Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.
Проки́мен, глас 4: Го́споди, откры́й о́чи мои́, / и уразуме́ю чудеса́ от зако́на Твоего́.
Стих: Отврати́ о́чи мой, е́же не ви́дети суеты́, в пути́ Твое́м живи́ мя.
Други́й проки́мен: Вся́кое дыха́ние / да хва́лит Го́спода.
Стих: Хвали́те Бо́га во святы́х Его́, хвали́те Его́ в утверже́нии си́лы Его́.
Ева́нгелие от Матфе́я, зача́ло 104 (Мф 25:1–13).
Рече́ Госпо́дь при́тчу сию́: уподо́бися Ца́рствие Небе́сное десяти́м де́вам, я́же прия́ша свети́льники своя́ и изыдо́ша в сре́тение жениху́, пять же бе от них мудры́ и пять юро́дивы. Юро́дивыя же, прие́мше свети́льники своя́, не взя́ша с собо́ю еле́а, му́дрыя же прия́ша еле́й в сосу́дех со свети́льники свои́ми, косня́щу же жениху́, воздрема́шася вся и спа́ху. Полу́нощи же вопль бысть: се жени́х гряде́т, исходи́те в сре́тение его́. Тогда́ воста́вше вся де́вы ты́я и украси́ша свети́льники своя́. Юро́дивыя же му́дрым ре́ша: дади́те нам от еле́а ва́шего, я́ко свети́льницы на́ши угаса́ют. Отвеща́ша же му́дрыя, глаго́люще: еда́ ка́ко не доста́нет нам и вам, иди́те же па́че к продаю́щым и купи́те себе́. Иду́щым же им купи́ти, прии́де жени́х, и гото́выя внидо́ша с ним на бра́ки, и затворе́ны бы́ша две́ри. Последи́ же приидо́ша и про́чыя де́вы, глаго́люще: Го́споди, Го́споди, отве́рзи нам. Он же отвеща́в рече́ им: ами́нь глаго́лю вам, не вем вас. Бди́те у́бо, я́ко не ве́сте дне ни часа́, во́ньже Сын Челове́ческий прии́дет.
По 50-м псалме́.
Сла́ва: Моли́твами блаже́нной ста́рицы Матро́ны, / Ми́лостиве, очи́сти / мно́жества согреше́ний на́ших.
И ны́не: Моли́твами Богоро́дицы, / Ми́лостиве, очи́сти / мно́жества согреше́ний на́ших.
Та́же, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.
И стихи́ра, глас 6: Свята́я сла́вная ста́рице Матро́но, / гра́да Москвы́ похвало́ / и Руси́ святы́я моли́твеннице, / в многоразли́чных ну́ждах нам помози́, / коему́ждо поле́зная да́рующи / во спасе́ние душ на́ших.
Кано́н пра́здника или́ Богоро́дицы на 6 и святы́я на 8.
Кано́н святы́я, глас 8.
Песнь 1
Ирмо́с: Во́ду проше́д, я́ко су́шу, / и еги́петскаго зла избежа́в, / изра́ильтянин вопия́ше: / Изба́вителю и Бо́гу на́шему пои́м.
Припе́в: Свята́я блаже́нная ма́ти Матро́но, моли́ Бо́га о на́с!
Бо́же Всеми́лостиве, сподо́би ны, недосто́йныя, / воспе́ти уго́дницу Твою́ Матро́ну, / на́шу изря́дную пред Тобо́ю хода́таицу и моли́твенницу.
Любо́вию ко Христу́ от младе́нческих пеле́н уязви́лася еси́ / и Тому́ неле́ностно в житии́ твое́м служи́ла еси́, ма́ти блаже́нная.
Слава: Избра́нный сосу́д Ду́ха Свята́го яви́лася еси́, / благода́ть бо Бо́жию от святы́я купе́ли до конца́ дний твои́х / при́сно усе́рдно возгрева́ла еси́, ма́ти блаже́нная.
И ныне, Богоро́дичен: Арха́нгельски пе́снь Тебе́ пое́м, Чи́стая: / ра́дуйся, Обра́дованная, Мари́е, Ма́ти Христа́ Бо́га, / при́сно моля́щаяся за род наш.
Катава́сия пра́здника.
Песнь 3
Ирмо́с: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, / Еди́не Человеколю́бче.
Припе́в: Свята́я блаже́нная ма́ти Матро́но, моли́ Бо́га о на́с!
Житие́м богоуго́дным и пра́ведным освяти́лася еси́, ма́ти блаже́нная, / те́мже и нам, с ве́рою к тебе́ прибега́ющим, / помози́ благода́ти Бо́жия испо́лнимся.
Христа́ Человеколю́бца, Его́же от ю́ности твое́я возлюби́ла еси́, ма́ти свята́я, / моли́ утверди́тися нам на ка́мени за́поведей Его́.
Слава: Це́ркве Зижди́тель Госпо́дь / светообра́зное ча́до церко́вное соде́ла тя, пра́ведная ма́ти, / и в любви́ Свое́й утверди́ тя, я́ко Человеколю́бец.
И ныне, Богоро́дичен: Небеси́ и земли́ Цари́це, Богоро́дице Де́во, / и Це́ркве покро́ве всемо́щный, / утверди́ оби́тель сию́ непоколеби́мо во благоче́стии пребыва́ти.