По 50-м псалме.
Слава: Моли́твами преподо́бнаго Анто́ния, / Ми́лостиве, очи́сти / мно́жества согреше́ний на́ших.
И ныне: Моли́твами Богоро́дицы, / Ми́лостиве, очи́сти / мно́жества согреше́ний на́ших.
Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.
И стихира, глас 6: Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже жити́ю без поро́ка поревнова́л еси́,/ дерзнове́ние име́я ко Христу́ Бо́гу,/ мир испроси́ душа́м на́шим.
Кано́н Богоро́дицы на 6. И свята́го на 8.
Кано́н Богоро́дицы, его́же краегране́сие: Пою́ хвалу́ живоно́сней Отрокови́це. Творе́ние Иоа́нна Дамаскина́, глас 2.
Песнь 1
Ирмо́с: Нетре́ну, необы́чну,/ немо́кренно морску́ю ше́ствовав стезю́,/ избра́нный вопия́ше Изра́иль:/ Го́сподеви пои́м, я́ко просла́вися.
Припев: Пресвята́я Богоро́дице, спаси́ нас.
Невеще́ственная дре́вле ле́ствица и стра́нно олядене́вщий путь мо́ря/ Твое́ явля́ше Рождество́, Чи́стая,/ Ю́же пое́м вси, я́ко просла́вися.
Си́ла Вы́шняго, Ипоста́сь соверше́нная,/ Бо́жия му́дрость, вопло́щшаяся, Пречи́стая, из Тебе́,/ челове́ком бесе́дова, я́ко просла́вися.
Про́йде сквозе́ дверь непрохо́дную заключе́нныя утро́бы Твое́я пра́вды Со́лнце, Чи́стая,/ и мíру возсия́, я́ко просла́вися.
Кано́н преподо́бнаго, его́же краегране́сие: Анто́ния Боже́ственнаго восхвали́ти ле́по. Творе́ние Феофа́ново, глас 8.
Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре, Изра́иля же беглеца́, пешехо́дца спа́се,/ песнь Бо́гови воспева́юща.
Припев: Преподо́бне о́тче Анто́ние, моли́ Бо́га о на́с.
Безсме́ртия и жи́зни е́мься ве́чныя я́ве/ и Трисия́нныя зари́, о́тче, насыща́яся,/ просвеще́нием благода́ти омраче́нную ду́шу мою́ озари́ти помоли́ся,/ я́ко да досто́йно воспою́ тя.
Млад сый во́зрастом телесе́,/ нов путь доброде́тели восприе́м, сим безбе́дно ше́ствовал еси́,/ зако́ну но́вому повину́яся Спа́сову, треблаже́нне,/ и живоно́сным повеле́нием Ева́нгелия после́дуя.
Слава: Трисо́лнечным сия́нием, всему́дре, озаря́емь,/ злоу́мное, блаже́нне, де́монов свере́пство, и звере́й зия́ния,/ и ран боле́зни, я́коже паучи́ну, разори́л еси́,/ Боже́ственным разжиза́емь жела́нием.
И ныне, Богородичен: Я́ко Бо́жия Ма́ти,/ дерзнове́ние иму́щи к ро́ждшемуся из Тебе́ Единоро́дному Сло́ву,/ и Отцу́ Собезнача́льному, и Соесте́ственному Ду́ху,/ моля́щи не преста́й от бед спасти́, Всенепоро́чная,/ Тя, Богоро́дицу, сла́вящия.
Катава́сия: Су́шу глубороди́тельную, зе́млю/ со́лнце наше́ствова иногда́:/ я́ко стена́, бо огусте́ обапо́лы вода́/ лю́дем пешомореходя́щим и богоуго́дно пою́щим:/ пои́м Го́сподеви, сла́вно бо просла́вися.
Песнь 3
Ирмо́с: Лук сокруши́ся си́льных/ держа́вою Твое́ю, Христе́,/ и си́лою немощству́ющии/ препоя́сашася.
Припев: Пресвята́я Богоро́дице, спаси́ нас.
И́же вре́мене превы́шший вся́каго,/ я́ко време́н Творе́ц, из Тебе́, Де́во, во́лею Младе́нец созда́ся.
Чре́во, простра́ннейшее Небе́с, воспои́м,/ и́мже Ада́м на Небесе́х, ра́дуяся, живе́т.
Ин. Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.
Припев: Преподо́бне о́тче Анто́ние, моли́ Бо́га о на́с.
Утвержде́нным по́мыслом и кре́пким терпе́нием страсте́й увяди́л еси́ пла́мень,/ в безстра́стия све́тлую оде́жду, Анто́ние, оде́ялся еси́, о́тче, и спасе́ния ри́зу.
Крепчашия прило́ги де́монов дерза́ющих/ и зве́рскими о́бразы подо́бящихся,/ пренебре́гл еси́ тех не́мощную си́лу,/ кре́пкаго бо име́л еси́ во бране́х Спомо́щника.
Слава: Богоно́сец, нача́ла тьмы и вла́сти обличи́в воздержа́нием кре́пким,/ до́блественный победи́тель, Анто́ние, был еси́,/ по́стников сла́ва, мона́шествующих похвала́.