Таже, Да испра́вится моли́тва моя́: И поклоны 3 великия, и прочее преждесвященных.
Аще же несть преждесвященных. На Го́споди, воззва́х: стихиры подобны 3, в Триоди, и праздника 5. Сла́ва, и ны́не: По́слан бысть: Вход. Прокимен. И чтения дне и праздника 3. Таже Сподо́би, Го́споди: На стиховне Триоди самогласен дне, дважды, и мученичен. Сла́ва, и ны́не: Днесь ра́дость: По Ны́не отпуща́еши: тропарь праздника, ектения и 3 поклоны великия, и отпуст. На трапезе же разрешаем на вино и елей, в кийлибо день случится, во славу Пресвятыя Богородицы.
Потреба есть ведати, яко аще случится Благовещение в которую субботу поста:
Чтутся чтения прежде дне и по сих праздника 5: 1. Вни́де Моисе́й: 2. Госпо́дь созда́ мя: 3. Изы́де Иа́ков: 4. Бу́дет от дне осма́го: 5. Прему́дрость созда́ Себе́ дом: Подобне чтутся чтений праздника 5, аще Благовещение случится и в неделю. Аще ли есть пост, чтутся вечер, три преждеписанныя, а на литургии две сия:
Исхода чтение (глава 3).
Вниде Моисей в го́ру Бо́жию Хори́в. Яви́ся же ему́ а́нгел Госпо́день в пла́мени о́гненне из купины́: и ви́дит, я́ко купина́ гори́т огне́м, купина́ же не сгара́ше. Рече́ же Моисе́й: мимоше́д уви́жду виде́ние вели́кое сие́, я́ко не сгара́ет купина́. Егда́ же ви́де Госпо́дь, я́ко приступа́ет ви́дети, воззва́ его́ Госпо́дь из купины́, глаго́ля: Моисе́е, Моисе́е. О́н же рече́: что́ есть, Го́споди? О́н же рече́: не приближа́йся се́мо: изу́й сапоги́ от но́г твои́х: ме́сто бо, на не́мже ты́ стои́ши, земля́ свя́та́ е́сть. И рече́ ему́: А́з е́смь Бо́г отца́ твоего́, Бо́г Авраа́мов и Бо́г Исаа́ков и Бо́г Иа́ковль. Отврати́ же Моисе́й лице́ свое́: благогове́яше бо воззре́ти пред Бо́га. Рече́ же Госпо́дь к Моисе́ю: ви́дя ви́дех озлобле́ние люде́й Мои́х, и́же во Еги́пте, и во́пль и́х услы́шах от де́л приста́вников: уве́дех бо боле́знь и́х, и снидо́х изъя́ти и́х от руку́ Еги́петску, и извести́ я́ из земли́ тоя́, и ввести́ и́х в зе́млю бла́гу и мно́гу, в зе́млю кипя́щую млеко́м и ме́дом.
Притчей чтение (глава 8).
Госпо́дь созда́ мя нача́ло пути́й свои́х в дела́ своя́, пре́жде ве́к основа́ мя, в нача́ле, пре́жде не́же зе́млю сотвори́ти, и пре́жде не́же бе́здны соде́лати, пре́жде не́же произы́ти исто́чником во́д, пре́жде не́же гора́м водрузи́тися, пре́жде же все́х холмо́в ражда́ет мя́. Госпо́дь сотвори́ страны́ и ненаселе́нныя, и концы́ населе́нныя поднебе́сныя. Егда́ гото́вяше не́бо, с ни́м бе́х, и егда́ отлуча́ше престо́л сво́й на ве́трех, и егда́ кре́пки творя́ше вы́шния о́блаки, и егда́ тве́рды полага́ше исто́чники поднебе́сныя, и егда́ полага́ше мо́рю преде́л его́, да во́ды не ми́мо и́дут у́ст его́, и кре́пка творя́ше основа́ния земли́, бе́х при не́м устроя́ющи. А́з бе́х, о не́йже ра́довашеся, на вся́к же де́нь веселя́хся пред лице́м его́ на вся́ко вре́мя.
Повечерие великое
При часе же 1-м нощи ударяет в великий кампан довольно и потом во вся. И, собравшеся во храм, благословившу иерею, и кадящу, поем повечерие великое, и С на́ми Бог: с пением, на глас 8, на оба лика. И обычныя тропари: День преше́д:
По 1-м Трисвятом тропарь праздника, глас 4:
Днесь спасе́ния на́шего глави́зна / и е́же от ве́ка та́инства явле́ние: / Сын Бо́жий, Сын Де́вы быва́ет, / и Гаврии́л благода́ть благовеству́ет. / Те́мже и мы с ним Богоро́дице возопии́м: / ра́дуйся, Благода́тная, / Госпо́дь с Тобо́ю.
По 2-м Трисвятом кондак праздника, глас 8:
Взбра́нной Воево́де победи́тельная, / я́ко изба́вльшеся от злых, / благода́рственная воспису́ем Ти, раби́ Твои́, Богоро́дице, / но, я́ко иму́щая держа́ву непобеди́мую, / от вся́ких нас бед свободи́, да зове́м Ти: / ра́дуйся, Неве́сто Неневе́стная.