Вместо Досто́йно: поем: А́нгели, вхожде́ние Пречи́стыя зря́ще, удиви́шася: / ка́ко Де́ва вни́де во свята́я святы́х?
Ирмос, глас 4: Я́ко одушевле́нному Бо́жию киво́ту / да ника́коже ко́снется рука́ скве́рных, / устне́ же ве́рных Богоро́дице немо́лчно, / глас А́нгела воспева́юще, с ра́достию да вопию́т: / и́стинно вы́шши всех еси́, Де́во Чи́стая.
Причастен: Ча́шу спасе́ния прииму́, / и и́мя Госпо́дне призову́. / Аллилу́иа, трижды.
30 (13.12 н. ст.). СВЯТА́ГО И ВСЕХВА́ЛЬНАГО АПО́СТОЛА АНДРЕ́Я ПЕРВОЗВА́ННАГО
На велицей вечерни
По предначина́тельном псалме́ пое́м: Блаже́н муж: 1-й антифо́н.
На Го́споди, воззва́х: стихи́ры на 8, глас 4. Подо́бен: Зва́нный свы́ше:
И́же Предте́чевым све́том воображе́н,/ егда́ озаре́ние ипоста́сное сла́вы Оте́ческия яви́ся,/ челове́ческий род за благоутро́бие спасти́ хотя́,/ тогда́ пе́рвый ты, сла́вне, к Нему́ прите́кл еси́,/ озаре́н быв в ра́зуме соверше́ннейшею луче́ю Того́ Божества́,/ отону́дуже и пропове́дник и апо́стол быв Христа́ Бо́га на́шего./ Его́же моли́ спасти́ и просвети́ти ду́ши на́ша. Трижды.
И́же Предте́чевым гла́сом оглаше́н,/ егда́ всесвято́е Сло́во воплоти́ся, жизнь нам подая́/ и спасе́ние, су́щим на земли́, благовеству́я,/ тогда́ Тому́, прему́дре, после́довал еси́,/ и себе́ кра́йнее и всесвято́е, я́ко нача́ток, Тому́ освяти́л еси́,/ Его́же и позна́в, и возвести́л еси́/ сро́днику твоему́ Бо́га на́шего./ Его́же моли́ спасти́ и просвети́ти ду́ши на́ша. Трижды.
И́же из непло́дове Прозя́бшему учени́к быв,/ егда́ де́вственное Рождество́ возсия́,/ благоче́стия учи́тель,/ и целому́дрия показу́я чистоту́,/ тогда́ ты, тепле́йший доброде́тели рачи́тель, Андре́е блаже́нне, был еси́,/ восхожде́ния в се́рдцы твое́м полага́я,/ и от сла́вы к неизрече́нней взя́лся еси́ сла́ве Христа́ Бо́га на́шего./ Его́же моли́ спасти́ и просвети́ти ду́ши на́ша. Дважды.
Сла́ва, глас 4. Анато́лия: Рыб лови́тву оста́вив, апо́столе,/ челове́ки уловля́еши тро́стию про́поведи,/ низпуща́я, я́коже у́ду, благоче́стия льще́ние/ и возводя́ из глубины́ ле́сти язы́ки вся,/ Андре́е апо́столе,/ верхо́внаго сый единокро́вный/ и вселе́нныя ку́пно пропове́дниче велегла́сный,/ моля́ся не преста́й о нас,/ ве́рою и любо́вию благохва́лящих, всехва́льне,/ при́сно честну́ю па́мять твою́.
И ны́не, предпра́зднства, глас то́йже: Иса́ие, лику́й, Сло́во Бо́жие восприими́,/ прорцы́ Отрокови́це Мари́и/ купину́ горе́ти огне́м/ и не сгара́ти заре́ю Божества́./ Вифлее́ме, благоукраси́ся,/ отве́рзи врата́, Еде́ме,/ и волсви́, иди́те/ ви́дети Спасе́ние, в я́слех повива́емое,/ Его́же звезда́ показа́ верху́ верте́па, жизнода́вца Го́спода,/ спаса́ющаго род наш.
Вход. Проки́мен дне. И чте́ния 3.
