На литии́ стихи́ра хра́ма и апо́стола, глас 1. Творе́ние Андре́я Иерусали́мскаго:
Первозва́нный учени́к и подража́тель стра́сти,/ сообразу́я Тя, Го́споди, Андре́й апо́стол,/ и́же во глубине́ неве́дения прельща́емыя иногда́,/ у́дицею Креста́ Твоего́ возвле́к, приведе́ Тебе́./ Те́мже и, спа́сшеся, ве́рнии, вопие́м Ти:/ моли́твами его́, Преблаги́й,/ жизнь на́шу умири́/ и спаси́ ду́ши на́ша.
Воспои́м, ве́рнии, Петро́ва сро́дника Андре́я,/ Христо́ва ученика́,/ той бо мо́ре мре́жами испыта́в иногда́, ры́бы улови́,/ ны́не же вселе́нную тро́стию ло́вит Креста́,/ и язы́ки от пре́лести обраща́ет ко Креще́нию,/ и, Христу́ предстоя́, про́сит ми́ра мíру/ и ду́шам на́шим ве́лия ми́лости.
Огнь у́мный, просвеща́ющ мы́сли и опаля́ющ грехи́/ внутрь прие́м в се́рдцы, апо́стол Христо́в и уче́ник/ сия́ет у́бо та́инственными луча́ми уче́ний/ во язы́ческих непросвеще́нных сердца́х,/ сжига́ет же па́ки хвра́стная нечести́вых баснодея́ния,/ огнь бо Ду́ха таково́е и́мать де́йство./ О, чу́до стра́нно и стра́шно! Бре́нный язы́к, бре́нное естество́, те́ло пе́рстное/ у́мное и невеще́ственное прия́т зна́ние,/ но, о таи́нниче неизрече́нных и зри́телю Небе́сных!/ Моли́ озари́тися душа́м на́шим.
Глас 8. Творе́ние Мала́кса: Жела́емаго Бо́га/ во пло́ти уви́дев, на земли́ ходя́ща,/ Богови́дче первозва́нне,/ единокро́вному вопия́л еси́, ра́дуяся:/ обрето́хом, о Си́моне, жела́емаго./ Спа́су же Дави́дски возопи́л еси́:/ и́мже о́бразом жела́ет еле́нь на исто́чники вод,/ си́це жела́ет душа́ моя́ к Тебе́, Христе́ Бо́же./ Отону́дуже и жела́нию жела́ние приложи́в,/ Кресто́м прехо́диши, к Нему́же возжеле́л еси́,/ я́ко и́стинный учени́к/ и му́дрый подража́тель быв Кресто́м Того́ страсте́й;/ те́мже и сла́вы о́бщник Его́ быв, приле́жно моли́ся о душа́х на́ших.
Сла́ва, глас 8. Андре́я Иерусали́млянина или Анато́лиево:
Пропове́дника ве́ры и слугу́ Сло́ва,/ Андре́я восхва́лим,/ той бо из глубины́ челове́ки уловля́ет,/ вме́сто тро́сти Крест в рука́х держа́,/ и, я́ко у́же низпуща́я си́лу,/ возво́дит ду́ши от ле́сти вра́жия/ и прино́сит Бо́гу дар благоприя́тен при́сно./ Того́, ве́рнии, в ли́це учени́к Христо́вых восхва́лим,/ да мо́лится с ни́ми,/ я́ко да ми́лостив бу́дет нам в день су́дный.
И ны́не, Богоро́дичен: Влады́чице, приими́ моли́тву рабо́в Твои́х/ и изба́ви нас/ от вся́кия ну́жды и печа́ли.
На стихо́вне стихи́ры, глас 5. Подо́бен: Ра́дуйся:
Ра́дуйся, слове́сное не́бо,/ сла́ву Бо́жию всегда́ пове́дающее,/ пе́рвый, Христа́ зову́ща послу́шав те́пле/ и безотсту́пно с Ним пребыва́я,/ от Него́же просвеща́емь,/ уви́дел еси́ свет вторы́й/ и су́щия во тьме мо́лниями твои́ми просвети́л еси́,/ бла́гости Того́ подража́я./ Тем всесвято́е твое́ соверша́ем торжество́/ и моще́й ра́ку ра́достне целу́ем,/ от нея́же источа́еши спасе́ние прося́щим/ и ве́лию ми́лость.
Стих: Во всю зе́млю изы́де веща́ние их/ и в концы́ вселе́нныя глаго́лы их.
Пе́рвый доброде́телей обрета́тель/ благоутро́бия ра́ди на́шим обложе́ннаго, Андре́е Богому́дре,/ естество́м, совокупи́лся еси́ Ему́ разжже́нною любо́вию,/ единокро́вному вопия́:/ Его́же пропове́даша проро́цы в Ду́се, обрето́хом,/ гряди́ к Его́ красоте́,/ да привлече́ни бу́дем и душе́ю, и помышле́нием,/ я́ко да светово́дствуеми Того́ светлостьми́,/ нощь пре́лести и тьму неве́дения отжене́м,/ Христа́ благословя́ще,/ подаю́щаго мíру ве́лию ми́лость.
Стих: Небеса́ пове́дают сла́ву Бо́жию,/ творе́ние же руку́ Его́ возвеща́ет твердь.
Язы́ки, неве́дущия Бо́га,/ я́ко из глубины́ неве́дения улови́л еси́/ мре́жею твои́х слове́с/ и возмуща́еши я́ве сла́ная моря́,/ конь хра́брейший/ яви́лся еси́ влады́чествующаго мо́рем, приснопева́емый,/ и гни́лость безбо́жия изсуши́л еси́,/ соль честну́ю вложи́в – му́дрость твою́,/ е́йже и удиви́шася, апо́столе сла́вне,/ обуя́вшей му́дрости безсту́дне присвоя́ющиися,/ Христа́ не ве́дуще,/ подаю́щаго мíру ве́лию ми́лость.