И ныне, Богоро́дичен: Жезл Ааро́нов прозя́бший, / и́же от Иессе́я прообража́ше изра́стший ко́рень, Тя, Пречи́стую, / цвет мíру возсия́вшую, Бо́га воплоще́нна, / Его́же о нас моля́щи не преста́й, Присноде́во, / прибега́ющих к Тебе́.
Катава́сия: Воскресе́ния день, / просвети́мся, лю́дие. / Па́сха, Госпо́дня Па́сха, / от сме́рти бо к жи́зни, / и от земли́ к небеси́, / Христо́с Бог нас преведе́, / побе́дную пою́щия.
Песнь 3
Ирмо́с: Процвела́ е́сть пусты́ня, я́ко крин, Го́споди, / язы́ческая неплодя́щая Це́рковь, / прише́ствием Твои́м, / в не́йже утверди́ся мое́ се́рдце.
Припев: Святы́й великому́чениче и победоно́сче Гео́ргие, моли́ Бо́га о на́с.
Венце́м страда́ния сия́я, сла́вне, / благоче́стно призыва́ющий тя моли́ Изба́вителя и Бо́га / от вся́кия ну́жды, блаже́нне, изба́вити.
Бога́тыми просвеща́емь сия́нии, прему́дре, / мра́чную отжени́ печа́ль и мглу страсте́й от нас, / ве́рою восхваля́ющих тя.
Наде́ждею утвержда́емь и любо́вию, / ве́рою же огра́ждься, Гео́ргие, и си́лою укре́плься Христо́вою, / и́дольскую пре́лесть низве́ргл еси́.
Богоро́дичен: Просве́щшаго концы́, Пречи́стая, родила́ еси́ с пло́тию Безпло́тнаго / и пре́жде всех Отцу́ Собезнача́льна, / те́мже Тя, Богоро́дицу, ве́рнии, чтим.
Ин. Ирмо́с: Я́ко непло́ды, роди́ от язы́к Це́рковь, / и мно́гое в ча́дех изнемо́же со́нмище, / чу́дному Бо́гу на́шему возопии́м: / Свят еси́, Го́споди.
Припев: Святы́й великому́чениче и победоно́сче Гео́ргие, моли́ Бо́га о на́с.
Ти́хо разда́л еси́ ни́щим бога́тство / и, умасти́вся еле́ем любве́, / те́лом и душе́ю страда́льчески, Гео́ргие, мучи́теля вку́пе победи́л еси́.
Слава: Утверди́вся благода́тию и огне́м распала́емь ре́вности, / не вопроша́ющим яви́лся еси́, обре́лся еси́ не и́щущим, / по Христе́, Гео́ргие, гне́ваяся на ле́сть и́дольскую.
И ныне, Богоро́дичен: Я́ко но́сиши на ру́ку, Мари́е, / и от сосцу́ пита́еши пита́ющаго вся́кое дыха́ние, / Его́же, Богоро́дице, чту́ще, пропове́даем. / Моли́ся Ему́, Чи́стая, о всех нас.
Катава́сия: Прииди́те, пи́во пие́м но́вое, / не от ка́мене непло́дна чудоде́емое, / но нетле́ния исто́чник / из гро́ба одожди́вша Христа́, / в Не́мже утвержда́емся.
Конда́к пра́здника и и́кос.
Седа́лен свята́го, глас 8. Подо́бен: Прему́дрости:
Благоче́стия о́бразы му́жески хра́брствуя, / нече́стия пре́лесть низложи́в, му́чениче, попра́л еси́ врага́ шата́ния / и, Боже́ственным жела́нием при́сно разгара́емь, / мучи́телей угаси́л еси́ безбо́жное свере́пство. / Те́мже досто́йно возме́здие мук прия́л еси́ вене́ц / и подае́ши исцеле́ния ве́рою притека́ющим. / Страстоте́рпче Гео́ргие, моли́ Христа́ Бо́га согреше́ний оставле́ние дарова́ти / пра́зднующим любо́вию святу́ю па́мять твою́.
Сла́ва: Земно́е бога́тство на земли́ раздава́яй всем, му́чениче му́дре, / бога́тство Небе́сное насле́довал еси́ труды́ твои́ми, / Кресто́м бо честны́м, я́ко в броню́, обо́лкся / и тем посрами́л еси́ мучи́телей шата́ние. / Те́мже моли́твами прося́щим тя подае́ши Боже́ственная дарова́ния, / исцеле́ний благодея́ния. / Страстоно́сче Гео́ргие, моли́ся Христу́ Бо́гу, / прегреше́ний оставле́ние дарова́ти / пра́зднующим любо́вию святу́ю па́мять твою́.
И ны́не, пра́здника.
Песнь 4
Ирмо́с: Прише́л еси́ от Де́вы / не хода́тай, ни А́нгел, но Сам, Го́споди, вопло́щься, / и спасл еси́ всего́ мя, челове́ка. / Тем зову́ Ти: сла́ва си́ле Твое́й, Го́споди.
Припев: Святы́й великому́чениче и победоно́сче Гео́ргие, моли́ Бо́га о на́с.
Пое́м твоя́ по́двиги, преблаже́нне Гео́ргие, / и́миже разсы́пал еси́ и́дольския слу́жбы, / всю же упраздни́л еси́ де́монскую пре́лесть, пресла́вне.
Утиши́ напа́стей и бед смуще́ние / и вся́кое наве́тие зло́е де́монов отжени́ от пою́щих тя, / Христо́ва во́ина, досточу́дне.
Возсия́л еси́, я́ко звезда́ светоно́сная, Гео́ргие, душе́вною до́блестию / и тве́рдостию ве́ры пре́лесть мра́чную отгоня́ / и спаса́я пою́щия тя.
Богоро́дичен: Спасе́ние суще́ственное, Де́во, родила́ еси́, бога́тством бла́гости / и есте́ственною благосты́нею спаса́ющее челове́ка / и истле́вший о́браз назида́ющее.
Ин. Ирмо́с: Услы́шах Твое́, Христе́, вои́стинну пресла́вное: / я́ко Безсме́ртен сый Бог / уподо́бися сме́ртным челове́ком и пребы́сть, е́же бе, / и того́ ра́ди Твою́ сла́влю си́лу.