Песнь 9
Ирмос: Недоуме́ет всяк язы́к благохвали́ти по достоя́нию, / изумева́ет же ум и премíрный пе́ти Тя, Богоро́дице, / оба́че, Блага́я су́щи, ве́ру приими́, / и́бо любо́вь ве́си Боже́ственную на́шу: / Ты бо христиа́н еси́ Предста́тельница, Тя велича́ем.
Припев: Сла́ва, Тебе́, Бо́же наш, сла́ва Тебе́.
Дави́де, прииди́ Ду́хом к просвеще́нным, – / ны́не приступи́те, – пой к Бо́гу, – / ве́рою, – глаго́ля, – просвети́теся! / Сей ни́щий воззва́ Ада́м в паде́нии, и́бо Того́ услы́ша Госпо́дь, / прише́д, струя́ми Иорда́нскими тле́ннаго же обнови́.
Иса́ия, – измы́йтеся, очи́ститеся! – глаго́лет, – / лука́вствия пред Го́сподем оста́вите. / Жа́ждущии, на во́ду жи́ву иди́те: / кропи́т бо водо́ю, обновля́я, Христо́с приступа́ющия к Нему́ ве́рою / и к животу́ нестаре́емому креща́ет Ду́хом.
Соблюда́емся благода́тию, ве́рнии, и печа́тию. / Я́ко бо губи́теля, бежа́ша пра́га евре́и, дре́вле окрова́влена, / та́ко и нам исхо́дное Боже́ственное сие́ пакибытия́ ба́ня бу́дет. / Отсю́ду и Тро́ицы у́зрим Свет Незаходи́мый.
Ин. Ирмос: От Бо́га Бо́га Сло́ва, / неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, / от Святы́я Де́вы неизрече́нно воплоти́вшагося нас ра́ди, / ве́рнии, единому́дренно пе́сньми велича́ем.
Припев: Свята́я му́ченице Татиа́но, моли́ Бо́га о на́с.
По мно́гих му́ках ме́чным тя судо́м лю́тый осужда́ет судия́, / ея́же восхожде́нием восплеска́ша Небе́снии чи́ни. / Христо́с же всеси́льною десни́цею венча́ тя, му́ченице, зако́нно пострада́вшую.
Сочта́ся с му́ченическими светле́йшими ста́ды, / ясне́йши прибли́жившися Бо́гу, ви́диши я́же ви́дят А́нгели, / я́ко Де́ва в черто́зе водворя́ешися, Жениха́ твоего́, честна́я, / моля́щи, спасти́ся любо́вию тя почита́ющим.
Слава: Запеча́танный исто́чник тя, заключе́н же огра́д, / возложе́ние че́стно и свяще́нно, неве́сту Христо́ву нетле́нную, / заколе́ние и же́ртву, а́гницу и до́брую голуби́цу Влады́ки вся́ческих, / Татиа́но, пропове́дуем.
И ныне, Богородичен: Гла́сы прекланя́ема те́пле тя моля́щих, / Еди́на ве́рных Прибе́жище, спаси́, уще́дри, Влады́чице, / соблюди́ от вре́да, и вся́каго язы́ков наше́ствия, / ве́рою и любо́вию при́сно тя велича́ющия.
Катавасия: Недоуме́ет всяк язы́к благохвали́ти по достоя́нию, / изумева́ет же ум и премíрный пе́ти Тя, Богоро́дице, / оба́че, Блага́я су́щи, ве́ру приими́, / и́бо любо́вь ве́си Боже́ственную на́шу: / Ты бо христиа́н еси́ Предста́тельница, Тя велича́ем.
Светилен праздника. Подобен: Посети́л ны:
Яви́ся Спас, благода́ть и и́стина, во струя́х Иорда́нских / и су́щия во тьме и се́ни спя́щия просвети́л есть, / и́бо прии́де и яви́ся Свет Непристу́пный.
Сла́ва, и ны́не, тойже.
На хвалитех стихиры на 6: праздника три, глас 6. Подобен: А́нгельския:
Сия́ние от Све́та, Свет сый, Иису́се мой, / просвети́л еси́ нас неизрече́нным Твои́м осия́нием, / пре́жде ослепле́нныя во Еде́ме от зми́я, / во Иорда́не ны́не Свет вси́ Све́том Твои́м зря́ще, ве́рно пое́м: / благослове́н, явле́йся Бо́же наш, сла́ва Тебе́.
Таи́нниче и стра́шных строи́телю та́ин, / Предте́че, ра́дости и Ду́ха самови́дче, / кре́щшагося Сло́ва от Тебе́, я́ко благоволи́, проси́ / нам согреше́ний избавле́ние при́сно пода́ти, / Ему́же пое́м: / благослове́н, явле́йся Бо́же наш, сла́ва Тебе́.
Вознесе́м, ве́рнии, в ра́зуме сердца́, / потеце́м со тща́нием к струя́м Иорда́нским, / и уви́дим Зижди́теля, пло́тски креща́ема от Иоа́нна Предте́чи, / и с ни́м богосло́вяще, воспои́м: / бла́гослове́н, явле́йся Бо́же наш, сла́ва Тебе́.
И святыя три, самогласны, глас 3:
Страда́льческое торжество́ ве́рнии, / богому́дренне соверша́емо ви́дяще, / чу́дному в сове́тех Бо́гу на́шему, / благода́рственное песнопе́ние воспои́м: / неви́димую бо держа́ву проти́вныя си́лы в же́нстем естестве́ победи́, / и Боже́ственную Свою́ си́лу в не́мощи соверши́в доброму́ченицы: / тоя́ моли́твами спаса́ет ду́ши на́ша.
И́стины ча́шу от свои́х крове́й страда́льческих, / всехва́льная му́ченица Христо́ва, Татиа́но, / раствори́вши, и сию́ всегда́ предлага́ющи Це́ркви, / в не́йже церко́вныя пито́мцы му́дрости гла́сом созыва́ет, глаго́лющи: / почерпи́те пи́во, Воскре́сния свиде́тельное, / неве́рных прогони́тельное и страсте́й чисти́тельное, / благочести́вым же душа́м храни́тельно, / Спа́су зову́ще: / напои́вый на́с пото́ком сла́дости Ду́ха, / спаси́ ду́ши на́ша.