Катава́сия пра́здника.
Песнь 8
Ирмо́с: Седмери́цею пещь / халде́йский мучи́тель / Богочести́вым неи́стовно разжже́, / си́лою же лу́чшею спасе́ны, сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.
Припев: Святы́й апо́столе Иáкове, моли́ Бо́га о нас.
Авраа́мское предложе́ние ты, Богови́дче, стяжа́л еси́, / призва́вшему тя Христу́ после́дуя, / и пресве́тел служи́тель был еси́ Ему́, / я́ко Соде́телю и Изба́вителю, поя́: / о́троцы, благослови́те, свяще́нницы, воспо́йте, / лю́дие, превозноси́те во вся ве́ки.
Крепча́йше яви́ся гро́ма твое́ провозглаше́ние, зако́ннаго о́браза шуме́ние. / Христа́ бо возгреме́л еси́ вселе́нней всей, / Бо́га, и Соде́теля, и Изба́вителя, поя́: / о́троцы, благослови́те, свяще́нницы, воспо́йте, / лю́дие, превозноси́те во вся ве́ки.
Благослови́м Отца́ и Сы́на и Свята́го Ду́ха, Го́спода.
Удиви́лся еси́, сла́вне, муче́ния све́тлостию / и благоче́стия и́стинным просвеще́нием, / я́ко князь апо́стол поста́влен был еси́ по всей земли́, / Соде́телю и Изба́вителю поя́: / о́троцы, благослови́те, свяще́нницы, воспо́йте, / лю́дие, превозноси́те Христа́ во ве́ки.
И ныне, Богоро́дичен: Вити́йстии язы́цы Тебе́ воспе́ти не мо́гут, / о Богороди́тельнице, Мари́е Богоневе́сто! / Бо́га бо родила́ еси́, су́щаго над все́ми, Отрокови́це Чи́стая, / Соде́теля и Изба́вителя, Ему́же вопие́м: / о́троцы, благослови́те, свяще́нницы, воспо́йте, / лю́дие, превозноси́те во вся ве́ки.
Хва́лим, благослови́м, покланя́емся Го́сподеви,/ пою́ще и превознося́ще во вся ве́ки.
Катава́сия пра́здника.
Песнь 9
Ирмо́с: Ужасе́ся о сем Не́бо, / и земли́ удиви́шася концы́, / я́ко Бог яви́ся челове́ком пло́тски, / и чре́во Твое́ бысть простра́ннейшее Небе́с. / Тем Тя, Богоро́дицу, / А́нгелов и челове́к чинонача́лия велича́ют.
Припев: Святы́й апо́столе Иáкове, моли́ Бо́га о нас.
Свя́то преше́д твое́ житие́, святы́х селе́ния дости́гл еси́, / иде́же, ра́дуяся, зарю́ зри́ши трисия́нную; / ея́же наслажда́яся, прему́дре, / испо́лнены весе́лия певцы́ твоя́ и ра́дости, преблаже́нне, покажи́ / твои́ми моли́твами, о Иа́кове!
Ви́дети тя злоде́и и уби́йцы, я́коже твоего́ Влады́ки пре́жде, не терпя́ше: / тех бо дея́ния укоря́я, твоего́ жития́ предложе́нием обличи́л еси́, / убива́ют мече́м подража́теля Христу́, распя́тому пло́тию за челове́ки, / о Богоглаго́ливе преблаже́нне!
Слава: Ору́жием Небе́сным томле́н быв, ра́нами И́род поги́бе, / я́ко Твоя́, Сло́ве, служи́тели и ученики́, и́хже апо́столы наре́кл еси́, / убива́ти не дово́лен бысть окая́нный. / Те́мже тя, пра́ведному промышле́нию Благода́теля, уди́вльшеся, велича́ем.
И ныне, Богоро́дичен: Яви́лася еси́, о Де́во, Ма́ти Бо́жия, / па́че естества́ ро́ждши пло́тию Бо́га Сло́ва, / Его́же Оте́ц отры́гну от се́рдца Своего́, / пре́жде всех век, я́ко Благ, / Его́же ны́не и теле́с превы́шша разумева́ем, / а́ще и в те́ло облече́ся.
Катава́сия пра́здника.
Свети́лен. Подо́бен: Жены́, услы́шите:
Иа́кова воспое́м Зеведе́ова вси: / со Христо́м бо взы́де на го́ру Фаво́рскую, / и зри́тель бысть Боже́ственнаго преображе́ния, / и, соше́д, пропове́даша в четвероконе́чную всю / с Петро́м и Иоа́нном. Дважды.
Сла́ва, и ны́не, пра́здника.
На хвали́тех стихи́ры на 6: пра́здника 3, и апо́стола 3, глас 8 со стихо́вны:
Стихи́ры апо́стола, глас 8. Подо́бен: О, пресла́внаго чудесе́:
Блаже́нне Богови́дче Иа́кове, / ты, Сло́ва глас а́бие восприе́м, / о оте́ческом небре́гл еси́ / угожде́нии и любви́. / Оста́вль у́бо жития́ смуще́ние, / в мы́сленное же преше́д мо́ре, / сие́ возмути́л еси́ / благоче́стия уче́нии / и заря́ми премíрными твои́ми, Богоблаже́нне.
Сло́ва самови́дче Иа́кове, / Нача́льнику жи́зни / и Отцу́ бу́дущих угожда́я дея́нии, / Исма́ила всескве́рнаго / пе́рвенства, блаже́нне, лиши́л еси́, / чре́во я́ко бо́га вменя́юща. / Его́же и запя́л еси́, / и на́га показа́л еси́ оте́ческаго покро́ва, / благослове́ния же и насле́дия неприча́стна.
Князь поста́влен был еси́, сла́вне, / ны́не по всей земли́, / о тебе́ я́коже пре́жде написа́ся, / уче́ник быв вся Сотво́ршаго, / и ре́вностию твое́ю тепле́йшею, / и дерзнове́нием непобеди́мым / уби́йство претерпе́л еси́, / от честна́го двоена́десятих учени́к, блаже́нне, совокупле́ния / пе́рвее убива́емый.