Исцеле́ний бога́тство изливáеши ве́рно пою́щим Тя, Де́во, / и превознося́щим неизрече́нное Твое́ рождество́.
Напáстей Ты прило́ги отгоня́еши и страсте́й нахо́ды, Де́во: / те́мже Тя пое́м во вся ве́ки.
Ин. Ирмо́с: На горе́ святе́й просла́вльшася, и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.
Припев: Святы́й апо́столе и евангели́сте Луко́, моли́ Бо́га о на́с.
Росода́тельною му́дростию слове́с твои́х и ту́чами благода́ти Боже́ственныя пре́лести пе́щь погаси́л еси́, ве́стник Госпо́день и священнопропове́дник, богому́дре, бы́в.
Яко кра́сныя но́ги твоя́, всеблаже́нне, ми́р благовеству́ющаго, вся́к у́м преизве́стно преиму́щь, Его́же превозно́сим и славосло́вим во ве́ки вся́.
Благослови́м Отца́ и Сы́на и Свята́го Ду́ха, Го́спода.
Све́т мíра просвеща́ти во тме́ седя́щия яви́ тя Христо́с, О́тча существа́ Сия́ние, Госпо́дь Сла́вы, Его́же превозно́сим во ве́ки.
И ныне, Богоро́дичен: Во утро́бе всели́вшагося Де́вы и от Нея́ стра́шно и па́че сло́ва дре́вняго Ада́ма обнови́вшаго Го́спода, пое́м и славосло́вим во ве́ки.
Хва́лим, благослови́м, покланя́емся Го́сподеви,/ пою́ще и превознося́ще во вся ве́ки.
Катава́сия: О́троки благочести́выя в пещи́ / Рождество́ Богоро́дичо спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.
Песнь 9
Ирмо́с: Вои́стинну Богоро́дицу / Тя испове́дуем, / спасе́ннии Тобо́ю, Де́во чи́стая, / с безпло́тными ли́ки Тя величáюще.
Припе́в: Пресвята́я Богоро́дице, спаси́ нас.
То́ка слез мои́х не отврати́ся, / Я́же от вся́каго лица́ вся́ку сле́зу отъе́мшаго, / Де́во, Христа́ ро́ждшая.
Ра́дости мое́ се́рдце испо́лни, Де́во, / Я́же ра́дости прие́мшая исполне́ние, / грехо́вную печа́ль потребля́ющи.
Пристáнище и предстáтельство к Тебе́ прибегáющих / бу́ди, Де́во, и стена́ неруши́мая, / прибе́жище же и покро́в и весе́лие.
Све́та Твоего́ заря́ми просвети́, Де́во, / мрак неве́дения отгоня́ющи, / благове́рно Богоро́дицу Тя испове́дающих.
На ме́сте озлобле́ния не́мощи смири́вшагося, Де́во, исцели́, / из нездрáвия во здрáвие претворя́ющи.
Ин. Ирмо́с: Тя́, неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вом вои́стинну Бо́га, вы́шшую пречи́стых Си́л, немо́лчными славословле́нии велича́ем.
Припев: Святы́й апо́столе и евангели́сте Луко́, моли́ Бо́га о на́с.
Пропове́дник бы́л еси́ всемíрнаго спасе́ния ева́нгельским пропове́данием, свяще́нная же и благознамени́тая труба́, вдохнове́нием ды́шущи Ду́ха, показа́лся еси́, священноглаго́льниче всече́стне.
Дея́нии украша́емь Спа́совых апо́столов, сия́ от Бо́га подви́жимь, ве́рным написа́л еси́, я́коже о́браз одушевле́нный, при́сно пребыва́ющь, объяви́в, священнопропове́дниче всесла́вне.
Слава: Ста́л еси́ у́бо, Луко́, я́коже пости́г, богонача́льниче, жела́ний кра́йнейшее, Христу́ бо предста́л еси́, подае́маго от Него́ насыща́яся боговиде́ния. Те́мже тя́ вси́ ублажа́ем.
И ныне, Богоро́дичен: Тя́, Непристу́пнаго Бо́га носи́вшую на объя́тиих, на небесе́х пое́маго от вся́кия си́лы и Тобо́ю на́м да́рующа всегда́ спасе́ние, Богома́ти, велича́ем.
Катава́сия: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице Чи́стая Присноде́во.
Свети́лен. Подо́бен: Со ученики́:
Луко́, Христо́в апо́столе, таи́нниче неизрече́нных и язы́ков учи́телю, с Па́влом боже́ственным, и Пречи́стою Богоро́дицею, Ея́же боже́ственную ико́ну от любве́ изобрази́л еси́, моли́, богови́дче, о на́с, блажа́щих тя́ и соверша́ющих свяще́нное твое́ успе́ние, всему́дре тайноглаго́льниче.
Сла́ва, и́н. Подо́бен: Ду́хом во святи́лищи:
Яко ученика́ благода́ти и спосле́дователя Па́влова, и словопи́сца изя́щнейша Боже́ственнаго Ева́нгелия похва́лим; Сло́ва бо воплоще́ние и вочелове́чение, и стра́сти, блаже́нне, пропове́дал еси́. Те́м соше́дшеся ве́рно, Луко́, досто́йно тя́ почита́ем.