Сла́ва, гла́с 8: Сердца́ ве́рных земледе́лая язы́ком твои́м, Григо́рие, благоче́стия в ни́х присноцвету́щия израсти́л еси́ плоды́ Бо́гу, терно́вныя е́реси посека́я из ко́рене и украша́я смы́слы чистото́ю. Те́мже, прие́мля на́ша похвалы́, боже́ственная цевни́це, бо́дрое о́ко, па́стырей па́стырь, волко́в лове́ц, моли́ся приле́жно, богосло́ве, Сло́ву о душа́х на́ших.
И ны́не, Богоро́дичен: Безневе́стная Де́во, Яже Бо́га неизрече́нно заче́нши пло́тию, Ма́ти Бо́га Вы́шняго, Твои́х рабо́в мольбы́ приими́, Всенепоро́чная, все́м подаю́щи очище́ние прегреше́ний, ны́не на́ша моле́ния прие́млющи, моли́ спасти́ся все́м на́м.
На благослове́нии хле́бов, тропа́рь, гла́с 1:
Па́стырская свире́ль богосло́вия твоего́ ри́торов победи́ трубы́, я́коже бо глубины́ Ду́ха изыска́вшу, и добро́ты веща́ния приложи́шася тебе́. Но моли́ Христа́ Бо́га, о́тче Григо́рие, спасти́ся душа́м на́шим.
Богоро́дице Де́во: еди́ножды.
На утрени
На Бо́г Госпо́дь: тропа́рь свята́го:
Па́стырская свире́ль богосло́вия твоего́ ри́торов победи́ трубы́, я́коже бо глубины́ Ду́ха изыска́вшу, и добро́ты веща́ния приложи́шася тебе́. Но моли́ Христа́ Бо́га, о́тче Григо́рие, спасти́ся душа́м на́шим. Дважды.
Сла́ва, и ны́не, Богоро́дичен: Гаврии́лу веща́вшу Тебе́, Де́во, ра́дуйся, со гла́сом воплоща́шеся все́х Влады́ка в Тебе́, святе́м киво́те, я́коже рече́ пра́ведный Дави́д, яви́лася еси́ ши́ршая небе́с, поноси́вши Зижди́теля Твоего́: сла́ва Все́льшемуся в Тя́; сла́ва Проше́дшему из Тебе́; сла́ва Свободи́вшему на́с Рождество́м Твои́м.
По 1-й стихоло́гии седа́лен, гла́с 3. Подо́бен: Боже́ственныя ве́ры:
Боже́ственное осия́ние насле́дствовав, житие́ невеще́ственно изобучи́л еси́, единоиме́нным свяще́нством преизя́ществовав, преесте́ственно бо уясни́в догма́ты, правосла́вием ве́ру утверди́л еси́, о́тче преподо́бне, Христа́ Бо́га моли́ дарова́ти на́м ве́лию ми́лость.
Сла́ва: Сто́лп бы́л еси́ Це́ркве, бога́тство некра́домо благоче́стия яви́лся еси́, богосло́ве Григо́рие, безстра́стием уясни́в житие́ твое́ и Тро́ицы изъясни́в догма́ты. Отче преподо́бне, Христа́ Бо́га моли́ дарова́ти на́м ве́лию ми́лость.
И ны́не, Богоро́дичен: Боже́ственная ски́ния была́ еси́ Сло́ва, еди́на Всечи́стая Де́во Ма́ти, чистото́ю а́нгелы превозше́дшая. Па́че все́х мене́, пе́рсть бы́вша, оскверне́на плотски́ми прегреше́ньми, очи́сти моли́тв Твои́х боже́ственными вода́ми, подаю́щи, Чи́стая, ве́лию ми́лость.
По 2-й стихоло́гии седа́лен, гла́с 5. Подо́бен: Собезнача́льное Сло́во:
Бо́дрствовав сло́вом и́стины, Тро́ическую держа́ву богосло́вив, Ариево злоче́стие и пребеззако́нное злосла́вие низложи́в, я́ко благоче́стия до́блественник и побо́рник, святи́телю, просвети́л еси́ во тме́ неве́дения седя́щия. Два́жды.
Сла́ва, и ны́не, Богоро́дичен: Души́ моея́ стра́сти многоболе́зненныя и пло́ти моея́ неду́ги вско́ре исцели́, ума́ моего́ блуже́ния уста́ви, Всенепоро́чная, и в тишине́ помысло́в моли́твы приноси́ти чи́сты Царю́ вся́ческих сподо́би, Богоро́дице, и испроси́ти прегреше́ний оставле́ние.
Полиелей и величание:
Велича́ем тя, святи́телю о́тче Григо́рие, и чти́м святу́ю па́мять твою́: ты бо мо́лиши за нас Христа́ Бо́га на́шего.
Псалом избранный.
1 Услы́шите сия́ вси язы́цы, внуши́те вси́, живу́щии по вселе́нней.
2 Уста́ моя́ возглаго́лют прему́дрость, и поуче́ние се́рдца моего́ ра́зум.
1 Прииди́те, ча́да, послу́шайте мене́, стра́ху Госпо́дню научу́ вас.
2 Благовести́х пра́вду в це́ркви вели́цей.
1 И́стину Твою́ и спасе́ние Твое́ рех.
2 Пове́м И́мя Твое́ бра́тии мое́й, посреде́ це́ркве воспою́ Тя.
1 Услы́шати ми глас хвалы́ Твоея́ и пове́дати вся чудеса́ Твоя́.
2 Го́споди, возлюби́х благоле́пие до́му Твоего́, и ме́сто селе́ния сла́вы Твоея́.
1 Возненави́дех це́рковь лука́внующих, и с нечести́выми не ся́ду.
2 Я́ко сохрани́х пути́ Госпо́дни и не нече́ствовах от Бо́га моего́.
1 Уста́ пра́веднаго поуча́тся прему́дрости, и язы́к его́ возглаго́лет суд.
2 Пра́вда Его́ пребыва́ет в век ве́ка.
1 Свяще́нницы Твои́ облеку́тся пра́вдою, и преподо́бнии Твои́ возра́дуются.
2 Блаже́ни живу́щии в дому́ Твое́м, в ве́ки веко́в восхва́лят Тя.
Сла́ва, и ны́не: Аллилу́иа, трижды.