Сла́ва, глас 3. Ге́рманово: Скро́вника Петро́ва и Христо́ва ученика́,/ рыб лови́теля и ловца́ челове́ков,/ в пе́снех почти́м, Андре́я апо́стола,/ Иису́совым бо уче́нием/ вся наказа́в догма́ты,/ и я́ко льще́ние ры́бам пло́ти беззако́нным предаде́/ и ты́я улови́./ Того́ моли́твами, Христе́,/ пода́ждь лю́дем Твои́м/ мир и ве́лию ми́лость.
И ны́не, глас то́йже: Ио́сифе, рцы нам:/ ка́ко от святы́х, Ю́же прия́л еси́, Де́ву/ непра́здну приво́диши в Вифлее́м?/ Аз, глаго́лет, проро́ки испыта́в/ и отве́т прии́м от Ангела, уве́рихся,/ я́ко Бо́га роди́т Мари́я несказа́нно,/ Его́же на поклоне́ние волсви́ от восто́к прии́дут,/ с да́ры честны́ми служа́ще./ Воплоти́выйся нас ра́ди,/ Го́споди, сла́ва Тебе́.
Тропа́рь, глас 4: Я́ко апо́столов первозва́нный/ и верхо́внаго су́щий брат/ Влады́це всех, Андре́е, моли́ся,/ мир вселе́нней дарова́ти/ и душа́м на́шим ве́лию ми́лость.
Сла́ва, и ны́не, Богоро́дичен воскре́сен.
Богородице дево: единожды.
На у́трени
На Бог Господь: тропарь апостола, глас 4:
Я́ко апо́столов первозва́нный/ и верхо́внаго су́щий брат/ Влады́це всех, Андре́е, моли́ся,/ мир вселе́нней дарова́ти/ и душа́м на́шим ве́лию ми́лость. Дважды.
Сла́ва, и ны́не, Богоро́дичен: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́емь, / и Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.
По 1-м стихосло́вии седа́лен, глас 1. Подо́бен: Гроб Твой:
Я́ко Боже́ственнаго ученика́ и первозва́ннаго всех Христо́вых ученико́в/ похваля́ем тя любо́вию, Андре́е апо́столе, и ве́рно вопие́м ти:/ изба́ви па́ству твою́, е́йже от Бога́ вве́рился еси́,/ вся́кия ско́рби, и нужд, и собла́знов, и вся́каго озлобле́ния.
Сла́ва, и ны́не, Богоро́дичен: Ру́ки Твоя́, Честна́я, святы́я, ны́не просте́рши уми́льне,/ по́мощь нам от Свята́го пода́ждь/ и даждь безбе́дно жизнь соверши́ти сла́вящим Твое́ пресвято́е Рождество́/ и Тя, Влады́чице, напису́ющим, Отрокови́це, наде́жду и хвалу́.
По 2-м стихосло́вии седа́лен, глас 3. Подо́бен: Боже́ственныя ве́ры:
Первозва́нна тя обре́те Христо́с,/ таи́нника изря́днейша, Андре́е блаже́нне,/ и повеле́ния Его́ усе́рдно возвыша́юща вселе́нней,/ я́коже перна́т, просвети́л еси́ язы́ков состоя́ния,/ Того́ я́ко Бо́га моли́ дарова́ти нам ве́лию ми́лость.
Сла́ва, и ны́не, Богоро́дичен: Боже́ственная ски́ния была́ еси́ Сло́ва,/ еди́на Пречи́стая Ма́ти Де́во, чистото́ю А́нгелы превозше́дшая,/ па́че всех мене́, персть бы́вша,/ оскверне́на плотски́ми прегреше́ньми, очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.
Полиелей и величание:
Велича́ем тя, / Апо́столе Христо́в Андре́е, / и чтим боле́зни и труды́ твоя́, / и́миже труди́лся еси́ / во благове́стии Христо́ве.
Псалом избранный.
1 Небеса́ пове́дают сла́ву Бо́жию, творе́ние же руку́ Его́ возвеща́ет твердь.
2 Испове́дят Небеса́ чудеса́ Твоя́, Го́споди.
1 Вме́сто оте́ц Твои́х бы́ша сы́нове Твои́.
2 Поста́виши я́ кня́зи по всей земли́.
1 Бог бого́в Госпо́дь глаго́ла и призва́ зе́млю.
2 От восто́к со́лнца до за́пад хва́льно И́мя Госпо́дне.
1 Освети́ша мо́лния Его́ вселе́нную,
2 возвести́ша Небеса́ пра́вду Его́,
1 и ви́деша вси лю́дие сла́ву Его́.
2 Кня́зи Иу́довы влады́ки их.
1 Воцари́ся Бог над язы́ки.
2 Бог прославля́емь в сове́те святы́х.
1 Ве́лий и стра́шен есть над все́ми окре́стными Его́.
2 Рцы́те во язы́цех, я́ко Госпо́дь воцари́ся.
1 Возвести́те во язы́цех сла́ву Его́, во всех лю́дех чудеса́ Его́.
2 Во всю зе́млю изы́де веща́ние их,
1 и в концы́ вселе́нныя глаго́лы их.
2 Покори́ лю́ди нам и язы́ки под но́ги на́ша.
1 Ве́лий Госпо́дь наш и ве́лия кре́пость Его́.
2 Той даст си́лу и держа́ву лю́дем Свои́м: благослове́н Бог.
Сла́ва, и ны́не: Аллилу́иа, трижды.