Катава́сия: Та́инство стра́нное ви́жу и пресла́вное: / не́бо – верте́п, престо́л херуви́мский – Де́ву, / я́сли – вмести́лище, / в ни́хже возлеже́ Невмести́мый – Христо́с Бо́г, / Его́же, воспева́юще, велича́ем.
Свети́лен. Подо́бен: Ду́хом во святи́лищи:
Сло́во Пребезнача́льное обре́т тя, всеблаже́нне,/ первозва́нна показа́ всех апо́столов, Андре́е приснопа́мятне,/ и, Сего́ стопа́м возсле́дуя, показа́лся еси́ путево́ждь заблу́ждших,/ к Небе́сному сия́ возводя́ Боже́ственному ше́ствию.
Сла́ва, Подо́бен: Жены́, услы́шите:
Петро́ва скро́вника, ученико́в пе́рвейшаго,/ самови́дца и слугу́ бы́вшаго Сло́ва, Андре́я апо́стола пресла́вно восхва́лим,/ язы́ки бо просвети́ и, ра́спят быв,/ кончи́ну подъе́млет, я́ко учени́к Влады́ки.
И ны́не, Богоро́дичен: Бо́га, Его́же родила́ еси́, Де́во всенепоро́чная,/ моли́ о всех, благоче́стно Тя чту́щих, с первозва́нным Андре́ем/ улучи́ти Боже́ственнаго осия́ния Твоего́ Сы́на/ и стоя́ния избра́нных и святы́х, и́бо мо́жеши, я́ко хо́щеши.
На хвали́тех стихи́ры, на 4. Глас 1. Подо́бен: Небе́сных чино́в:
Вифсаи́до, ны́не весели́ся,/ в тебе́ бо процвето́ша от ма́терня удо́лия/ благово́ннейшии кри́ни, Петр и Андре́й,/ мíру всему́ про́поведь ве́ры благово́нствующе/ благода́тию Христо́вою,/ Его́же и страсте́м приобщи́шася.
Андре́е, ра́дуйся и игра́й,/ я́ко прия́л еси́ я́ве во словесе́ сия́нии/ Со́лнца сла́вы, Христа́ Жизнода́вца,/ Его́же и держа́ся, ве́рою пропове́дал еси́./ Того́ моли́ непреста́нно о нас,/ ве́рою воспева́ющих тя.
Тайноучи́тель Боже́ственнаго строе́ния Христо́ва,/ избра́нный в пе́рвых, учени́к бы́ти Сло́ва,/ Андре́й Богови́дец, вопия́, глаго́лет,/ единокро́внаго Петра́ уви́дев:/ обрето́хом Месси́ю,/ Его́же писа́ние и проро́цы предпропове́даша.
Па́трский тя град па́стыря стяжа́,/ и градоде́ржца Боже́ственнаго,/ и бед вся́ческих изба́вителя,/ и храни́теля тя, Андре́е му́дре,/ благода́рно чту́щий тя,/ но моли́ непреста́нно о нем спасти́ся неврежде́нну.
Сла́ва, глас 8: Пропове́дника ве́ры/ и слугу́ Сло́ва, Андре́я восхва́лим,/ той бо из глубины́ челове́ки уловля́ет,/ вме́сто тро́сти Крест в рука́х держа́ и я́ко у́же низпуща́я си́лу,/ возво́дит ду́ши от ле́сти вра́жия/ и прино́сит Бо́гу дар благоприя́тен при́сно./ Того́, ве́рнии, в ли́це учени́к Христо́вых восхва́лим,/ да мо́лится с ни́ми,/ я́ко да ми́лостив бу́дет нам в День Су́дный.
И ны́не, глас то́йже: Восприими́, Вифлее́ме, Бо́жию митропо́лию,/ Свет бо незаходи́мый в тебе́ роди́тися прихо́дит./ А́нгели, удиви́теся на Небеси́;/ челове́цы, просла́вите на земли́;/ волсви́, из Перси́ды пресла́вныя да́ры принеси́те;/ па́стырие, свиря́юще, Трисвято́е пе́ние песновоспо́йте./ Вся́кое дыха́ние да хва́лит Вседе́теля.
Славосло́вие вели́кое и отпу́ст.
Тропарь апостола, глас 4:
Я́ко апо́столов первозва́нный/ и верхо́внаго су́щий брат/ Влады́це всех, Андре́е, моли́ся,/ мир вселе́нней дарова́ти/ и душа́м на́шим ве́лию ми́лость.
Сла́ва, и ны́не, Богоро́дичен: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́емь, / и Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.
На литурги́и
Блаже́нны от кано́нов, пе́сни 3-я и 6-я.
Тропарь апостола, глас 4:
Я́ко апо́столов первозва́нный/ и верхо́внаго су́щий брат/ Влады́це всех, Андре́е, моли́ся,/ мир вселе́нней дарова́ти/ и душа́м на́шим ве́лию ми́лость.
Конда́к апостола, глас 2. Подо́бен: В моли́твах:
Му́жества тезоимени́таго Богоглаго́льника/ и Це́ркве возсле́дователя верхо́внаго,/ Петро́ва сро́дника восхва́лим,/ зане́ я́коже дре́вле сему́ и ны́не нам воззва́:/ прииди́те, обрето́хом Жела́емаго.
Проки́мен, глас 8: Во всю зе́млю изы́де веща́ние их/ и в концы́ вселе́нныя глаго́лы их.
Стих: Небеса́ пове́дают сла́ву Бо́жию,/ творе́ние же руку́ Его́ возвеща́ет твердь.
Апо́стол к Кори́нфяном, зача́ло 131 (1 Кор 4:9–16).
Бра́тие, Бог ны посла́нники после́дния яви́, я́ко насме́ртники, зане́ позо́р бы́хом мíру и А́нгелом и челове́ком. Мы у́бо бу́и Христа́ ра́ди, вы же му́дри о Христе́, мы не́мощни, вы же кре́пцы, вы сла́вни, мы же безче́стни. До ны́нешняго часа́ и а́лчем, и жа́ждем, и наготу́ем, и стра́ждем, и скита́емся, и тружда́емся, де́лающе свои́ми рука́ми. Укоря́еми, благословля́ем, гони́ми, терпи́м, ху́лими, утеша́емся, я́коже отре́би мíру бы́хом, всем попра́ние досе́ле. Не срамля́я вас сия́ пишу́, но я́коже ча́да моя́ возлю́бленная наказу́ю. А́ще бо и мно́ги пе́стуны и́мате о Христе́, но не мно́ги отцы́, о Христе́ бо Иису́се благовествова́нием аз вы роди́х. Молю́ же вас: подо́бни мне быва́йте, я́коже аз Христу́.