И ныне, Троичен: Трисве́тлое Божество́, еди́ну сия́ющее зарю́, / от еди́наго Триипоста́снаго естества́, Роди́теля Безнача́льна, / единоесте́ственно же Сло́во Отцу́ и сца́рствующаго Единосу́щнаго Ду́ха, / о́троцы, благослови́те, свяще́нницы, воспо́йте, / лю́дие, превозноси́те во вся ве́ки.
Хва́лим, благослови́м, покланя́емся Го́сподеви,/ пою́ще и превознося́ще во вся ве́ки.
Катавасия праздника.
Песнь 9
Ирмос: Ужасе́ся о сем Не́бо, / и земли́ удиви́шася концы́, / я́ко Бог яви́ся челове́ком пло́тски / и чре́во Твое́ бысть простра́ннейшее небе́с. / Тем Тя, Богоро́дицу, / А́нгелов и челове́к чинонача́лия велича́ют.
Припев: Святы́й апо́столе и евангели́сте Иоа́нне, моли́ Бо́га о на́с.
Кресту́ Влады́чню предстоя́й, Де́ве же и Богоро́дице Чи́стей, / учени́к возлю́бленный, чи́стый Богосло́вия орга́н, / я́коже де́вственник вруче́ние прия́т и, храни́тель Непоро́чный быв Богоро́дицы, / ны́не досто́йно ублажа́ется.
Досто́йно возлю́бль Пречи́стый честно́е и непоро́чное житие́ твое́, / а́нгельски пожи́вша на земли́, тя в бра́та ме́сто прия́т, блаже́нне Иоа́нне, / Свое́й сы́на тя возвести́ Ма́тери Богоро́дице, / с Не́юже тя вси ублажа́ем.
Богородичен: Спаси́тельный бу́ди ми столп, Чи́стая, / де́монов безде́льны сотвори́ полки́, искуше́ний молву́ и бед отрева́ющи, / и страсте́й нахо́ды дале́че отгоня́ющи, и чи́стое даю́щи свобожде́ние, / и Боже́ственная дарова́ния незави́стне мне преподаю́ще.
Ин. ирмос тойже.
Припе́в: Преподо́бне о́тче Арсéние, моли́ Бо́га о на́с.
Моисе́й удиви́ся, сподо́блься ви́дети Де́выя рождество́ обра́зне, / купину́, образова́нную огнезра́чно; / ты же, Боже́ственному Ду́ху весь изступле́нием соедини́вся, / огнезра́чен ви́ден был еси́. / Те́мже и досто́йно ублажа́ем тя, Арсе́ние.
Слава: Возсия́ тебе́ Христо́с, Свет незаходи́мый, / ра́дость же тя подъя́т на Небе́сная, / па́мятию бо о сме́рти всегда́шнею прине́сл еси́ житие́ нескве́рное приле́жно. / Те́мже и досто́йно восприя́л еси́ плоды́ трудо́в, всеблаже́нне.
И ныне, Богородичен: Яви́лася еси́, о Де́во, Ма́ти Бо́жия, па́че естества́, / ро́ждши пло́тию Бо́га Сло́ва, / Его́же Оте́ц отры́гну от се́рдца Своего́ пре́жде всех век, я́ко Благ, / Его́же ны́не и теле́с превы́шша разуме́ем, а́ще и в те́ло облече́ся.
Катавасия праздника.
Светилен. Подобен: Жены́, услы́шите:
Гро́мов сын быв, к челове́ком богосло́вил еси́, / е́же: в нача́ле бе Сло́во, – апо́столе Иоа́нне, / возлеги́й бо на пе́рси ве́рно Влады́ки твоего́ / и отту́ду поче́рп Богосло́вия струи́, тварь всю напоя́еши.
Слава, преподобнаго: Мiрска́го пристра́стия, я́ко от скве́рны, уклони́лся еси́, / и, неяде́нием плоть увяди́в, обнови́л еси́ ду́ши кре́пость, преподо́бне, / и сла́вою обогати́лся еси́ Небе́сною, Арсе́ние, / те́мже моли́тися не преста́й о нас Го́сподеви.
И ныне, праздника.
На хвалитех стихиры праздника 3 и апостола 3, глас 8. Подобен: О, пресла́внаго чудесе́:
Блаже́нне Иоа́нне прему́дре, / мно́жеством те́плости / ко Христо́ве любви́ / мно́жае всех был еси́, / учени́к возлю́блен Всеви́дцу Сло́ву / и судя́щему пра́выми ме́рами всей вселе́нней, / чистото́ю и де́вства добро́тами озари́вся, / те́лом и помышле́нии, Богоблаже́нне.
Де́вства процвете́ние, / честны́х доброде́телей прия́тное жили́ще, / прему́дрости орга́н, духо́вный храм, / светоно́сная уста́ благода́ти, / Це́ркви пресве́тлое о́ко, / всечестна́го Иоа́нна / пе́сньми духо́вными ны́не восхва́лим, / я́ко служи́теля Христо́ва.
Богосло́вия во́ды, / на пе́рси возле́г, / прему́дрости поче́рпл еси́ / и мiр напои́л еси́, / Иоа́нне всеизря́дне, / Тро́йческим ра́зумом мо́ре изсуши́л еси́ безбо́жия, / столп быв и о́блак одушевле́н, / наставля́еши нас к Небе́сному насле́дию.
Слава, глас 8. Самогласен: Благове́стниче Иоа́нне, / равноа́нгельне, де́вственниче, Богосло́ве, Бо́гом науче́ние, / правосла́вно мíрови пречи́стое ребро́, / кровь и во́ду источи́вшее, пропове́дал еси́, / и́мже ве́чный живо́т прие́млем душа́м на́шим.
И ныне, праздника.