На 9-й пе́сни Честне́йшую не пое́м, но пое́м припе́в:
Велича́й, душе́ моя́, Честне́йшую небе́сных во́инств, Де́ву Пречи́стую Богоро́дицу.
Та́же ирмо́с. Посе́м то́йже припе́в пое́м и к про́чим Богоро́дичным тропаре́м.
Пе́снь 9
Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.
Припев: Велича́й, душе моя́, Честне́йшую небе́сных во́инств, Де́ву Пречи́стую Богоро́дицу.
Богоблаже́нная Отрокови́це, наде́жду мою́ всю́ усе́рдно возлага́ю на Тя́: спаси́ мя, Ма́ти и́стинныя Жи́зни, и сла́дости присносу́щныя насы́титися моли́, Чи́стая, ве́рою и любо́вию Тя́ пе́сньми велича́юща.
Явльшися, Де́во, две́рь Боже́ственнаго Све́та, души́ моея́ мра́к Све́та Твоего́ невеще́ственными блиста́нии озари́ и ве́чнаго огня́ изба́витися мне́ умоли́, Чи́стая, ве́рою и любо́вию Тя́ пе́сньми велича́ющему.
Во чре́во Твое́ всели́ся, Его́же из чре́ва пре́жде веко́в Оте́ц роди́ Сы́на, соверше́н бы́сть Челове́к, и исто́чник дарова́ний Тя́, Богома́ти, показа́ на́м, ве́рно покланя́ющимся несказа́нному Твоему́ Рождеству́.
Ин. Ирмо́с: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.
К кано́ном же святы́х на ки́йждо тропа́рь пое́м припе́вы си́и:
Припев: Велича́й, душе́ моя́, во иера́рсех свети́ла три́ вели́кая.
Се́ ва́ше де́лание и па́ства, за ю́же велича́йшия боле́зни претерпе́сте, во еди́но соше́дшеся, ку́пно же три́ вы́ соприе́мше, о́бщую и́мать похвалу́ ва́ше сладча́йшее соедине́ние.
Припев: Велича́й, душе́ моя́, трисия́тельныя Христо́вы Це́ркве.
Не обоюдоо́стрый ме́чь благода́ть, но трео́стрый на ра́тников тоя́ предлага́ет: еди́н небокова́нен ме́чь, треми́ крепостьми́ изощре́н, при́сно побо́рствуяй по Трисия́нном Еди́ном Божестве́.
Припев: Велича́й, душе́ моя́, просвеща́ющия Христо́ву Це́рковь.
Ва́ше жи́тельство на небесе́х бя́ше, пресла́внии, и пло́ть нося́щих во ве́ки нескве́рну, в ни́хже всесоверше́нне ны́не живу́ще, су́щим на земли́ на́м пребыва́ющим вы́шняя моли́те и мы́слити, и де́яти.
Припев: Велича́й, душе моя́, Честне́йшую небе́сных во́инств, Де́ву Пречи́стую Богоро́дицу.
Богоро́дичен: Тесни́т мя́ широта́ Твои́х вели́чий, Влады́чице, подавля́ющи сло́во от ча́стости, и пресла́вно ми́ случа́ется е́же недоумева́тися от благомо́щества, те́мже толи́ко Тя́ Возвели́чившаго сла́вим.
Ин. Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.
Припев: Велича́й, душе́ моя́, Пресвяты́я Тро́ицы три́ па́стыри.
Возвы́сися Тро́ичная доброде́тель и вся́ческая сла́вы испо́лни, ину́ю лучу́ на́м возсия́вши трисве́тлу, я́ко свое́ осия́ние, небе́сныя тайноводи́тели, и́миже на Боже́ственное о́ныя виде́ние, благоче́ствующе, наставля́емся.
Припев: Велича́й, душе́ моя́, от Трисо́лнечнаго Свети́ла три́ вели́кая.
Не е́сть вто́рство в трие́х си́х, старе́йшинства бо ки́йждо и́х но́сит, пе́рвый не сы́й, и единочестны́я превышша́я: присвоя́ют же па́че дру́г дру́га побе́ду прера́достно, не вмеща́ется бо зде́ за́висти де́рзость, растлева́ющия единомы́слие.
Припев: Велича́й, душе́ моя́, Триипоста́снаго и Неразде́льнаго Божества́ держа́ву.
Отце́в благоче́стие, своя́ перворо́дныя сы́ны показа́вшее, ча́да возражда́ет све́ту при́сная и непоро́чная те́ми, соверша́емая Ду́хом, жи́знь глаго́лавшим в ни́х, и це́л соблюда́ти испроша́ет до конца́ ми́р, его́же от ни́х насле́дствова.
Припев: Велича́й, душе́ моя́, Честне́йшую небе́сных во́инств, Де́ву Пречи́стую Богоро́дицу.
Сы́на Бо́га жива́го му́дрых учи́телей ве́рх пропове́да, Твоего́ Сы́на, от открове́ния Отча, не от пло́ти и кро́ве сие́ тайноуве́дав, Ма́ти Бо́жия. Те́мже Тя́ и Де́ву просла́вив, Ма́терь и Богоро́дицу возвели́чи.