Ин. ирмос тойже.
Припе́в: Преподо́бне о́тче Арсéние, моли́ Бо́га о на́с.
Ты нуди́тель естества́ яви́лся еси́, Арсе́ние, / ты стра́сти, о́тче, покори́л еси́ у́мному влады́честву, я́коже рабу́, сну повелева́я. / Те́мже и во всено́щных бде́ниих вопия́л еси́: / си́ле Твое́й сла́ва, Человеколю́бче.
Слава: Ты Бо́га, преподо́бне, жела́тельне взыска́л еси́, / ты я́вльшагося мно́жае возжела́л еси́ / и, чистото́ю Богови́ден весь быв, к жела́емому бесе́довал еси́, / разуме́в соедине́нием вы́шшаго вся́каго постиже́ния, о́тче Арсе́ние.
И ныне, Богородичен: Ты ве́рных похвала́ еси́, Безневе́стная, Ты Предста́тельница, / Ты и прибе́жище христиа́н, стена́ и приста́нище: / к Сы́ну бо Твоему́ мольбы́ но́сиши, Всенепоро́чная, и спаса́еши от бед / ве́рою и любо́вию Богоро́дицу Чи́стую Тебе́ зна́ющия.
Катавасия праздника.
Песнь 5
Ирмос: Вску́ю мя отри́нул еси́ / от лица́ Твоего́, Све́те незаходи́мый, / и покры́ла мя есть чужда́я тьма, окая́ннаго? / Но обрати́ мя и к све́ту за́поведей Твои́х / пути́ моя́ напра́ви, молю́ся.
Припев: Святы́й апо́столе и евангели́сте Иоа́нне, моли́ Бо́га о на́с.
Во тьме мíра просия́вший, ви́дев Свет Пречи́ст, раствори́лся еси́ любо́вию / и, свети́льник благоче́стия быв, многосе́менных ро́ды язы́к / Богосло́вия, Иоа́нне, све́том осия́л еси́.
Уве́дев, я́ко зако́н Моисе́ом се́нный дан бысть, / Боже́ственная же благода́ть Христо́м Бо́гом на́шим бысть, / богосло́вным язы́ком, сы́не гро́мов возлю́бленне, благовести́л еси́ Его́ Божество́.
Богородичен: Ты ми покро́в и держа́ва, Пречи́стая, / и утвержде́ние, и стена́ неруши́ма, и Тя призыва́ю: / в нощи́ и во дни мя соблюда́й от вся́каго вре́да велиа́ра находя́щаго, / да ве́рою и любо́вию сла́влю Тя.
Ин. ирмос тойже.
Припе́в: Преподо́бне о́тче Арсéние, моли́ Бо́га о на́с.
Хода́тая пе́рвому, о́тче, преступле́нию первозда́ннаго Ада́ма благоче́стно отри́нул еси́, / вра́жия до́бре ви́дя кова́рствия, / те́мже, в непоро́чнем ликовству́я пи́щном приста́нищи, Влады́ку Христа́ моли́.
Слава: Себе́ сама́го отве́ргся, вся́каго сладостра́стия отве́рглся еси́ / и, на ра́му крест твой нося́, Арсе́ние, и Христа́ жела́я, / на Небесе́х снасле́дник досто́йне Сего́ показа́лся еси́.
И ныне, Богородичен: Ма́тернее дерзнове́ние к Сы́ну Твоему́ иму́щи, Всечи́стая, / сро́днаго промышле́ния о нас не пре́зри, мо́лимся, / я́ко Тебе́ и еди́ну, христиа́не, ко Влады́це очище́ние ми́лостивно предлага́ем.
Катавасия праздника.
Песнь 6
Ирмос: Бе́здна грехо́в и прегреше́ний бу́ря мя смуща́ет / и во глубину́ ну́жднаго ре́ет мя отча́яния, / но Твою́ кре́пкую ру́ку мне простри́, я́ко Петро́ви, / о Упра́вителю, и спаси́.
Припев: Святы́й апо́столе и евангели́сте Иоа́нне, моли́ Бо́га о на́с.
Угль Боже́ственнаго огня́ прови́де обра́зно Иса́ия, / очи́стив устне́, проро́чества сподо́бися; / воплоти́вшагося же Бо́га Сло́ва, блаже́нне Иоа́нне, ты яви́лся еси́ напе́рсник.
Сло́во Сый единоро́дное, Е́же в не́дрех Оте́ческих седя́щее, / воплоще́нно узре́ся, Иоа́нне блаже́нне, / и я́ко таи́ннику возлю́бленну тебе́ сказа́, / безпло́тне Бо́га никому́же ви́дети когда́.
Богородичен: Просвети́ мою́ ду́шу, ро́ждшая озаре́ние сла́вы О́тчи, / Де́во Богоро́дице Всепе́тая, / Твою́ бо и́стинную благода́ть иму́ще, бесе́ды языковре́дия возбраня́емся.
Ин. ирмос тойже.
Припе́в: Преподо́бне о́тче Арсéние, моли́ Бо́га о на́с.
Му́дрость плотску́ю благоче́стно безстра́стием умертви́л еси́, / не возлюби́в насле́дия земна́го, преподо́бне, / от Христа́ жела́я, о́тче Арсе́ние, в Вы́шних насле́дие восприя́ти.
Слава: Со́лнце я́вльшееся всено́щное твое́ разреши́ стоя́ние, / мы́сленнаго со́лнца несравне́нное сия́ние, по е́же в нощи́ жития́ трудо́в твои́х, / просвеща́я осия́ти тебе́, Арсе́ние.
И ныне, Богородичен: Иму́щи сострада́тельное, я́ко ро́ждши человеколю́бное Сло́во, / спаси́ нас го́рькия и лю́тыя напа́сти, / Тя бо еди́ну, ве́рнии, Пречи́стая Влады́чице, заступле́ние необори́мое стяжа́хом.
Катавасия праздника.
Кондак, глас 2: Вели́чия твоя́, де́вственниче, кто пове́сть? / То́чиши бо чудеса́, и излива́еши исцеле́ния, / и мо́лишися о душа́х на́ших, / я́ко Богосло́в и друг Христо́в.