Собо́рнаго посла́ния Петро́ва чте́ние (зача́ло 58):
Петр, апо́стол Иису́с Христо́в,/ избра́нным прише́льцем разсе́яния,/ По́нта, Галати́и, Каппадоки́и, Аси́и и Вифи́нии,/ по прозре́нию Бо́га Отца́ во святы́ню Ду́ха,/ в послуша́ние и кропле́ние Кро́ве Иису́с Христо́вы,/ благода́ть вам и мир да умно́жится./ Благослове́н Бог и Оте́ц Го́спода на́шего Иису́с Христа́,/ И́же по мно́зей Свое́й ми́лости порожде́й нас во упова́ние жи́во/ воскресе́нием Иису́с Христо́вым от ме́ртвых,/ в насле́дие нетле́нно, и нескве́рно, и неувяда́емо,/ соблюде́но на Небесе́х вас ра́ди,/ и́же си́лою Бо́жиею соблюде́ни ве́рою/ во спасе́ние гото́вое яви́тися во вре́мя после́днее./ О не́мже ра́дуйтеся,/ ма́ло ны́не, а́ще ле́по есть, приско́рбни бы́вше в разли́чных напа́стех,/ да искуше́ние ва́шея ве́ры многочестне́йше зла́та ги́бнуща,/ огне́м же искуше́на,/ обря́щется в похвалу́, и честь, и сла́ву во открове́ние Иису́с Христо́ве./ Его́же не ви́девше, лю́бите,/ и на Него́же ны́не не зря́ще, ве́рующе же,/ ра́дуетеся ра́достию неизглаго́ланною и просла́вленною,/ прие́млюще кончи́ну ве́ре ва́шей спасе́ние душа́м./ О Не́мже спасе́нии взыска́ша и испыта́ша проро́цы,/ и́же о ва́шей благода́ти прореко́ша,/ испыта́юще, в каково́ или в ко́е вре́мя явля́ше в них Дух Христо́в,/ пре́жде свиде́тельствуя о Христо́вех страсте́х и я́же по сих сла́вах,/ и́мже откры́ся, я́ко не им саме́м,/ но нам служа́ху сия́, я́же ны́не возвести́шася вам,/ благовествова́вшими вам Ду́хом Святы́м, по́сланным с Небесе́,/ в ня́же жела́ют А́нгели прини́кнути./ Те́мже, возлю́бленнии,/ препоя́савше чре́сла помышле́ния ва́шего, трезвя́щеся,/ соверше́нне упова́йте на приноси́мую вам благода́ть открове́нием Иису́с Христо́вым./ Я́ко ча́да послуша́ния, не преобразу́ющеся пе́рвыми неве́дения ва́шего похоте́нии,/ но по зва́вшему вы Свято́му и са́ми свя́ти во всем житии́ бу́дите./ Зане́ пи́сано есть:/ свя́ти бу́дите, я́ко Аз Свят есмь./ И а́ще Отца́ называ́ете, нелицеме́рно судя́ща кому́ждо по де́лу,/ со стра́хом жития́ ва́шего вре́мя жи́тельствуйте,/ ве́дяще, я́ко не истле́нным сребро́м или́ зла́том/ изба́вистеся от су́етнаго ва́шего жития́, отцы́ пре́даннаго,/ но честно́ю Кро́вию я́ко А́гнца Непоро́чна и Пречи́ста Христа́,/ предуве́дена у́бо пре́жде сложе́ния мíра,/ я́вльшася же в после́дняя ле́та вас ра́ди./ И́же Его́ ра́ди ве́руете в Бо́га,/ воздви́гшаго Его́ из ме́ртвых и сла́ву Ему́ да́вша,/ я́ко да ве́ра ва́ша и упова́ние бу́дет на Бо́га./ Ду́ши ва́ша очи́стивше в послуша́ние и́стины ду́хом,/ в братолю́бие нелицеме́рно, от чи́ста се́рдца друг дру́га люби́те приле́жно,/ порожде́ни не от се́мене истле́нна, но неистле́нна,/ сло́вом Жива́го Бо́га и пребыва́юща во ве́ки./ Зане́ вся́ка плоть, я́ко трава́,/ и вся́ка сла́ва челове́ча, я́ко цвет травны́й./ Изсше́ трава́, и цвет ея́ отпаде́,/ глаго́л же Госпо́день пребыва́ет во ве́ки,/ се же есть глаго́л благовествова́нный в вас./ Отло́жше у́бо вся́ку зло́бу, и вся́ку лесть,/ и лицеме́рие, и за́висть, и вся клеветы́,/ я́ко новорожде́ни младе́нцы, слове́сное и неле́стное млеко́ возлюби́те,/ я́ко да о нем возрасте́те во спасе́ние./ Понеже́ вкуси́сте, я́ко благ Госпо́дь./ К Нему́же приходя́ще, Ка́меню Жи́ву,/ от челове́к у́бо уничиже́ну, от Бо́га же избра́нну, че́стну,/ и са́ми, я́ко ка́мение жи́во,/ зижди́теся в храм духо́вен, святи́тельство свя́то/ возноси́ти же́ртвы духо́вны, благоприя́тны Бо́гови Иису́с Христо́м./ Зане́ пи́сано есть в Писа́нии:/ се полага́ю в Сио́не Ка́мень Краеуго́лен, избра́н, че́стен,/ и ве́руяй в Онь не постыди́тся.