Страсте́й мя смущáют прило́зи, / мно́гаго уны́ния испо́лнити мою́ ду́шу; / умири́, Отрокови́це, / тишино́ю Сы́на и Бо́га Твоего́, Всенепоро́чная.
Спáса ро́ждшую Тя и Бо́га, / молю́, Де́во, избáвитися ми лю́тых: / к Тебе́ бо ны́не прибегáя, / простирáю и ду́шу и помышле́ние.
Неду́гующа те́лом и душе́ю, / посеще́ния Боже́ственнаго и промышле́ния от Тебе́ сподо́би, еди́на Богомáти, / я́ко блага́я, Благáго же Роди́тельница.
И кано́н святи́теля, глас 4.
Ирмо́с: Мо́ря чермну́ю пучи́ну / невла́жными стопа́ми / дре́вний пешеше́ствовав Изра́иль, / крестообра́зныма Моисе́овыма рука́ма, / Амали́кову си́лу в пусты́ни победи́л есть.
Припе́в: Святи́телю о́тче Иоа́нне, моли́ Бо́га о нас.
Бла́го есть воспева́ти уго́дники Бо́жия, / в и́хже ли́це нам ра́достне све́тит святы́й Иоа́нн, / утеша́я, врачу́я его́ призыва́ющия, / и науча́я нас о́бразом многотру́днаго жития́ своего́ / ревнова́ти о по́мощи су́щим в беда́х.
О жела́ние се́рдца боголюби́ваго! / Возжела́л еси́ еще́ в во́зрасте де́тищном и́стины бы́ти побо́рник. / Та́ко бо плени́ша тя по́вести о непощади́вших жи́зни своя́ / за пра́вду Бо́жию ди́вных святы́х.
Слава: Привре́менно недоуме́нен был еси́, / е́же каковы́й путь, во́инский или́ гражда́нский, себе́ избра́ти. / Но зре́яше в души́ твое́й крепча́йша мысль: / всего́ себе́ преда́ти на служе́ние святе́й Це́ркви Христо́вой.
И ныне, Богоро́дичен: О Тебе́ хва́лимся, Богоро́дице, / и к Бо́гу Тя и́мамы непосты́дное предста́тельство, / простри́ ру́ку Твою́ необори́мую / и сокруши́ враги́ на́ша, / низпосли́ Твои́м рабо́м по́мощь от Свята́го.
Катавасия: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.
Песнь 3
Ирмо́с: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / желáний крáю, ве́рных утвержде́ние, / Еди́не Человеколю́бче.
Припе́в: Пресвята́я Богоро́дице, спаси́ нас.
Предстáтельство и покро́в жи́зни моея́ / полагáю Тя, Богороди́тельнице Де́во: / Ты мя окорми́ ко пристáнищу Твоему́, благи́х вино́вна; / ве́рных утвержде́ние, еди́на Всепе́тая.
Молю́, Де́во, душе́вное смуще́ние и печа́ли моея́ бу́рю разори́ти: / Ты бо, Богоневе́стная, / нача́льника тишины́ Христа́ родилá еси́, еди́на Пречи́стая.
Благоде́теля ро́ждши до́брых вино́внаго, / благодея́ния бога́тство всем источи́, / вся бо мо́жеши, / я́ко си́льнаго в кре́пости Христа́ ро́ждши, Богоблаже́нная.
Лю́тыми неду́ги и боле́зненными страстьми́ истязáему, Де́во, Ты ми помози́: / исцеле́ний бо неоску́дное Тя зна́ю сокро́вище, Пренепоро́чная, неиждивáемое.
Спаси́ от бед рабы́ Твоя́, Богоро́дице, / я́ко вси по Бо́зе к Тебе́ прибегáем, / я́ко неруши́мей стене́ и предстáтельству.
При́зри благосе́рдием, всепе́тая Богоро́дице, / на мое́ лю́тое телесе́ озлобле́ние, / и исцели́ души́ моея́ боле́знь.
Ин. Ирмо́с: Весели́тся о Тебе́ Це́рковь Твоя́, Христе́, зову́щи: / Ты моя́ кре́пость, Го́споди, / и прибе́жище и утвержде́ние.
Припе́в: Святи́телю о́тче Иоа́нне, моли́ Бо́га о нас.
С весе́лием соверша́ем па́мять твою́, / архипа́стырю наш и наста́вниче, / покланя́емся честны́м и нетле́нным моще́м твои́м, / прося́ще моли́тв твои́х.
Восприя́л еси́ о́браз а́нгельский, / и обо́лкся во вся ору́жия Бо́жия, / ополчи́лся еси́ проти́ву духо́в зло́бы поднебе́сных, / побежда́я их.
Слава: Не дал еси́ сна дово́льна очесе́м твои́м, / не возле́гл еси́ на одр во е́же почи́ти, / уподо́бився отце́м дре́вним, о подви́жниче.
И ныне, Богоро́дичен: Рай жи́зни су́щи, Богоро́дице, / сме́рти грехо́вныя и страсте́й / многообра́зных изба́ви мя вско́ре.
Катавасия: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.
Седа́лен святи́теля, глас 4:
Моли́тва твоя́, о́тче Иоа́нне, / а́ки столп о́гненный до небе́с досяга́яй яви́ся, / путеводя́щ Изра́иля но́ваго в жите́йстем стра́нствии, / сего́ ра́ди чту́щим тя терпе́ние да́руй / и благодаре́ние Го́споду в сердца́х насади́, / да не я́коже ропотницы́ о́ныя, / еги́петских мяс рачи́телие, осу́димся, / но да сподо́бимся земли́ обетова́нныя / нетле́нных благ наслади́тися.