Припев: Святи́телие Васи́лие Вели́кий, Григóрие Богослóве, Иоáнне Златоýсте, моли́те Бо́га о на́с.
Не челове́ческаго тща́ния исправле́ние сие́ начина́ние, но Твоему́ престо́лу приседя́щая, Человеколю́бче, Прему́дрость да споспешеству́ет ми́, сло́ва благода́ть даю́щи, е́юже просла́вити возмогу́, и́хже сама́ до́бре предпросла́ви.
Якоже ча́ша, преисполня́ется, Влады́ко, благода́ть Твоя́, и мно́гое бога́тство человеколю́бия Твоего́ излия́ется и потече́, я́коже и и́ны а́нгелы в соста́ве пло́ти показа́ти, ны́не предлежа́щия в похвалу́.
Слава: С небесе́ небе́сным подоба́ше бы́ти и похвала́м, а́нгельское пе́ние, боже́ственным прили́чное: бо́зи бо прича́стием, и́же естество́м и Еди́наго и́стиннаго Бо́га иму́ще в себе́, живу́ща и веща́юща.
И ныне, Богоро́дичен: Па́мять преподо́бных богому́дрое сосло́вие с похвала́ми соверша́ет, с ни́миже и Бо́жия Ма́терь, я́ко те́х глава́, в ле́поту спрославля́ется, коне́чный, и пе́рвый, и сре́дний чи́н содержа́щи и благохвале́ния причаща́ющися.
Катава́сия: Су́шу глубороди́тельную зе́млю / со́лнце наше́ствова иногда́: / я́ко стена́ бо, огусте́ обапо́лы вода́ / лю́дем пешомореходя́щим и Богоуго́дно пою́щим: / пои́м, Го́сподеви, сла́вно бо просла́вися.
Пе́снь 3
Ирмо́с: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.
Припев: Пресвята́я Богоро́дице, спаси́ нас.
Моли́твами Твои́ми, Чи́стая, Бо́га, Его́же родила́ еси́, пода́ждь благопремене́нна Твои́м рабо́м, притека́ющим к покро́ву Твоему́ и ве́рно покланя́ющимся Твоему́ Рождеству́.
Всю́ мою́ жи́знь окорми́, Де́во, упова́ние мое́ и Предста́тельнице, искуше́ний и обстоя́ний избавля́ющи лю́тых мя́, Присноде́во.
Прему́дрость Бо́жию Ѵпоста́сную на объя́тиих я́ко поне́сши, Богоро́дице, от неве́дения и заблужде́ния изба́витися пою́щим Тя́ моли́.
Ин. Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.
Припев: Святи́телие Васи́лие Вели́кий, Григóрие Богослóве, Иоáнне Златоýсте, моли́те Бо́га о на́с.
Труба́ вели́кая Це́ркве, свети́льник, просвеща́яй вселе́нную, пропове́дник, веща́нием объе́мляй вся́ концы́, великоимени́тый Васи́лий сподвиза́ет собра́ние сие́.
Све́тел от жития́ и веще́й, све́тел от слове́с и уче́ний, во все́х пресиява́я па́че все́х, я́коже друго́е па́че зве́зд со́лнце, многопе́тый Богосло́в дне́сь блажи́тся.
Се́ све́т мíра мíру све́тит, се́ земли́ со́ль зе́млю услажда́ет, се́ дре́во жи́зни безсме́ртия плоды́ предлага́ет, Златоу́стый святы́й. Иже умре́ти не хотя́щии, прииди́те, наслажда́йтеся.
Богоро́дичен: Вся́ от небытия́ в бытие́ Сотвори́вый и естество́ Да́вый коему́ждо бы́вших, То́йже и да́нная естества́ прелага́ти ве́сть, я́коже хо́щет. Отону́дуже и слы́шимо е́сть, я́ко и Де́ва ро́ждши, кто́ не удиви́тся?
Ин. Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.
Припев: Святи́телие Васи́лие Вели́кий, Григóрие Богослóве, Иоáнне Златоýсте, моли́те Бо́га о на́с.
Иже нра́вов испра́вителие и ду́ш строи́телие, спаси́телие о́бщии все́х, и́же и дея́ний на́м и слове́с о́бразы показа́вше, наказа́телие жития́ све́тлии, све́тле да восхва́лятся.
Ду́х Бо́жий испо́лни Васи́лия худо́жества; о́гненных же имя́ше язы́ков еди́н Григо́рий и огне́м высокоре́чия дхне́; Христо́ва же уста́ во Иоа́нне глаго́лаху.
Слава: Ны́нешняго ве́ка му́дрость бу́йство про́поведи я́ве упражня́емую и́мать, повину́ющуюся ему́ и ра́бски служа́щую: пропове́дники бо благода́ть му́дрыя предлага́ет ри́торы.
И ныне, Богоро́дичен: Во утро́бе Чи́стыя Де́вы Всели́выйся, ду́ши богоно́сных святы́х жили́ще твори́т и о́ных устна́ми е́же о Ма́тери сказу́ет та́инство.
Катава́сия: Утвержде́ние на Тя наде́ющихся, / утверди́, Го́споди, Це́рковь, / Ю́же стяжа́л еси́ / честно́ю Твое́ю Кро́вию.