Ро́ждшагося пло́тию от Де́вы без се́мене Христа́ Бо́га со А́нгелы вси воспое́м, / сла́ва в Вы́шних Бо́гу, взыва́юще.
Всепра́зднственный нас ра́ди Истощи́вшагося, ве́рнии, пра́здник / с Дави́дом же и Иа́ковом пе́сньми по достоя́нию почти́м.
Слава: Я́ко жениху́ от черто́га, из ма́терних ложе́сн / Дави́д рече́ Го́споду изы́ти, / его́же ны́не со Иа́ковом воспое́м.
И ныне, Богородичен: Безневе́стную и Богоро́дицу Мари́ю почти́м: / Тоя́ бо ра́ди нам возсия́ Пра́вды Со́лнце.
Катавасия: Пре́жде век от Отца́ рожде́нному нетле́нно Сы́ну / и в после́дняя от Де́вы / воплоще́нному безсе́менно, / Христу́ Бо́гу возопии́м: / вознесы́й рог наш, / свят еси́, Го́споди.
Кондак праздника, глас 3:
Де́ва днесь Пресу́щественнаго ражда́ет, / и земля́ верте́п Непристу́пному прино́сит. / А́нгели с па́стырьми славосло́вят, / волсви́ же со звездо́ю путеше́ствуют: / нас бо ра́ди роди́ся / Oтроча́ Мла́до, Преве́чный Бог.
Икос: Еде́м Вифлее́м отве́рзе, / прииди́те, ви́дим, пи́щу в та́йне обрето́хом; / прииди́те, прии́мем су́щая ра́йская внутрь верте́па: / та́мо яви́ся ко́рень ненапое́н, / прозяба́я отпуще́ние; / та́мо обре́теся кла́дезь неиско́пан, / из Него́же Дави́д пи́ти дре́вле возжада́ся; / та́мо Де́ва ро́ждши Младе́нца, / жа́жду уста́ви а́бие Ада́мову и Дави́дову. / Сего́ ра́ди к Нему́ и́дем, / где роди́ся Отроча́ Мла́до, Преве́чный Бог.
Седален, глас 3. Подобен: Де́ва днесь:
Ио́сифа пра́веднаго, Де́вы обру́чника, / с Дави́дом Иа́кова достодо́лжно воспое́м: / си́и бо, пра́ведною ходи́вше стезе́ю, достиго́ша Небе́сныя оби́тели, / досто́йно лику́юще со А́нгелы, / нам про́сят согреше́ний оставле́ние.
Слава, глас и подобен тойже:
Де́ва роди́ Творца́ вся́ческих, / и волсви́ гряду́т Сему́ пло́тию поклони́тися; / челове́цы со А́нгелы славосло́вят; / верте́п яке и я́сли дароно́сят, / воспева́юще ро́ждшагося Отроча́ Мла́до, Преве́чнаго Бо́га.
И ныне, глас 1. Подобен: Лик А́нгельский:
Лик проро́ческий пра́зднует Боже́ственне чу́до, в Тебе́ бы́вшее, о Де́во! / Бо́га бо, вопло́щшася на земли́, породила́ еси́. / Те́мже А́нгели с па́стырьми пою́т, / волсви́ же ве́рою со Ио́сифом вопию́т Дави́ду чудеса́, Богоотцу́.
Песнь 4
Ирмос: Жезл из ко́рене Иессе́ева / и цвет от него́, Христе́, / от Де́вы прозя́бл еси́, / из горы́, Хва́льный, приосене́нныя ча́щи, / прише́л еси́, вопло́щся от Неискусому́жныя, / Невеще́ственный и Бо́же: / сла́ва си́ле Твое́й, Го́споди.
Припев: Святы́й прáведный Ио́сифе Обру́чниче, моли́ Бо́га о на́с.
Иму́щи помышле́ние / послу́шно боже́ственным повеле́нием, / и чист весь быв, / Еди́ней в жена́х Чи́стей и Непоро́чней / обруче́н был еси, Иосифе блаженне, / храня́щи Де́ву чи́стую / к прия́тию Сотво́ршаго.
Еди́ному Гаврии́лу на небеси́ / и тебе́ еди́ному, приснопа́мятне, / с еди́ней Неискусобра́чней / еди́ное по премно́гу стра́шное та́инство, / Ио́сифе блаже́нне вве́рися, / еди́наго тлетво́рнаго – кня́зя тьмы́ гоня́щее.
Одушевле́н храм светови́ден быв Сотво́ршаго / тща́нием веще́й боже́ственных, / от свята́го хра́ма Храм святы́й / сподо́бился еси́ прия́ти, Ио́сифе блаже́нне, / – еди́ную в жена́х Присноде́ву.
Богородичен: Разреша́я я́ве / все ума́ твоего́ смуще́ние, / предста́ неви́димый, глаго́люще ти: / «Не убо́йся, Ио́сифе, Мариа́м пречи́стую / ны́не прия́ти, во чре́ве бо но́сит / боже́ственною Свое́ю си́лою Нося́щаго вся!»
Ин. Ирмос: Твоего́ на земли́ явле́ния, Христе́ Бо́же, / пропове́дая проро́к прише́ствие, / с весе́лием вопия́ше: / сла́ва си́ле Твое́й, Го́споди.
Припев: Святи́и богоотцы́, моли́те Бо́га о на́с.
С волхвы́ Ро́ждшемуся поклони́мся / и со А́нгелы и Ио́сифом лику́им, боголе́пно взыва́юще: / сла́ва в Вы́шних Христу́ Бо́гу.
Ца́рствуяй все́ми царьми́ Христо́с, / по пло́ти от се́мене Дави́дова рожде́йся, / избра́ннаго Иа́кова прия́т, бра́та, я́коже изво́ли.
Слава: От Де́вы Госпо́дь яви́выйся во пло́ти, спросла́ви па́мять ва́шу, сняти́и, / апо́столов лу́чший, Иа́кове, и Дави́де всеблаже́нне.
И ныне, Богородичен: Херуви́мских чино́в преиму́щи / и Бо́га, на руку́ носи́ма, с пло́тию поне́сши, / ра́дуйся, Богоро́дице Безневе́стная.
Катавасия: Жезл из ко́рене Иессе́ева / и цвет от него́, Христе́, / от Де́вы прозя́бл еси́, / из горы́, Хва́льный, приосене́нныя ча́щи, / прише́л еси́, вопло́щся от Неискусому́жныя, / Невеще́ственный и Бо́же: / сла́ва си́ле Твое́й, Го́споди.