Ины стихиры, глас тойже. Подобен: Небе́сных чино́в:
Церко́вныя цве́ты облета́я, / я́коже птене́ц Вы́шняго гнезда́ А́нгельскаго, / Нико́лае треблаже́нне, / зове́ши при́сно к Бо́гу о всех нас, / и́же в ну́ждных беда́х и искуше́ниих, / и избавля́еши моли́твами твои́ми.
Свяще́нныя оде́жды красоту́ / де́ятельными соде́лал еси́ доброде́тельми светле́йшую, / о́тче Богоно́се. / Те́мже нам священноде́йствуеши ди́вная, / сла́вных чуде́с священноде́телю, / лю́тых избавля́я ны.
Неви́димых добро́ты проходя́, / стра́шную о́ну разуме́л еси́ / сла́ву святы́х, свя́те. / Те́мже нам Небе́сная словеса́ / присноживо́тных о́нех виде́ний явля́еши, / свяще́ннейший о́тче.
Я́ко во сне предста́л еси́ благочести́вому царю́ / и у́зники, о́тче, от сме́рти изба́вил еси́; / моли́ся непреста́нно, / я́ко да и ны́не моли́твами твои́ми / изба́вимся от искуше́ний, и бед, и боле́зней, / досто́йно благохва́лящии тя.
Слава, глас 5: Востру́бим трубо́ю пе́сней, / взыгра́ем пра́зднственная / и ликовству́ем, ра́дующеся, / в моле́бное торжество́ Богоно́снаго отца́. / Лю́дие да стеку́тся / и и́же со́нным стра́шным явле́нием царя́ препира́юща / непови́нно держи́мыя три отпусти́ти воево́ды, да воспою́т. / Па́стырие и учи́телие, / До́браго Па́стыря подобноревни́тельна па́стыря, соше́дшеся, восхва́лим, / и́же в неду́зех врача́, / и и́же в беда́х изба́вителя, / гре́шнии засту́пника, / ни́щии сокро́вище / и и́же в ско́рбех уте́шителя, / спу́тника путеше́ствующии, / на мо́ри су́щии прави́теля / и вси везде́ те́пле предваря́юща, / вели́каго святи́теля восхваля́юще, си́це рцем: / пресвяты́й Нико́лае, / предвари́, и изба́ви ны от настоя́щия беды́, / и спаси́ ста́до твое́ моли́твами твои́ми.
И ныне, Богородичен, подобен. Творение Патриарха Германа:
Востру́бим трубо́ю пе́сней: / прини́кши бо свы́ше, Всецари́ца Ма́ти Де́ва / благослове́ньми венчава́ет воспева́ющия Ю́. / Лю́дие да стеку́тся / и Цари́це да воспле́щут в пе́снех, Царя́ ро́ждшей, / и́же сме́ртию держи́мыя пе́рвее / разреши́ти человеколю́бно благоволи́вшаго; / па́стырие и учи́телие, / До́браго Па́стыря Пречи́стую Ма́терь, соше́дшеся, восхва́лим. / Све́щник златоза́рный, светоно́сный о́блак, / Небе́с простра́ннейшую, одушевле́нный киво́т, / огнезра́чный Влады́чень престо́л, / манноприе́мную злату́ю ста́мну, / затворе́нную Сло́ва дверь, / всех христиа́н прибе́жище, / пе́сньми Богогла́сными похваля́юще, си́це рцем: / пала́то Сло́ва, / сподо́би смире́нных нас Небе́снаго Ца́рствия: / ничто́же бо невозмо́жно хода́тайству Твоему́.
Славословие великое.
Тропарь, глас 4:
Пра́вило ве́ры и о́браз кро́тости, / воздержа́ния учи́теля / яви́ тя ста́ду твоему́ / Я́же веще́й И́стина. / Сего́ ра́ди стяжа́л еси́ смире́нием высо́кая, / нището́ю бога́тая, / о́тче священнонача́льниче Нико́лае, / моли́ Христа́ Бо́га, / спасти́ся душа́м на́шим.
И отпуст. Дается же и елей братии от кандила святаго, и час 1.
На литургии
Блаженна от канона 1-го, песнь 3-я, и 2-го канона, песнь 6-я.
Тропарь, глас 4:
Пра́вило ве́ры и о́браз кро́тости, / воздержа́ния учи́теля / яви́ тя ста́ду твоему́ / Я́же веще́й И́стина. / Сего́ ра́ди стяжа́л еси́ смире́нием высо́кая, / нището́ю бога́тая, / о́тче священнонача́льниче Нико́лае, / моли́ Христа́ Бо́га, / спасти́ся душа́м на́шим.
Кондак, глас 3. Подобен: Де́ва днесь:
В Мν́рех, свя́те, священноде́йствитель показа́лся еси́, / Христо́во бо, преподо́бне, Ева́нгелие испо́лнив, / положи́л еси́ ду́шу твою́ о лю́дех твои́х / и спасл еси́ непови́нныя от сме́рти. / Сего́ ра́ди освяти́лся еси́, / я́ко вели́кий таи́нник Бо́жия благода́ти.
Прокимен, глас 7: Возвесели́тся пра́ведник о Го́споде / и упова́ет на Него́.
Стих: Услы́ши, Бо́же, глас мой, внегда́ моли́ти ми ся к Тебе́.
Апостол ко Евреем, зачало 335 (Евр 13:17–21).
Бра́тие, повину́йтеся наста́вником ва́шим и покаря́йтеся: ти́и бо бдят о душа́х ва́ших, я́ко сло́во возда́ти хотя́ще, да с ра́достию сие́ творя́т, а не воздыха́юще, несть бо поле́зно вам сие́. Моли́теся о нас, упова́ем бо, я́ко добру́ со́весть и́мамы, во всем, до́бре хотя́ще жи́ти. Ли́шше же молю́, сие́ твори́те, да вско́ре устро́юся вам. Бог же ми́ра, возведы́й из ме́ртвых Па́стыря овца́м вели́каго, кро́вию заве́та ве́чнаго, Го́спода на́шего Иису́са Христа́, да соверши́т вы во вся́ком де́ле бла́зе, сотвори́ти во́лю Его́, творя́ в вас благоуго́дное пред Ним, Иису́с Христо́м. Ему́же сла́ва во ве́ки веко́в. Ами́нь.