Катавасия праздника, аще ли пост: Седя́й в Сла́ве на Престо́ле Божества́ во о́блаце ле́гце, прии́де Иису́с Пребоже́ственный Нетле́нною Дла́нию и спасе́ зову́щия: сла́ва, Христе́, си́ле Твое́й.
Песнь 5
Ирмос: Вску́ю мя отри́нул еси́ / от лица́ Твоего́, Све́те незаходи́мый, / и покры́ла мя есть чужда́я тьма, окая́ннаго? / Но обрати́ мя и к све́ту за́поведей Твои́х / пути́ моя́ напра́ви, молю́ся.
Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.
Я́ко хода́тай ве́тхаго и но́ваго быв свяще́ннейший, / хода́тайствы Боже́ственными на́ше обветша́ние обнови́, / обновле́ние соверша́ющих но́вым явле́нием главы́ твоея́, блаже́нне Предте́че.
От Кома́н прине́сшую благода́ть исцеле́ний главу́ твою́ к Ца́рскому гра́ду, Предте́че, / созыва́еши гра́ды днесь к тоя́ прише́ствию: / собира́ются ве́рных мно́жества, просвеще́ния нетле́ннаго исполня́ема.
Слава: Царь вхо́ду главы́ твоея́ мно́жае, не́же багряни́це, ра́дуется, / свяще́нник же, Боже́ственный Богоно́сца тезоимени́тый, Предте́че, / дла́ньми сию́ обдержа́, соблагословля́ет, благословя́ ве́рных соверше́нства.
И ныне, Богородичен: Влады́ку ро́ждши, яви́лася еси́ превы́шшая Го́рних сил / и земны́х естество́ богосоде́лала еси́, Отрокови́це Всенепоро́чная. / Те́мже Богоро́дицу всеи́стинную душе́ю и язы́ком, ве́рнии, Тя, Де́во, сла́вим.
Катавасия праздника, аще ли пост: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.
Песнь 6
Ирмос: Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся, / к Тебе́ бо возопи́х, и услы́ши мя, / Бо́же спасе́ния моего́.
Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.
И́стина от земли́, / глава́ возсия́вшая Крести́теля Твоего́, Христе́, лжу отгна́, / ересе́й разори́ го́рькую зи́му и мiр просвети́ла есть.
Почерпи́те просвеще́ние, и благода́ть Бо́жию, и ми́лость / и главы́, и ду́ши освяти́те, главе́ прикосну́вшеся Предте́чи благода́ти, / Боже́ственному верху́ прикосну́вшагося в вода́х.
Слава: Главы́ враго́в под но́зе сокруши́ти во́инству на́шему, моли́ся, Предте́че, / любо́вию честну́ю твою́ главу́ чту́щему, / И́рода обличи́вшую.
И ныне, Богородичен: Су́щим во а́де Свет пропове́дал еси́, / приходя́щаго от крове́й Деви́ческих, пло́тию обложе́на бы́вша Челове́ка, / на благодея́ние челове́ков, блаже́нне Предте́че.
Катавасия праздника, аще ли пост: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.
Кондак, глас 6. Подобен: Е́же о нас:
Светоявле́нный и Боже́ственный в мíре столп, / со́лнца свети́льник, / Предте́ча, главу́ светоно́сную и Боже́ственную свою́ показа́вый в конце́х, / освяща́ет той ве́рно покланя́ющихся и взыва́ющих: / Христо́в прему́дрый Крести́телю, спаси́ всех нас.
Икос: От земли́, я́коже исто́чник ра́йский, / глава́ боголюби́вая Предте́чева струи́ испуща́ет благода́ти / и чуде́с то́ки подава́ет всем тре́бующим. / Присту́пим у́бо вси, почерпе́м усе́рдно исцеле́ний Боже́ственныя сея́ пото́ки: / напоя́ет бо ду́ши дарова́нии непреста́нными, и потопля́ет теле́сныя боле́зни, / и всяк неду́г благовре́менне отъе́млет. / Сию́ у́бо воспое́м любо́вию, и целу́ем ве́рою, че́стно облобыза́юще, / и пе́сньми, я́ко венцы́, сию́, ве́рнии, венча́ем. / Предочи́стим на́ша скве́рны мы́сленный, / и Боже́ственными доброде́тельми украси́м ду́ши и вопие́м тве́рдо: / Христо́в прему́дрый Крести́телю, спаси́ всех нас.
Песнь 7
Ирмос: От Иуде́и доше́дше, о́троцы / в Вавило́не иногда́ / ве́рою Тро́ическою пла́мень пе́щный попра́ша, пою́ще: / отце́в Бо́же, благослове́н еси́.
Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.
Со́лнца сла́вы пресве́тлый све́щник был еси́, Предте́че, / тьму отгоня́я ле́сти и просвеща́я ве́рою зову́щих: / оте́ц на́ших Бо́же, благослове́н еси́.