Та́же степе́нна, 1-й антифо́н 4-го гла́са:
От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой.
Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.
Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.
Проки́мен, гла́с 4: Свяще́нницы Твои́ облеку́тся в пра́вду, / и преподо́бнии Твои́ возра́дуются.
Сти́х: Уста́ моя́ возглаго́лют прему́дрость, и поуче́ние се́рдца моего́ ра́зум.
Други́й проки́мен: Вся́кое дыха́ние / да хва́лит Го́спода.
Стих: Хвали́те Бо́га во святы́х Его́, хвали́те Его́ в утверже́нии си́лы Его́.
Ева́нгелие Иоа́нна, зача́ло 36 (Ин 10:9–16).
Рече́ Госпо́дь ко прише́дшим к Нему́ иуде́ем: Аз есмь дверь, Мно́ю а́ще кто вни́дет, спасе́тся, и вни́дет, и изы́дет, и па́жить обря́щет. Тать не прихо́дит, ра́зве да укра́дет, и убие́т, и погуби́т, Аз приидо́х, да живо́т и́мут и ли́шше и́мут. Аз есмь па́стырь до́брый, па́стырь до́брый ду́шу свою́ полага́ет за о́вцы. А нае́мник, и́же несть па́стырь, ему́же не суть о́вцы своя́, ви́дит во́лка гряду́ща и оставля́ет о́вцы, и бе́гает, и волк расхи́тит их, и распу́дит о́вцы. А нае́мник бежи́т, я́ко нае́мник есть и неради́т о овца́х. Аз есмь па́стырь до́брый, и зна́ю Моя́, и зна́ют Мя Моя́. Я́коже зна́ет Мя Оте́ц, и Аз зна́ю Отца́, и ду́шу Мою́ полага́ю за о́вцы. И и́ны о́вцы и́мам, я́же не суть от двора́ сего́, и ты́я Ми подоба́ет привести́, и глас Мой услы́шат, и бу́дет еди́но ста́до, и еди́н Па́стырь.
По 50-м псалме́:
Сла́ва: Моли́твами святи́телей Васи́лия Вели́каго, Григо́рия Богосло́ва и Иоа́нна Златоу́стаго, Ми́лостиве, очи́сти мно́жества согрешений на́ших.
И ны́не: Моли́твами Богоро́дицы, Ми́лостиве, очи́сти мно́жества согрешений на́ших.
И посем: Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х, очи́сти беззако́ние мое́.
Таже стихи́ра, гла́с 6: Излия́ся благода́ть во устна́х ва́ших, преподо́бнии отцы́, и бы́сте па́стырие Христо́вы Це́ркве, уча́ще слове́сныя о́вцы ве́ровати в Тро́ицу Единосу́щную во Еди́ном Божестве́.
Кано́н Богоро́дицы со ирмосо́м на 6, и святы́х два́ кано́на на 8.
Кано́н Богоро́дицы, Иоа́нна Евхаи́та. Гла́с 2.
Пе́снь 1
Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.
Припев: Пресвята́я Богоро́дице, спаси́ нас.
Благоче́стно Тя́, Чи́стую Богоро́дицу, и́стинно испове́дающаго, Пречи́стая, душе́ю и те́лом, от лю́тых бе́д, и неду́гов, и прегреше́ний Ты́ мя́ спаси́.
Всю́ в Тебе́ дарова́ний бе́здну лежа́щу уве́дехом, те́мже, прибега́юще, Богоро́дице, усе́рдно к покро́ву Твоему́ боже́ственному, спаса́емся.
О на́с, Тя́ пою́щих, Пречи́стая, моли́ Воплоще́ннаго из пречи́стых и честны́х Твои́х крове́й, изба́витися от прегреше́ний и боле́зней го́рьких.
Ин кано́н святы́х, его́же краегране́сие: Трисо́лнечнаго Све́та три́ возвыша́ю со́лнца. Творе́ние того́же Иоа́нна.
Ирмос тойже.
Припев: Святи́телие Васи́лие Вели́кий, Григóрие Богослóве, Иоáнне Златоýсте, моли́те Бо́га о на́с.
Ко́е благодаре́ние, ко́е противовоздая́ние, подоба́ющее на́шим, челове́цы, принесе́тся от на́с благоде́телем, и́миже ко е́же до́бре бы́ти наставля́емся?
Вити́йстии язы́цы, и хи́трости, и кова́рства, и вся́ слове́с си́ла ны́не в вину́ да сподви́гнутся еди́ну и, честву́юще взаи́м, да почту́т.
Сво́йственнаго у́бо и́м не терпя́ху, дабы́ что́ стяжа́ти на земли́, небому́дреннии, храни́телие же яви́шася о́бщества и предста́телие, о́бщих у́бо и похва́л да сподо́бятся.
Богоро́дичен: Тя́, о́бщее любоче́стие, Всенепоро́чная, на́шего естества́, вси́ сла́вим, уста́ еди́ны бы́вше и еди́но согла́сие соверши́вше.
Други́й кано́н святы́х. Творе́ние того́жде, гла́с 8.
Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.