Седа́лен, гла́с 8. Подо́бен: Прему́дрости:
Вели́кия свети́льники светоза́рныя, Це́ркве столпы́ неразори́мыя согла́сно да восхва́лим, и́же до́брых наслажда́ющиися и слове́с те́х, ку́пно и благода́ти: прему́драго Златоглаго́лива и Вели́каго Васи́лия с Григо́рием све́тлым Богосло́вом. К ни́мже и возопии́м, от се́рдца зову́ще: святи́телие тревелич́айшии, моли́теся Христу́ Бо́гу прегреше́ний оставле́ние дарова́ти пра́зднующим любо́вию святу́ю па́мять ва́шу.
Сла́ва: Прему́дрость прие́мше от Бо́га, я́ко апо́столы ини́и трие́ Христо́вы, сло́вом ра́зума составля́ете догма́ты, я́же пре́жде словесы́ просты́ми низлага́ху, ры́барие в ра́зуме си́лою Ду́ха, подоба́ше бо та́ко про́стей на́шей ве́ре составле́ние стяжа́ти. Отню́дуже вси́ вопие́м ва́м: моли́теся Христу́ Бо́гу прегреше́ний оставле́ние дарова́ти пра́зднующим любо́вию святу́ю па́мять ва́шу.
И ны́не, Богоро́дичен: Ду́шу мою́, Де́во, смире́нную, бу́рею жития́ искуше́ний ны́не я́ко кроме́ управле́ния бы́вшую, потопля́емую волна́ми, грехо́в бре́менем я́вльшуся преиспо́лнену и во дно́ а́дово приити́ бе́дствующу, предвари́, Богоро́дице, моли́тв Твои́х ми́лостию, тишину́ подаю́щи и бе́д изыма́ющи. Приста́нище бо Ты́ еси́ небу́рное, моля́щися Сы́ну Твоему́ и Бо́гу прегреше́ний оставле́ние дарова́ти ми́: Тя́ бо и́мам наде́жду, недосто́йный ра́б Тво́й.
Пе́снь 4
Ирмо́с: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.
Припев: Пресвята́я Богоро́дице, спаси́ нас.
Язв мои́х душе́вных, Влады́чице, и плотски́х неду́гов, Бо́га ро́ждшая, разреше́ние пода́ждь ми́.
От обстоя́ния изба́ви мя́, Ма́ти Бо́жия, и бу́ри, и бе́д Твои́ми моли́твами, Еди́на Всепе́тая.
Обурева́ема волна́ми жите́йскими исхи́ти, Де́во, ко Твоему́ приста́нищу наставля́ющи мя́.
Ин. Ирмо́с: Прише́л еси́ от Де́вы не хода́тай, ни а́нгел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.
Припев: Святи́телие Васи́лие Вели́кий, Григóрие Богослóве, Иоáнне Златоýсте, моли́те Бо́га о на́с.
Разу́мливы от ни́жния му́дрости бы́вше, правле́ние, пресла́внии, от Боже́ственныя стяжа́сте, те́мже, я́ко рабы́ню, сию́ о́ной всему́дре покори́сте.
Любому́дрии, му́дрыя а́ще лю́бите, умудри́теся и глаго́лати научи́теся вси́, и́же словесе́м чудя́щиися, дея́ния опа́сству и виде́ния отту́ду обуча́ющеся.
Богоро́дичен: Яко по́зден до́ждь, напоследи́ бы́вый, у́тренний, во́д и веко́в Соде́тель, во чре́во Твое́ ука́нув, Всенепоро́чная, во вре́мя прохлажда́яй оскудева́ющия.
Ин. Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.
Припев: Святи́телие Васи́лие Вели́кий, Григóрие Богослóве, Иоáнне Златоýсте, моли́те Бо́га о на́с.
Сто́лп о́гнен, лю́дем ве́рным предваря́ющий и опаля́ющий враги́ ве́ры, племена́ же спаса́яй, изве́стно после́дующия, вели́кий яви́ся Васи́лий, да дерза́ет и побежда́ет Христо́ва Це́рковь, толи́ким обогати́вшися побо́рником.
Язы́ка сла́дость и слу́ха вся́каго услажде́ние, твое́ сло́во бы́сть, Григо́рие, ма́нна жи́зни, роса́ сла́дкости, ме́д, и́же из ка́мене, а́нгельский хле́б небе́сный, несы́тно насыща́тися услажде́ния его́ увещева́я и исполня́яй сла́дости причаща́ющияся.
Слава: Река́ дарова́ний духо́вных напо́лнися да́же и до разли́тия, и до́брое лице́ земли́, я́ко сла́достный пото́к, от златы́х напая́ет у́ст, веселя́щи и утучня́ющи Христо́в вся́кий гра́д Боже́ственных во́лн струя́ми.
И ныне, Богоро́дичен: Естество́, про́сто стерпе́вшее сложе́нию и я́вльшееся вы́шше сли́тия в Твое́м, Влады́чице, Сы́не, трие́ богоно́снии учи́телие испове́даша, от двою́ во́лю и сугу́баго де́йства, сугу́ба по естеству́ пропове́давше.
Катава́сия: Покры́ла е́сть небеса́ доброде́тель Твоя́, Христе́, из Киво́та бо проше́д святы́ни, Твоея́ Нетле́нныя Ма́тере, в хра́ме Сла́вы Твоея́ яви́лся еси́, я́ко Младе́нец руконоси́мь, и испо́лнишася вся́ Твоего́ хвале́ния.
Пе́снь 5
Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.