Lore audinte sua nomo kriata per toni timanta, il tresayis, quale on vekas de sonjo, itere regardetis la kozo sur la tero, trepidis, e turnis su vers la klifi e la yunino qua vartis ibe.
El regardegis timoze aden l’arbori, e salutis il per mirepresita krio pro alejo. Il forsukusis de su la monstroza vidaji nebulatra qui pokatempe obsedabis lu, ed itere esis kustumale vivoza.
‘Ube esas lu?’ El trepidis.
‘Lu iris retroe al inferno ek qua lu reptis,’ il gaye respondis. ‘Pro quo vu ne decensis l’eskalero ed eskapis per mea batelo?’
‘Me ne desertus—’ el diceskis, ma chanjis sua intenco e kelke budeme dicis, ‘Me havas nula loko a qua irar. La Hirkaniani itere sklavigus me, e la pirati—’
‘Ka pri la kozaki?’ il sugestis.
‘Ka li esas plu bona kam la pirati?’ el demandis desestimante. L’admiro di Konan kreskis vidar, ke el tante bone rekuperis sua aplombo pos subisir tala teroro. Elua arogo amuzis il.
‘Vu semblis tale opinionar en la kampeyo apud Ghori,’ il respondis. ‘Vu lore libere donis vua rideti.’
Elua reda labio tordesis pro desestimo. ‘Ka vu supozas, ke me amoreskis kun vu? Ka vu supozas, ke me shamus me por barbarulo bir-glutachanta e karno-manjachanta, sen esir koaktita? Mea mastro—di qua la kadavro ibe jacas—koaktis me tale agar.’
‘Ho!’ Konan aspektis kelke depresita. Ma il ridis per nediminuta zelo. ‘Ne importas. Vu nun apartenas a me. Kisez me.’
‘Vu audacas demandar—’ el iracoze diceskis, ma sentis su sizata de sua pedi e klemata an la sino muskuloza dil komandero. El feroce baraktis, ma il nur ridegis vivace, ebria pro sua posedo di ca kreuro splendida qua tordas su en ilua brakii.
Il facile haltigis elua baraktado, drinkis la nektaro de elua labii per sua tota pasiono nerepresita, til ke la brakii qui luktis kontre il esis moligita ed envolvis konvulse ilua dika kolo. Lore il ridis aden ta klar okuli, e dicis: ‘Pro quo chefo dil Libera Homi ne esez preferinda a hundo urbala de Turan?’
El forsukusis sua flava lokli, ankore priklita en omna tendino da la fairo di ilua kisi. El ne liberigis il. ‘Ka vu judikas vu egala al Agha?’ el dicis.
Il ridis e marchegis vers l’eskalero, portante el en sua brakii. ‘Vu judikos,’ il fanfaronis. ‘Me incendios Khawarizm kom torcho por lumizar vua voyo a mea tendo.’
Noto biografiala
Robert Ervin Howard naskis 22 januaro 1906 en Peaster, Texas, Usa, unika filiulo di mediko Isaac Mordecai Howard ed Hester Jane Ervin Howard. Lu habitis multa vilaji en Texas dum sua yuneso, de l’evo 13 habitis Cross Plains, Texas. Lu komencis skriptar evante 9 yari, influita da Jack London, Rudyard Kipling, e la skriburi pri mitologii klasika da Thomas Bullfinch. Evante 15 yari, lu deskovris la t.n. pulp magazines, jurnali di literaturo populara imprimita sur chipa papero ek paplo. Lu komencis submisionar noveli e poemi, omni de oli retrojetita til 1925, kande lu vendis novelo pri kavernano anciena al jurnalo Weird Tales [Stranja Rakonti] po $16.
Pos ta tempo lu vendis kelka plusa noveli e divenis jurnalisto, anke laboris pri plura diversa travalii, e kompletigis sua edukado che universitato. Lu kreis nova (por Amerika) jenro di rakonti fantastika kontenanta aventuro, hororo, e magio, la jenro t.n. sword and sorcery [espado e sorco]. Il kreis la karakteri Kull. Solomon Kane, e Cormac Mac Art, qui aparis en multa rakonti, ed anke skribis noveli pri boxisti e sporti.
Dum 1930 lu komencis korespondar kun l’autoro H.P. Lovecraft, qua anke publikigis noveli en la jurnalo Weird Tales. Lovecraft esis tre influanta inter l’autori qui skriptis rakonti fantastika, e per lu Howard konoceskis li omna. Lu e Lovecraft debatis pri barbareso kontre civilizeso: lore Howard deklaris, ‘Barbareso esas la stando natural dil homaro. Civilizeso esas nenatural. Ol esas kaprico de cirkonstanci. E barbareso mustas sempre e konkluze triumfar.’ Lovecraft komprenende kontredicis lo.
Dum 1932 Howard inventis epoko anciena quan lu nomis ‘l’Epoko Hiboreana,’ havanta multa landi e populi mi-historiala, ma anke monstri e magio. Lu kreis la karaktero Konan, e l’unesma novelo pri ta heroo, ‘La Fenixo sur l’espado,’ publikigesis decembro 1932. Ol esis tre populara, e Howard skriptis plusa duadek noveli pri ta barbarulo.
Plu tarde Howard plumulte skriptis noveli pri l’Amerika westal, e sempre poemifis.
Howard havis nur un amikino, qua livis Cross Plains en 1936. Lua matro, kun qua lu esis extreme intima, esis tuberklosiko, e pluproximeskis a morto. La frequa viziti di mediki e frequa voyaji a sanatorii facis plusa skriptado neposibla. Howard esis ofte melankolioza; nun lu preparis sua testamento e kompris enterigo-loko por la tota familio. Lu pruntis revolvero de amiko. Kande lua matro eniris elua komato final dum 11 junio 1936, lu iris a sua automobilo e pafis su per la revolvero; lu mortis ye 16 kloki. Lua matro mortis dum la sequanta dio, e li esis kunenterigita.
Pos lua morto, lua noveli esis multafoye rieditita kom libri ed ankore juas granda populareso. Lua letri anke esas publikigita, e plura biografii pri lu esis skribita. Lua noveli divenis filmi e televizion-spektakli, influis multa autori ed artisti, e lu restas un de la autori maxim importanta pri aventuro e lo fantastika.