От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой.
Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.
Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.
Проки́мен, глас 4: Во всю зе́млю изы́де веща́ние их / и в концы́ вселе́нныя глаго́лы их.
Стих: Небеса́ пове́дают сла́ву Бо́жию, творе́ние же руку́ Его́ возвеща́ет твердь.
Други́й проки́мен: Вся́кое дыха́ние / да хва́лит Го́спода.
Стих: Хвали́те Бо́га во святы́х Его́, хвали́те Его́ в утверже́нии си́лы Его́.
Ева́нгелие от Луки́, зача́ло 50 (Лк 10:1–15).
Во вре́мя о́но, яви́ Госпо́дь и ине́х се́дмьдесят учени́к Свои́х, и посла́ их по двема́ пред лице́м Свои́м во всяк град и ме́сто, а́може хотя́ше Сам ити́. Глаго́лаше же к ним: жа́тва у́бо мно́га, де́лателей же ма́ло, моли́теся у́бо Господи́ну жа́тве, да изведе́т де́латели на жа́тву Свою́. Иди́те, се Аз посыла́ю вы я́ко а́гнцы посреде́ волко́в. Не носи́те влага́лища, ни пи́ры, ни сапоги́, и ни кого́же на пути́ целу́йте. Во́ньже а́ще дом вни́дете, пе́рвее глаго́лите: мир до́му сему́. И а́ще у́бо бу́дет ту сын ми́ра, почи́ет на нем мир ваш, а́ще ли же ни, к вам возврати́тся. В том же дому́ пребыва́йте, я́дуще и пию́ще, я́же суть у них, досто́ин бо есть де́латель мзды своея́. Не преходи́те из до́му в дом. И во́ньже а́ще град вхо́дите, и прие́млют вы, яди́те предлага́емая вам, и исцели́те неду́жныя, и́же суть в нем, и глаго́лите им: прибли́жися на вы Ца́рствие Бо́жие. И во́ньже а́ще град вхо́дите, и не прие́млют вас, изше́дше на распу́тия его́, рцы́те: и прах, приле́пший нам от гра́да ва́шего, оттряса́ем вам. Оба́че сие́ ве́дите, я́ко прибли́жися на вы Ца́рствие Бо́жие. Глаго́лю вам, я́ко Содо́мляном в день той отра́днее бу́дет, не́же гра́ду тому́. Го́ре тебе́, Хорази́не, го́ре тебе́, Вифсаи́до, я́ко а́ще в Ти́ре и Сидо́не бы́ша си́лы бы́ли бы́вшия в ва́ю, дре́вле у́бо во вре́тищи и пе́пеле седя́ще пока́ялися бы́ша, оба́че Ти́ру и Сидо́ну отра́днее бу́дет на суде́, не́же ва́ма. И ты, Капернау́ме, и́же до небе́с вознесы́йся, до а́да низведе́шися.
По 50-м псалме́.
Сла́ва: Моли́твами Апо́стола Ма́рка, / Ми́лостиве, очи́сти / мно́жества согреше́ний на́ших.
И ны́не: Моли́твами Богоро́дицы, / Ми́лостиве, очи́сти / мно́жества согреше́ний на́ших.
Та́же, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.
И стихи́ра, глас 6: Излия́ся благо́дать во устна́х твои́х, / Ма́рко апо́столе, / и был еси́ па́стырь Христо́вы Це́ркве, / уча́ слове́сныя о́вцы / ве́ровати в Тро́ицу Единосу́щную, / во Еди́ном Божестве́.
Кано́н пра́здника со ирмосо́м на 6 и свята́го на 8.
Кано́н свята́го, глас 1.
Песнь 1
Ирмо́с: Твоя́ победи́тельная десни́ца / боголе́пно в кре́пости просла́вися: / та бо, Безсме́ртне, / я́ко всемогу́щая, проти́вныя сотре́, / изра́ильтяном путь глубины́ новосоде́лавшая.
Припев: Святы́й апо́столе и евангели́сте Ма́рко, моли́ Бо́га о на́с.
Ма́рка Богови́дца восхваля́я, призыва́ю благода́ть Ду́ха: / я́ко да вдохну́в ми све́тло, отжене́т неве́дение / и Боже́ственное бога́тство прему́дрости да́рует.
Твоего́ Богогла́снаго све́том просвети́в, Спа́се, благода́тным, / в мiр посла́л еси́, Сло́ве Бо́жий, благи́х я́ко вино́вный, / Твое́ прише́ствие нам благовеству́юща.
Слава: Петру́ прему́дрому учени́к быв и того́ обогати́вся сыновство́м, / Ма́рко всесла́вне, таи́нник показа́лся еси́ та́ин Бо́жиих / и снасле́дник сла́вы его́ был еси́.
И ныне, Богоро́дичен: И́же еги́птяны во глубине́ потопи́в о́блаком Ду́ха, / Сей прии́де от Тебе́, Чи́стыя, еги́птяном по́слежде / и Ма́рком тех от пре́лести измени́.
Катава́сия: Воскресе́ния день, / просвети́мся, лю́дие. / Па́сха, Госпо́дня Па́сха, / от сме́рти бо к жи́зни, / и от земли́ к небеси́, / Христо́с Бог нас преведе́, / побе́дную пою́щия.
Песнь 3
Ирмо́с: Еди́не, ве́дый челове́ческаго существа́ не́мощь / и ми́лостивно в не́ вообра́жься, / препоя́ши мя с высоты́ си́лою, / е́же вопи́ти Тебе́, Святы́й , / одушевле́нный хра́ме / неизрече́нныя сла́вы Твоея́, Человеколю́бче.