Богосло́в вторы́й и таи́нник / Боже́ственнаго осия́ния, / и́же Тро́ицы све́тлый прописа́тель, / и́же о неизрече́ннем и Боже́ственнем естестве́ / преесте́ственно науча́я, Григо́рие, / и ны́не светле́е наслажда́яся Бо́га, / почита́ющих тя́ помина́й / и побо́рствуй о Це́ркви, / ю́же собра́л еси́: / твое́ бо веща́ние / во вся́ вселе́нныя изы́де концы́, / науча́я сла́вити / Тро́ицу Единосу́щную.
Возде́лав зе́млю язы́ком, богоглаго́ливе, / се́рдца бразда́м се́мя Боже́ственное, / богосло́вием обогати́л еси́ высоча́йшим / Це́ркве всю́ полноту́. / Те́мже пле́велы огне́м Ду́ха / ерети́ческий попали́л еси́, / филосо́фии боже́ственныя пита́емый раче́нием, / о́тче отце́в, и па́стырю па́стырей, / и сло́во ве́рных, / свяще́нников свети́льниче, / вселе́нныя сла́ва, / всеблаже́нне Григо́рие.
К прему́дрости ча́ши прибли́жив / честна́я твоя́ уста́, о́тче Григо́рие, / богосло́вия поче́рпл еси́ Боже́ственную во́ду / и ве́рным оби́льно препода́л еси́, / ересе́й загради́л еси́ тече́ние душегу́бное, / хуле́ния испо́лненное. / Ибо я́ко ко́рмчия тя́ обре́те Ду́х Святы́й, / отре́юща и отгоня́ща, / я́ко ве́тров дыха́ния, / злочести́вых стремле́ния, / во Еди́нице существа́ / Тро́ицу возвеща́юща.
Сла́ва, гла́с 1: Цевни́цу Ду́ха, ересе́й победи́теля и правосла́вных наслажде́ние, втора́го напе́рсника Сло́ва, самови́дца догма́том бы́вшаго, му́драго пастыренача́льника, церко́вныя пито́мцы, богосло́вными пе́сньми приреце́м: ты́ еси́ па́стырь до́брый, да́вый тебе́ сама́го, Григо́рие, я́ко Учи́тель Христо́с за ны́, и с Па́влом лику́еши и мо́лишися о душа́х на́ших.
И ны́не, Богоро́дичен: Святе́йшая святы́х все́х си́л, Честне́йшая всея́ тва́ри, Богоро́дице, Влады́чице мíра, спаси́ ны, Спа́са ро́ждшая, от прегреше́ний тмори́чных и бе́д, я́ко Блага́я, моли́твами Твои́ми.
Славосло́вие вели́кое, по Трисвятом тропарь свята́го, глас 1:
Па́стырская свире́ль богосло́вия твоего́ ри́торов победи́ трубы́, я́коже бо глубины́ Ду́ха изыска́вшу, и добро́ты веща́ния приложи́шася тебе́. Но моли́ Христа́ Бо́га, о́тче Григо́рие, спасти́ся душа́м на́шим.
Сла́ва, и ны́не, Богоро́дичен: Гаврии́лу веща́вшу Тебе́, Де́во, ра́дуйся, со гла́сом воплоща́шеся все́х Влады́ка в Тебе́, святе́м киво́те, я́коже рече́ пра́ведный Дави́д, яви́лася еси́ ши́ршая небе́с, поноси́вши Зижди́теля Твоего́: сла́ва Все́льшемуся в Тя́; сла́ва Проше́дшему из Тебе́; сла́ва Свободи́вшему на́с Рождество́м Твои́м.
Ектении́ и опту́ст.
На литургии
Блаже́нна от кано́на свята́го, пе́снь 3-я и 6-я.
Тропа́рь свята́го, глас 1:
Па́стырская свире́ль богосло́вия твоего́ ри́торов победи́ трубы́, я́коже бо глубины́ Ду́ха изыска́вшу, и добро́ты веща́ния приложи́шася тебе́. Но моли́ Христа́ Бо́га, о́тче Григо́рие, спасти́ся душа́м на́шим.
Конда́к свята́го, гла́с 3. Подо́бен: Де́ва дне́сь:
Богосло́вным язы́ком твои́м сплете́ния ри́торская разруши́вый, сла́вне, правосла́вия оде́ждею, свы́ше истка́нною, Це́рковь украси́л еси́, ю́же и нося́щи, с на́ми зове́т, твои́ми ча́ды: ра́дуйся, о́тче, богосло́вия у́ме кра́йнейший.
Проки́мен, гла́с 1: Уста́ моя́ возглаго́лют прему́дрость, / и поуче́ние се́рдца моего́ ра́зум.
Сти́х: Услы́шите сия́, вси́ язы́цы, внуши́те вси́, живу́щии по вселе́нней.
Апо́стол к Кори́нфяном, зача́ло 151 (1 Кор 12:7–11).
Бра́тие, кому́ждо дае́тся явле́ние Ду́ха на по́льзу. О́вому бо Ду́хом дае́тся сло́во прему́дрости, ино́му же сло́во ра́зума, о то́мже Ду́се, друго́му же ве́ра, те́мже Ду́хом, ино́му же дарова́ния исцеле́ний, о то́мже Ду́се. Друго́му же де́йствия сил, ино́му же проро́чество, друго́му же разсужде́ния духово́м, ино́му же ро́ди язы́ков, друго́му же сказа́ния язы́ков. Вся же сия́ де́йствует еди́н и то́йжде Дух, разделя́я вла́стию коему́ждо я́коже хо́щет.
Аллилу́ия, гла́с 2.
Стих: Внемли́те, лю́дие Мои́, зако́ну Моему́, приклони́те у́хо ва́ше во глаго́лы у́ст Мои́х.