Песнь 8
Ирмос: Ужасни́ся, боя́йся, Не́бо, / и да подви́жатся основа́ния земли́: / се бо водо́ю облачи́тся / Опали́вый водо́ю пре́жде пра́веднаго же́ртву пресла́вно. / Его́же, о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.
Припев: Сла́ва, Тебе́, Бо́же наш, сла́ва Тебе́.
Избавле́ние гряде́т Христо́с Креще́нием пода́ти всем ве́рным: / сим бо Ада́ма очища́ет, па́дшаго возвыша́ет, / низло́жшаго мучи́теля посрамля́ет, Небеса́ отверза́ет, / Ду́ха Боже́ственнаго низво́дит / и нетле́ния прича́стие да́рует.
Благослови́м Отца́ и Сы́на и Свята́го Ду́ха, Го́спода.
Преста́ лесть вра́жия, глас бо вопию́щаго в пусты́ни: / путь Госпо́день, – зове́т, – угото́вайте / и вся стези́ Его́ пра́вы твори́те, – повелева́ет, / дебрь бо смиря́ется, естество́ земны́х возвыша́ется, / гора́ и холм же враго́в понижа́ется.
И ныне: О, пресла́вных даро́в! / О, Боже́ственныя благода́ти и несказа́нныя любве́! / Се бо водо́ю очища́ет мя, огне́м просвеща́ет мя / и Ду́хом Боже́ственным соверша́ет мя Соде́тель и Влады́ка, / ны́не во Иорда́не в мое́ обле́кся естество́, Безгре́шный.
Катавасия: Ужасни́ся, боя́йся, Не́бо, / и да подви́жатся основа́ния земли́: / се бо водо́ю облачи́тся / Опали́вый водо́ю пре́жде пра́веднаго же́ртву пресла́вно. / Его́же, о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.
Песнь 9
Ирмос: Не рыда́йте всу́е, / отча́яния тенета́ми удавля́еми, челове́цы, пови́ннии злых, / но во умиле́нии души́ присту́пим Очища́ющему вся, / я́ко Еди́ному Чи́стому / и Даю́щему проще́ние Креще́нием.
Припев: Сла́ва, Тебе́, Бо́же наш, сла́ва Тебе́.
Во стра́ннем Твое́м Рождестве́ пе́рвее из Де́вы преесте́ственно удиви́л еси́, Сло́ве Бо́жий. / Ны́не же велича́ем, ве́лие та́инство соверша́я пресла́вно прича́стием честны́м, / купе́ль многоча́дну Боже́ственным Ду́хом.
Слава: Земля́ освяти́ся Рождество́м Твои́м святы́м, Сло́ве, / пове́дающим Небесе́м звездо́ю сла́ву Твою́. / Ны́не же водно́е естество́ благослови́ся, Тебе́ пло́тию кре́щшуся, / и род земноро́дных к пе́рвому взы́де па́ки благоро́дию.
И ныне: Да ра́дуется земля́ вся, Не́бо да весели́тся, / мiр да игра́ет, ре́ки да пле́щут руко́ю, / исто́чницы и езе́ра, бе́здны, моря́ да сра́дуются: / прихо́дит бо Христо́с Ада́ма очи́стити и спасти́ Боже́ственным Креще́нием.
Катавасия: Не рыда́йте всу́е, / отча́яния тенета́ми удавля́еми, челове́цы, пови́ннии злых, / но во умиле́нии души́ присту́пим Очища́ющему вся, / я́ко Еди́ному Чи́стому / и Даю́щему проще́ние Креще́нием.
На утрени
На Бог Госпо́дь, тропарь предпразднства, глас 4:
Возвраща́шеся иногда́ Иорда́н река́ ми́лотию Елиссе́евою, / возне́сшуся Илии́, / и разделя́хуся во́ды сю́ду и сю́ду, / и бысть ему́ сух путь, и́же мо́крый, / во о́браз вои́стинну Креще́ния, / и́мже мы теку́щее жития́ прехо́дим ше́ствие: / Христо́с яви́ся во Иорда́не освяти́ти во́ды. Трижды.
По 1-м стихословии седален, глас 1. Подобен: Лик А́нгельский:
Весели́ся, реко́ Иорда́не, / в тебе́ бо всех Творе́ц прихо́дит во́лею / Креще́ние прия́ти от раба́, я́ко Благоутро́бен. / Красу́йся, лику́й, Ада́ме, и Е́во прама́ти: / прии́де избавле́ние всех, Бог Преблаги́й.
Слава, и ныне, глас и подобен тойже:
Пото́к сла́дости Влады́ка сый, предгряде́т во струя́х ре́чных крести́тися, / напои́ти мя хотя́ очище́ния вода́ми. / Его́же зря, Иоа́нн вопия́ше: / ка́ко ру́ку мою́ на верх Твой простру́, / Его́же трепе́щут вся́ческая?
По 2-м стихословии седален, глас 3. Подобен: Красоте́ де́вства:
Ада́мову наготу́ одева́я, Благоутро́бне, во оде́жду сла́вы, / хо́щеши обнажи́тися пло́тию во Иорда́не реце́. / О, чудесе́ пресла́внаго! / Ка́ко Тя поды́мет вода́, Влады́ко Го́споди, / вода́ми покрыва́ющаго превы́спренняя? – я́коже пи́шет. / Пое́м, Иису́се Благоде́телю, вси Твое́ явле́ние.
Слава, и ныне, глас тойже. Подобен: Боже́ственныя ве́ры:
Ве́лие Со́лнце во Иорда́не просия́ти гряде́т, / е́же из Де́вы, из о́блака возсия́вшее, Христо́с Бог наш, / грехо́вный отгоня́ мрак и мíра просвеща́я концы́, / Его́же осия́ния получи́ти благоче́стно помо́лимся, / прося́ще прия́ти ве́лию ми́лость.