Яко апо́столов единонра́внии и вселе́нныя учи́телие, Влады́ку все́х моли́те ми́р вселе́нней дарова́ти и душа́м на́шим ве́лию ми́лость. Два́жды.
Сла́ва, и ны́не, Богоро́дичен: Еже от ве́ка утае́нное, и а́нгелом несве́домое та́инство: Тобо́ю, Богоро́дице, су́щим на земли́ яви́ся, Бо́г в несли́тном соедине́нии воплоща́емь, и кре́ст во́лею на́с ра́ди восприи́м, и́мже воскреси́в первозда́ннаго, спасе́ от сме́рти ду́ши на́ша.
По 1-й кафи́сме седа́лен, гла́с 5. Подо́бен: Собезнача́льное:
Яко ца́рское украше́ние Це́ркве, Васи́лия вси́ восхва́лим, догма́тов сокро́вище неоскуде́емо, си́ми бо са́м наказа́ на́с Тро́ицу чествова́ти Святу́ю, соедине́ну у́бо Существо́м, разделе́ну же Ѵпоста́сьми.
Сла́ва, гла́с 4. Подо́бен: Ско́ро предвари́:
Свети́льницы пресве́тлии Це́ркве Христо́вы, мiр просвети́сте уче́ньми ва́шими, отцы́ богому́дрии, изсуши́вше е́реси все́х злосла́вных и угаси́вше пламенови́дная ху́льных смуще́ния. Те́мже, я́ко святи́телие Христо́вы, моли́теся спасти́ся на́м.
И ны́не, Богоро́дичен:
Де́во Всепе́тая, Ма́ти Христа́ Бо́га, Мари́е Богоневе́сто и Неискусобра́чная, ве́рных предста́тельство, изба́ви от вся́кия беды́ и вся́кия ну́жды, Влады́чице Богоро́дице, ве́рою и любо́вию покро́ву Твоему́ прибега́ющия, Еди́на Богоневе́стная.
По 2-й кафи́сме седа́лен, гла́с 3. Подо́бен: Боже́ственныя ве́ры:
Сто́лп бы́л еси́ Це́ркве, бога́тство некра́домое благоче́стия яви́лся еси́, богосло́ве Григо́рие, в безстра́стии осия́л еси́ житие́ твое́ и Тро́ическия изъясни́л еси́ догма́ты, о́тче преподо́бне, Христа́ Бо́га моли́ о спасе́нии ду́ш на́ших.
Сла́ва, гла́с 4. Подо́бен: Удиви́ся Ио́сиф:
Во цве́тнице писа́ний, я́коже пче́лы му́дрыя, прилета́юще, вы́ объя́сте до́бре, и от цвето́в изря́днейшая, и ме́д все́м ве́рным уче́ний ва́ших предста́висте вку́пе во всенаслажде́ние и́х, и сего́ ра́ди вся́к наслажда́яйся с весе́лием зове́т: предста́ните па́ки и по сме́рти и́же ва́с восхваля́ющим, блаже́ннии.
И ны́не, Богоро́дичен:
Треволне́нии страсте́й безсо́вестный а́з обурева́емь, Пречи́стая, призыва́ю Тя́ те́пле, да не пре́зриши мя́, окая́ннаго, поги́бнути, бе́здну ми́лости ро́ждшая: ра́зве бо Тебе́, ины́я наде́жды не и́мам. Да не у́бо враго́м обра́дование и сме́х, наде́явся на Тя́, явлю́ся, и́бо мо́жеши, ели́ка и хо́щеши, я́ко Ма́ти су́щи все́х Бо́га.
Полиелей и величание:
Велича́ем вас, святи́телие Христо́вы: Васи́лие Вели́кий, Григо́рие Богосло́ве и Иоа́нне Златоу́сте, и чтем па́мять ва́шу: вы бо мо́лите за нас Христа́ Бо́га на́шего.
Псалом избранный.
1 Услы́шите сия́ вси язы́цы, внуши́те вси́, живу́щии по вселе́нней.
2 Уста́ моя́ возглаго́лют прему́дрость, и поуче́ние се́рдца моего́ ра́зум.
1 Прииди́те, ча́да, послу́шайте мене́, стра́ху Госпо́дню научу́ вас.
2 Благовести́х пра́вду в це́ркви вели́цей.
1 И́стину Твою́ и спасе́ние Твое́ рех.
2 Пове́м И́мя Твое́ бра́тии мое́й, посреде́ це́ркве воспою́ Тя.
1 Услы́шати ми глас хвалы́ Твоея́ и пове́дати вся чудеса́ Твоя́.
2 Го́споди, возлюби́х благоле́пие до́му Твоего́, и ме́сто селе́ния сла́вы Твоея́.
1 Возненави́дех це́рковь лука́внующих, и с нечести́выми не ся́ду.
2 Я́ко сохрани́х пути́ Госпо́дни и не нече́ствовах от Бо́га моего́.
1 Уста́ пра́веднаго поуча́тся прему́дрости, и язы́к его́ возглаго́лет суд.
2 Пра́вда Его́ пребыва́ет в век ве́ка.
1 Свяще́нницы Твои́ облеку́тся пра́вдою, и преподо́бнии Твои́ возра́дуются.
2 Блаже́ни живу́щии в дому́ Твое́м, в ве́ки веко́в восхва́лят Тя.
Сла́ва, и ны́не: Аллилу́иа, трижды.
По полиеле́и седа́лен, гла́с 4. Подо́бен: Яви́лся еси́:
Прему́дрии учи́телие вселе́нныя, и́же Бо́га просла́вльшии де́лы и словесы́ на земли́, да возвели́чатся дне́сь, я́ко спасе́ния на́м су́ще хода́таи.
Сла́ва: Пра́зднует дне́сь Це́рковь честно́е торжество́ учи́телей трие́х, и́бо ти́и утверди́ша Це́рковь боже́ственными свои́ми догма́ты.
И ны́не, Богоро́дичен: Предста́тельнице необори́мая оскорбля́емых и те́плое заступле́ние упова́ющих на Тя́, от бе́д мя́ изба́ви: Ты́ бо еси́ все́х помо́щница.