Свети́лен. Подо́бен: Ученико́м зря́щим:
Весна́ нам возсия́, све́тлое Влады́чнее и Боже́ственное Воскресе́ние, / к Небе́сней па́сце от земли́ нас пресыла́я, / с не́юже просиява́ет всесла́внаго му́ченика Гео́ргия па́мять светоза́рная, / ю́же све́тло соверши́м, / да Боже́ственныя сподо́бимся благода́ти от Христа́ Спа́са.
Сла́ва, Подо́бен: Све́те неизме́нный:
Я́ко со́лнце светоно́сное, / чуде́сными заря́ми просвеща́вши всю тва́рь, Гео́ргие страстоте́рпче. / Те́мже, твою́ соверша́юще па́мять, / пое́м Воскре́сшаго из гро́ба.
И ны́не, пра́здника.
На хвали́тех стихи́ры на 4, глас 2. Подо́бен: Егда́ от Дре́ва:
Прииди́те, всепра́зднственное, све́тлое, / сла́вное Воскресе́ние, вси торжествова́вшии, / па́ки пра́зднуем све́тло торжество́ Гео́ргия му́ченика / и венча́ем сего́ ве́сненными цве́ты, / су́ща непобеди́ма; / я́ко да того́ мольба́ми прии́мем / скорбе́й ку́пно и прегреше́ний избавле́ние.
Всего́ прине́сл еси́ себе́, / тебе́ Да́вшему, всеблаже́нне, жи́знь всеце́лую, / я́ко всепло́дие жи́во и одушевле́нно / и же́ртву благоприя́тну и пречи́сту. / Те́мже был еси́ моли́твенник тепле́йший, / бу́ри изыма́я вся, / ве́рою пою́щия тя, му́чениче, / и призыва́ющий тя, Гео́ргие.
Се́мя возде́лав приле́жно, / все́янное Сло́ва в чи́стей твое́й души́, / сие́ умно́жил еси́ боле́зньми страда́ния / и, прему́дре положе́н в Небе́сных жи́тницах, / нетле́нное обре́л еси́ наслажде́ние. / Его́же ны́не насыща́яся, блаже́нне, / твои́ми к Бо́гу моли́твами, / ве́рою пою́щия тя спаса́й.
Му́чениче страстоно́сче Христо́в, / су́щия в напа́стех ну́ждных спаси́, / мольба́ми твои́ми от вся́каго обстоя́ния избавля́я / и отгоня́ душегу́бную лю́тую печа́ль, / благода́ти же и ми́лости нам проси́, / я́ко да моли́твами твои́ми спа́сшеся, / ра́дующеся, почита́ем вси / честны́я по́двиги твоя́, Гео́ргие.
Сла́ва, глас 2: Да помава́ют пра́ведная, рече́ Соломо́н, / челове́ком ве́жди: / поми́луется бо от Христа́ Бо́га / ви́дяй пра́вая, предглаго́лаше. / Удо́бь же сия́ внуши́в, / о многотерпели́ве Гео́ргие, / Влады́чним уче́нием после́довал еси́ / и, беззако́нным отда́в себе́, претерпе́л еси́, / пре́лести тре́бы оплева́л еси́, я́ко ме́рзски: / те́ло бо твое́ дав за любо́вь Созда́теля, / все на у́ды ссещи́. / И велиа́р па́че ве́сь, постыде́вся, уязвля́шеся, / венцено́сца тя зря соверше́нна. / Те́мже во дво́рех живы́й Го́спода твоего́ с Вы́шними си́лами, / моли́, страстоте́рпче Христо́в, / спасти́ся душа́м на́шим.
И ны́не, пра́здника.
Славосло́вие вели́кое. По Трисвято́м тропа́рь свята́го:
Я́ко пле́нных свободи́тель / и ни́щих защи́титель, / немощству́ющих врач, / правосла́вных побо́рниче, / победоно́сче, великому́чениче Гео́ргие, / моли́ Христа́ Бо́га / спасти́ся душа́м на́шим.
Ин тропа́рь свята́го, глас 4: По́двигом до́брым подвиза́лся еси́, / страстоте́рпче Христо́в, / ве́рою и мучи́телей обличи́л еси́ нече́стие, / же́ртва же благоприя́тна Бо́гу прине́слся еси́. / Те́мже и вене́ц прия́л еси́ побе́ды / и моли́твами, свя́те, твои́ми всем подае́ши / прегреше́ний проще́ние.
И ны́не, пра́здника.
Ектении́ и отпу́ст. И дае́тся святы́й еле́й бра́тии от канди́ла свята́го, и час 1-й. На 1-м часе́ тропа́рь пра́здника. Сла́ва, свята́го, И ны́не, Богоро́дичен часо́в. По Трисвято́м кондаки́ пра́здника и свята́го, глаго́лем, пременя́юще.
Стихи́ры на пома́зании, глас 2. Подо́бен: Егда́ от Дре́ва:
Вся, я́же в житии́, презре́в, / то́чно еди́наго Влады́ки любви́ ду́шу приве́л еси́, / вели́кий Гео́ргие, свети́льниче всемíрный, / и к безме́рным му́кам отлучи́лся еси́ му́жески, / побе́ды красе́н вене́ц прия́л еси́. / Те́мже мо́лим тя, блаже́нне, / моли́ от бед всем изба́витися, пою́щим тя.
Ско́рби и лю́тыя печа́ли, / жития́ треволне́ния и бу́ри ны́не мя обурева́ют, / возмуще́нием злых страсте́й одержи́м е́смь. / Засту́пниче мой вели́кий, блаже́нне Гео́ргие, / предста́в, помози́ ми при́сно покро́вом твои́м, / ве́рою прибега́ющему ти, / я́ко да ра́достию се́рдца, му́чениче, / ублажа́ю тя, спаса́емь.
Сла́ва, глас 4: Прииди́те, ве́рных собо́ри, / прииди́те, пра́здник соста́вим, / и́бо пресве́тлая па́мять дне́сь яви́ся страстоте́рпца Гео́ргия / на́ша просвеща́ет неви́димо се́рдца, / доброде́тельми блиста́ющи. / Те́мже, единому́дренно воспева́юще, рцем: / ра́дуйся, во́ине вели́каго Царя́ Христа́; / ра́дуйся, пресве́тлая похвало́ ве́ры; / ра́дуйся, всесве́тле и пребога́те. / О нас, преблаже́нне, всех Влады́ку, Христа́ Бо́га моли́, / сохране́ным бы́ти от искуше́ний лука́ваго / и спасти́ души́ на́ша.