Ин. Ирмо́с: Да утверди́тся се́рдце мое́ в во́ли Твое́й, Христе́ Бо́же,/ и́же над вода́ми Не́бо утвержде́й второ́е/ и основа́вый на вода́х зе́млю, Всеси́льне.
Припев: Святы́й апо́столе Андре́е, моли́ Бо́га о на́с.
Сло́вом призыва́ющему, – гряди́ во след Мене́, – Христу́ а́бие после́дова со Андре́ем и Ки́фа,/ роди́теля оста́вивше, и ладию́, и мре́жи,/ я́ко ве́ры предусмотри́телие.
Ка́пища претвори́в в хра́мы Бо́жия, всече́стне,/ освяти́л еси́ в них сы́ны Креще́ния,/ я́же благода́ть обнови́ водо́ю и Ду́хом.
Би́сер многоце́нный та́инственне мíру предложи́л еси́,/ в селе́ се́рдца твоего́ сокрове́нный, апо́столе,/ его́же ве́рою сокро́вищствоваша язы́цы обре́тшии.
Я́ко сокро́вище, Ева́нгелие в ру́ки прии́м, многопе́те,/ всю обогати́л еси́ зе́млю Боже́ственныя про́поведи,/ те́мже и па́мять твою́ почита́ет со страда́нии твои́ми.
Сла́ва, Тро́ичен: В Тро́ице Еди́ну Си́лу правосла́вне вси воспои́м, –/ Безнача́льнаго, Несозда́ннаго Бо́га, Единосу́щнаго,/ Сопресто́льнаго, Триипоста́снаго, Трисо́лнечнаго, –/ Сию́ воспева́юще.
И ны́не, Богоро́дичен: Вся́ка у́бо ма́ти, ча́до ро́ждши, не ктому́ де́вствовати мо́жет,/ Ты же, ро́ждши Христа́, Де́во Ма́ти,/ пребыла́ еси́, млекопита́ющи Жизнь на́шу и чиста́ пребы́вши.
Катава́сия: Пре́жде ве́к от Отца́ рожде́нному нетле́нно Сы́ну / и в после́дняя от Де́вы / воплоще́нному безсе́менно, / Христу́ Бо́гу возопии́м: / вознесы́й ро́г на́ш, / свя́т еси́, Го́споди.
Седа́лен, глас 8. Подо́бен: Прему́дрости:
Я́ко первозва́ннаго всех ученико́в, и самови́дца Сло́ва, и служи́теля,/ Андре́е апо́столе, по до́лгу чтим тя,/ А́гнцу бо, взе́млющему грехи́ мíра,/ несомне́нною ве́рою те́пле после́довал еси́,/ отону́дуже и стра́сти Его́ о́бщник показа́лся еси́,/ пло́тию претерпе́вшаго нас ра́ди во́льно смерть./ Сего́ ра́ди вопие́м ти:/ моли́ся Христу́ Бо́гу грехо́в оставле́ние пода́ти/ пра́зднующим любо́вию святую па́мять твою́.
Сла́ва, ин седа́лен, глас и подо́бен то́йже:
И́дольская свире́пства низложи́в,/ Спа́совы стра́сти вожделе́в, Андре́е блаже́нне, показа́лся еси́ апо́стол,/ с небесе́ всем точа́ чудеса́, и язы́ков был еси, всеблаже́нне, учи́тель./ Тем твою́ па́мять досто́йно чту́ще, в пе́снех сла́вим и ве́рно велича́ем, Госпо́день апо́столе,/ моли́ся Христу́ Бо́гу грехо́в оставле́ние дарова́ти/ пра́зднующим любо́вию святу́ю па́мять твою́.
И ны́не, Богоро́дичен: Ра́дуйся, престо́ле огнезра́чный Бо́жий;/ ра́дуйся, Отрокови́це, седа́лище ца́рское, о́дре упещренопостла́нный,/ златопорфи́рный черто́же, хлами́до червленоша́рная,/ украше́нный хра́ме, молнено́сная колесни́це, свети́льниче многосве́тлый;/ ра́дуйся, Богоро́дице, двонадесятосте́нный гра́де, и дверь златокова́нная,/ и черто́же светообра́зный, светлопозлаще́нная трапе́зо, Богоукраше́нная ски́ние;/ ра́дуйся, сла́вная Неве́сто солнцека́плющая;/ ра́дуйся, еди́на души́ моей благоле́пие.
Песнь 4
Ирмо́с: Ду́хом прови́дя, проро́че Авваку́ме,/ Словесе́ воплоще́ние, пропове́дал еси́, вопия́:/ внегда́ прибли́житися ле́том, позна́ешися,/ внегда́ приити́ вре́мени, пока́жешися./ Сла́ва си́ле Твое́й, Го́споди.
Припе́в: Пресвята́я Богоро́дице, спаси́ нас.
Де́во всесвята́я, нескве́рная ски́ние,/ оскверне́на мя прегреше́ньми очи́сти ны́не щедро́т Твои́х чисте́йшими кропле́ньми/ и даждь ми ру́ку по́мощи, да зову́:/ сла́ва Тебе́, Чи́стая, Богопросла́вленная.
Храм освяще́нный яви́лася еси́ Бо́га, в Тя все́льшагося, Де́во, па́че ума́,/ Того́ моли́ грехо́вныя нас скве́рны очи́стити,/ я́ко да храм позна́емся и оби́телище Ду́ха.
Поми́луй мя, Богоро́дице, я́же еди́на ми́лости исто́чник ро́ждшая,/ и разреши́ души́ моея́ лю́тую боле́знь и недоуме́ние се́рдца,/ слез струю́ и умиле́ние пре́жде конца́ да́рующи Боже́ственное моли́твами Твои́ми.
Позна́в Тя го́ру проро́к Ду́хом Боже́ственным прописа́ присе́нную, Чи́стая,/ иста́явшия пла́менем мно́гих согреше́ний очи́сти хода́тайством Твои́м, Де́во,/ еди́на челове́ков исправле́ние.
Ин. Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву/ провозглаша́ше свято́му/ во спасе́ние на́ше и обновле́ние.
Припев: Святы́й апо́столе Андре́е, моли́ Бо́га о на́с.
Боже́ственная, истреби́тельная го́ршаго вседе́тельнаго и светоза́рнаго Ду́ха си́ла,/ в тя, Андре́е, все́льшися Боголе́пне,/ о́гненнаго язы́ка во о́бразе, неизрече́нных показа́ тя пропове́дника.