Припев: Пресвята́я Богоро́дице, спаси́ нас.
Богоро́дица рече́: Ум всяк побежда́ется земны́х, отвеща́ Деви́ца, / и́щущи, я́же Мне веща́еши, пресла́вная: / слы́шах твоя́ словеса́, но бою́ся, ужаса́ющися, / да не ле́стию Мя, я́ко Е́ву, дале́че по́слеши от Бо́га. / Но оба́че се вопию́: / благослови́те, вся дела́ Госпо́дня, Го́спода и превозноси́те Его́ во ве́ки.
А́нгел возопи́: Се Тебе́ недоуме́нное разреши́ся, глаго́лет к сим Гаврии́л, до́бре бо рекла́, еси́, вещь неудобопости́жна. / Словесе́м Твои́х усте́н повину́ющися про́чее, / не сумни́ся, я́ко ле́сти, я́коже ве́щи, ве́руй. / Аз бо, ра́дуяся, вопию́: / благослови́те, вся дела́ Госпо́дня, Го́спода и превозноси́те Его́ во ве́ки.
Богоро́дица рече́: Зако́н сей от Бо́га есть челове́ком, Непоро́чная а́бие глаго́лет, / от о́бщия любве́ рождество́ происхо́дит. / Не вем супру́жника сла́сти всеконе́чно, / ка́ко, у́бо глаго́леши, я́ко рожду́? / Бою́ся, еда́ лесть глаго́леши? / Но оба́че се вопию́: / благослови́те, вся дела́ Госпо́дня, Го́спода и превозноси́те Его́ во ве́ки.
Благослови́м Отца́ и Сы́на и Свята́го Ду́ха, Го́спода.
А́нгел возопи́: Глаго́лы, я́же мне веща́еши, Чи́стая, / А́нгел па́ки глаго́лет, / обы́чая есть рождества́ челове́ков сме́ртных, / и́стинно Бо́га Тебе́ обещава́ю, / па́че сло́ва же и смы́сла воплоща́ема, я́ко весть, из Тебе́. / Те́мже и, ра́дуяся, вопию́: / благослови́те, вся дела́ Госпо́дня, Го́спода и превозноси́те Его́ во ве́ки.
И ныне: Богоро́дица рече́: Явля́ешися Мне и́стины веща́тель, рече́ Де́ва, / ра́дости бо о́бщия прише́л еси́ благове́стник. / Ду́шу у́бо очи́стих с те́лом, и по глаго́лу твоему́ бу́ди Мне, / да всели́тся Бог в Мя, к Нему́же вопию́ с тобо́ю: / благослови́те, вся дела́ Госпо́дня, Го́спода и превозноси́те Его́ во ве́ки.
Хва́лим, благослови́м, покланя́емся Го́сподеви,/ пою́ще и превознося́ще во вся ве́ки.
Катавасия: Слы́ши, Отрокови́це, Де́во чи́стая, / да рече́т у́бо Гаврии́л / сове́т Вы́шняго дре́вний и́стинный: / бу́ди к прия́тию гото́ва Бо́жию, / Тобо́ю бо Невмести́мый с челове́ки поживе́. / Тем и, ра́дуяся вопию́: / благослови́те, вся дела́ Госпо́дня, Го́спода.
На 9-й песни паки вжигают свещи братия. Честне́йшую: не поем, но поем припев праздника:
Благовеству́й, земле́, ра́дость ве́лию, / хвали́те, Небеса́, Бо́жию сла́ву.
Таже ирмос: Я́ко одушевле́нному: Подобне и 2-й лик припев, и ирмос, и к прочим тропарем праздника тойже припев.
У трипеснца же к тропарем припеваем: Сла́ва Тебе́, Бо́же наш, сла́ва Тебе́. К Богородичным припеваем припев праздника.
Песнь 9
Благовеству́й, земле́, ра́дость ве́лию, / хвали́те, Небеса́, Бо́жию сла́ву.
Ирмос: Я́ко одушевле́нному Бо́жию киво́ту, / да ника́коже ко́снется рука́ скве́рных. / Устне́ же ве́рных, Богоро́дице, немо́лчно, / глас А́нгела воспева́юще, / с ра́достию да вопию́т: / ра́дуйся, Благода́тная, / Госпо́дь с Тобо́ю.
Благовеству́й, земле́, ра́дость ве́лию, / хвали́те, Небеса́, Бо́жию сла́ву.
Па́че смы́сла заче́нши Бо́га, естества́ обы́чая утаи́ся, Отрокови́це, / Ты бо в рождестве́ ма́терскаго избежа́ла еси́ тле́ннаго естества́ / и превы́шши су́щи. / Те́мже досто́йно слы́шиши: / ра́дуйся, Благода́тная, Госпо́дь с Тобо́ю.
Благовеству́й, земле́, ра́дость ве́лию, / хвали́те, Небеса́, Бо́жию сла́ву.
Ка́ко то́чиши млеко́, Де́во Чи́стая, не мо́жет изрещи́ язы́к зе́млен, / стра́нну бо естества́ показу́еши вещь, зако́ннаго рождества́ уста́в прехо́диши. / Те́мже досто́йно слы́шиши: / ра́дуйся, Благода́тная, Госпо́дь с Тобо́ю.
Благовеству́й, земле́, ра́дость ве́лию, / хвали́те, Небеса́, Бо́жию сла́ву.
Та́йно во свяще́нных писа́ниих / глаго́лася о Тебе́, Ма́ти Вы́шняго, / ле́ствицу бо дре́вле Иа́ков, Тя образу́ющую, ви́дев, рече́: / степе́нь Бо́жия сия́. / Те́мже досто́йно слы́шиши: / ра́дуйся, Благода́тная, Госпо́дь с Тобо́ю.
Благовеству́й, земле́, ра́дость ве́лию, / хвали́те, Небеса́, Бо́жию сла́ву.
Чу́дное священноявле́нному Моисе́ю / купина́ и огнь показа́ чу́до, / ища́й же конца́ в прехожде́нии време́н, во Отрокови́це чи́стей, рече́, узрю́. / Е́йже, я́ко Богоро́дице, да рече́тся: / ра́дуйся, Благода́тная, Госпо́дь с Тобо́ю.